Një veprimtari promovuese për vëllimin e pestë të librit “Xi Jinping: Qeverisja e Kinës” u mbajt të mërkurën në Turqi, duke mbledhur zyrtarë qeveritarë, studiues e botues nga Kina dhe Turqia.
Pjesëmarrësit thanë se vëllimi i ri është një vepër me autoritet që paraqet në mënyrë gjithëpërfshirëse dhe sistematike arritjet më të fundit të Mendimit të Xi Jinping-ut mbi Socializmin me Karakteristika Kineze për një Epokë të Re. Ai shfaq gjallërisht teorinë dhe praktikën e modernizimit kinez në udhëtimin e ri dhe ofron një paraqitje të thellë të vizionit dhe propozimeve të Kinës për përparimin e ndërtimit të një komuniteti me një të ardhme të përbashkët për njerëzimin.
Teksa ky aktivitet përkoi me 55-vjetorin e marrëdhënieve diplomatike midis Kinës dhe Turqisë, të pranishmit thanë se shkëmbimet mbi përvojat e qeverisjes shtetërore, me temë modernizimin, do të ndihmojnë në thellimin e besimit të ndërsjellë politik, do të promovojnë harmonizimin e strategjive të zhvillimit midis dy vendeve dhe do t’u mundësojnë të dyja palëve të përparojnë së bashku në rrugën drejt modernizimit.
Duke folur në këtë veprimtari , Celal Adan, nënkryetar i Asamblesë së Madhe Kombëtare të Turqisë, tha se vëllimi i pestë i librit “Xi Jinping: Qeverisja e Kinës” ofron një referencë të vlefshme për të kuptuar drejtimin politik dhe mendimin strategjik të Kinës mbi çështjet globale.
Ai theksoi që Turqia është e gatshme ta shfrytëzojë këtë veprimtari si një mundësi për të thelluar më tej shkëmbimet midis organeve ligjvënëse të të dy vendeve dhe bashkëpunimin konkret dypalësh në fusha të ndryshme, për të rritur sinergjinë midis nismës “Një brez, një rrugë” dhe Korridorit të Mesëm, si dhe për të arritur përparim të ri në bashkëpunimin në ekonomi e tregti, investime, shkëmbimet njerëzore e kulturore, si edhe në turizëm.
Veprimtaria u organizua së bashku nga Zyra e Informacionit e Këshillit të Shtetit të Kinës, nga Grupi Ndërkombëtar i Komunikimit i Kinës dhe nga ambasada kineze në Turqi. Në të morën pjesë më shumë se 200 veta nga sektori i botimeve, institutet e studimit të politikave, mediat, si edhe nga sektorë të tjerë të të dy vendeve./CGTN
