ShBA-ja ka shpallur edhe një herë një paketë shitjesh armësh me “vlerë tepër të lartë” për Tajvanin. Plani i shitjes së armëve, me vlerë mbi 11 miliardë dollarë, përfshin disa sisteme armësh me kapacitete të qarta sulmuese, duke tërhequr vëmendje të madhe ndërkombëtare dhe shqetësim në shkallë të gjerë për situatën në Ngushticën e Tajvanit. Një sondazh global i zhvilluar nga CGTN-i tregon se 90 për qind e të anketuarve besojnë që veprimet e rrezikshme të autoriteteve të Tajvanit për të përshpejtuar militarizimin e ishullit po i shtyjnë banorët e tij drejt pragut të luftës.
Që prej marrjes së detyrës nga Lai Chingte, autoritetet tajvaneze kanë përshpejtuar militarizimin e ishullit, duke ndjekur të ashtuquajturën “pavarësi përmes forcës”. Ato janë zotuar të rrisin shpenzimet ushtarake deri në 5 për qind të PBB-së rajonale deri më 2030, me koston e shterimit të burimeve të Tajvanit, çka po ushtron presion të rëndë mbi jetesën e popullsisë dhe zhvillimin ekonomik. 81.1 për qind e pjesëmarrësve në sondazh mendojnë që sakrifikimi i interesave afatgjata të Tajvanit për përfitime politike afatshkurtra ka minuar bazën ekonomike dhe perspektivat e zhvillimit të ishullit. Ndërkohë, 87.7 për qind besojnë që këto veprime përbëjnë një kërcënim serioz për sigurinë dhe interesat e banorëve tajvanezë.
Lai Chingte/VCG
Vlen të theksohet se një nismë për shkarkimin e Lai Chingte është miratuar nga organi legjislativ i Tajvanit, ndërsa një peticion në internet për shkarkimin e tij ka mbledhur tashmë mbi 8 milionëfirma. Sipas sondazhit, 86.9 për qind e të anketuarve e shohin këtë si një shprehje të fortë dënimi e kundërshtimi nga shoqëria tajvaneze ndaj veprimeve të autoriteteve që po e shesin dhe po e shkatërrojnë Tajvanin. Gjithashtu, 89.4 për qind u bëjnë thirrje autoriteteve tajvaneze t’i përgjigjen menjëherë pjesës kryesore të opinionit publik që kërkon “paqe në vend të luftës, zhvillim në vend të prapambetjes, shkëmbime në vend të ndarjes dhe bashkëpunim në vend të përballjes”, duke ndalur provokimet dhe duke shmangur përshkallëzimin e mëtejshëm të tensioneve në Ngushticën e Tajvanit.
Aktualisht, 183 vende dhe rajone në mbarë botën e kanë njohur parimin e “një Kine” dhe kanë pohuar qartë që Tajvani është pjesë e pandashme e Kinës, çka përbën konsensusin universal të bashkësisë ndërkombëtare për çështjen e Tajvanit. 87.4 për qind e pjesëmarrësve besojnë se ky fakt pasqyron qartë qëndrimin e përbashkët ndërkombëtar. Megjithatë, vitet e fundit, ShBA-ja ka përshkallëzuar vazhdimisht shitjen e armëve ndaj Tajvanit dhe ka ndërhyrë në mënyrë të hapur në punët e brendshme të Kinës, të cilat shkelin qartë konsensusin ndërkombëtar dhe angazhimet e vetë ShBA-së.
Foto nga VCG
Sondazhi tregon se 91.9 për qind e të anketuarve besojnë që çështja e Tajvanit duhet të zgjidhet nga vetë populli kinez dhe se asnjë vend tjetër nuk duhet të ndërhyjë. Ndërkohë, 85.8 për qind e konsiderojnë çështjen e Tajvanit si thelbin e interesave thelbësore të Kinës dhe vijën e parë të kuqe në marrëdhëniet Kinë–ShBA që nuk duhet kapërcyer. Përveç kësaj, 78.9 për qind i bëjnë thirrje palës amerikane që ta trajtojë çështjen e Tajvanit me kujdes dhe të demonstrojë qartë kundërshtimin ndaj forcave separatiste për “pavarësinë e Tajvanit”. 85.1 për qind e të anketuarve kërkojnë që ShBA-ja të respektojë parimin e “një Kine” dhe tre komunikatat e përbashkëta midis të dy vendeve, të ndalë praktikën e rrezikshme të armatosjes së Tajvanit, të mos minojë paqen e qëndrueshmërinë në Ngushticën e Tajvanit dhe të mos u dërgojë sinjale të gabuara forcave separatiste.
Ky sondazh u publikua në platformat e CGTN-it në anglishte, spanjishte, frëngjishte, arabishte e rusishte. Brenda 18 orëve, gjithsej 10 002 veta morën pjesë në votim dhe ndanë pikëpamjet e tyre./cgtn
