Kryeministri i Mbretërisë së Bashkuar, Keir Starmer, do të mirëpresë Presidentin ukrainas Volodymyr Zelenskyy në Downing Street, ndërsa Evropa përgatitet për rezultatin e një samiti midis Presidentit të SHBA-së Donald Trump dhe udhëheqësit rus Vladimir Putin më vonë këtë javë.
Bisedimet në Londër të enjten vijnë pasi Starmer tha se Britania ishte gati të “rrisë presionin” mbi Moskën nëse është e nevojshme, duke sugjeruar se Mbretëria e Bashkuar mund të vendosë sanksione të reja nëse Rusia vazhdon të refuzojë një armëpushim në luftën e saj ndaj Ukrainës.
Ndërkohë, Trump e paralajmëroi Rusinë për “pasoja të rënda” nëse refuzon të ndalojë fushatën e saj ushtarake. Duke folur pas një telefonate me Trump dhe aleatët evropianë të mërkurën, Starmer vlerësoi udhëheqësin e Shteteve të Bashkuara për ndihmën në krijimin e asaj që ai e përshkroi si një hapje “të qëndrueshme” për t’i dhënë fund luftës.
“Ky takim i së premtes në të cilin do të marrë pjesë Presidenti Trump është jashtëzakonisht i rëndësishëm”, u tha Starmer gazetarëve.
“Siç ia kam thënë personalisht Presidentit Trump për tre vjet e ca që ka vazhduar ky konflikt, nuk kemi arritur as afër një perspektive për një zgjidhje të qëndrueshme, një mënyrë të qëndrueshme për ta çuar atë në një armëpushim. Dhe tani e kemi këtë shans, për shkak të punës që ka bërë presidenti”, shtoi Starmer.
Zelenskyy do të takohet me Starmer në orën 9:30 të mëngjesit sipas orës lokale (08:30 GMT) në rezidencën zyrtare të kryeministrit britanik, 10 Downing Street.
Takimi Trump-Putin, që do të zhvillohet në Alaska të premten, ka shkaktuar shqetësim në Kiev për shkak të përjashtimit të Zelenskyy-t. Starmer dhe udhëheqës të tjerë evropianë kanë këmbëngulur vazhdimisht se Ukraina duhet të jetë pjesë e çdo bisedimesh mbi të ardhmen e saj.
I pyetur nëse e kishte lënë qëllimisht Zelenskyy jashtë takimit në Alaskë, Trump u përgjigj: “Jo, krejt e kundërta”, duke shtuar se një takim i dytë me udhëheqësin ukrainas mund të pasojë.
“Patëm një telefonatë shumë të mirë, ai ishte në telefonatë, Presidenti Zelenskyy ishte në telefonatë. Do ta vlerësoja me 10, e dini, shumë, shumë miqësore”, tha Trump. “Ka shumë mundësi që të kemi një takim të dytë, i cili do të jetë më produktiv se i pari.”
Presidenti amerikan më parë ka hedhur idenë e një “shkëmbimi” territorial si pjesë e një armëpushimi. Besohet se Putin po kërkon që Ukraina të dorëzojë pjesët e mbetura të rajonit të Donbasit që ende i mban, një propozim që Zelenskyy e ka refuzuar tashmë, duke theksuar se kushtetuta e Ukrainës ndalon dorëzimin e territorit.
Në një deklaratë të përbashkët, i ashtuquajturi Koalicion i të Gatshmëve, i bashkëkryesuar nga Starmer, Presidenti francez Emmanuel Macron dhe Kancelari gjerman Friedrich Merz, paralajmëroi se “kufijtë ndërkombëtarë nuk duhet të ndryshohen me forcë”. Grupi tha gjithashtu se sanksionet mbi ekonominë e luftës së Rusisë duhet të forcohen nëse Moska refuzon një armëpushim në Alaska./Al Jazeera- Argumentum.al
