Së fundmi, mbi 20 të rinj nga shteti i Uashingtonit në ShBA vizituan provincën Sichuan të Kinës për të marrë pjesë në aktivitetin e shkëmbimeve rinore kino-amerikane “Udhëtim në Kinë duke ndjekur pandat”. Ata patën mundësinë të shohin nga afër pandat, të përjetojnë kulturën e trashëgimisë kulturore jomateriale të rajonit Bashu dhe të njihen me peizazhin urban, duke zbuluar një Kinë të vërtetë, shumëdimensionale dhe plot gjallëri.
Në Qendrën Kërkimore për Mbarështimin e Pandave në Chengdu, të rinjtë vëzhguan nga afër pandat. Eva Angelique Bech, e cila pa për herë të parë panda, tha se ato ishin shumë më të gjalla e më të adhurueshme nga sa e kishte imagjinuar. Skenat e pandave duke u ngjitur në pemë dhe duke luajtur ndryshuan edhe përshtypjen e shumë pjesëmarrësve për këtë simbol kombëtar.
Programi përfshinte edhe përvoja ndërvepruese me tematikën e pandës. Të rinjtë amerikanë përgatitën me duart e tyre bukë kineze (mantou) në formë pande, punuan erashka tradicionale kineze prej letre dhe krijuan kukulla të teatrit tradicional të hijeve, duke përjetuar nga afër hijeshinë e kulturës tradicionale kineze. Jessie Baum u shpreh se arti i teatrit të hijeve e mahniti dhe i zgjoi dëshirën për të mësuar më shumë rreth kulturës tradicionale kineze.
Foto nga CMG
Gjatë qëndrimit të tyre, të rinjtë shëtitën edhe në rrugët e Chengdu-së, ku përjetuan harmoninë mes traditës dhe modernitetit, si edhe mikpritjen e banorëve vendas. Ata u shprehën se Sichuan është një vend ku historia dhe dinamizmi modern bashkëjetojnë në mënyrë mbresëlënëse.
Kryetari i Shoqatës Amerikano-Kineze për Shkëmbimet Rinore dhe Studentore, Ron Chow, tha se të rinjtë kanë nevojë mbi të gjitha për përvoja të drejtpërdrejta dhe për ta parë vetë realitetin. Ai shprehu shpresën që gjithnjë e më shumë të rinj amerikanë do ta vizitojnë Kinën, të krijojnë miqësi dhe të thellojnë mirëkuptimin nëpërmjet shkëmbimeve.
Foto nga CMGAktiviteti “Udhëtim në Kinë duke ndjekur pandat” është organizuar bashkërisht nga Grupi Mediatik i Kinës (CMG) dhe Shoqata Amerikano-Kineze për Shkëmbimet Rinore dhe Studentore, me synimin për të afruar të rinjtë e të dy vendeve nëpërmjet shkëmbimeve rinore dhe përvojave kulturore, duke i dhënë një shtysë të re miqësisë kino-amerikane./CGTN
