REAL POLITIK NR. 119
1 – 19 JANAR 2026
Komente “ flash” mbi 4 ngjarjet kryesore diplomatike, shkurt dhe shqip, vetëm me 1000 fjalë nga analisti i njohur, Mjeshtër i Madh në Diplomaci
DR. JORGJI KOTE
1.5 Mësime nga 3 Janari amerikan! Operacioni i madh ushtarak amerikan natën e 2 Janarit që u mbyll me sukses më 3 Janar me kapjen e Presidentit Venezuelian Maduro ishte ngjarja e parë madhore e vitit 2026 që tronditi botën; me shumë pasoja dhe efekte të paparashikueshme në atë kontinent dhe në mbarë planetin. Sipas ekspertëve më me zë prej saj dalin këto pesë përfundime kryesore:
Së pari, operacioni “ Absolute Resolve“ dëshmoi se SHBA-të mbeten fuqia më e madhe politike, ekonomike dhe ushtarake në botë.
Presidenti Trump e ka konfirmuar se SHBA-të do të përdorin edhe forcën ushtarake për të mbrojtur interesat e tyre strategjike në Venezuelë, Iran, Kolumbi, Kubë, madje edhe në Gronelandë!
Së dyti, fakti që operacioni ushtarak në Karakas brenda një muaji nga shpallja më 5 Dhjetor 2025 të Strategjisë së Re të Sigurisë Kombëtare Amerikane tregon se Trump e ka atë seriozisht dhe jo me ” shaka”
Së treti, me këtë operacion Presidenti Trump konfirmoi synimin strategjik për ta ndarë botën në tri zona influence me Rusinë dhe Kinën.
Më tej, Trump vërtetoi se nuk distancohet nga doktrina e famshme Monroë, “Amerika për amerikanët“, madje e “ka pagëzuar” atë si “Amerika vetëm për Amerikanët e SHBA-ve“!
Ky operacion ishte poshtërim për Rusinë. Sepse Trump bëri në Karakas në 4 orë, atë që Putini nuk po e bën dot me Kievin as në 4 vjet! Ky operacion ishte edhe një betim lufte ndaj Kinës.
Së katërti, deklarimi i Presidentit Trump mbi shfrytëzimin e naftës venezueliane nga kompanitë amerikane është dëshmia më e re e zbatimit të doktrinës së tij Transaksionaliste, duke venë fitimin tregtar mbi çdo vlerë dhe parim tjetër, përfshirë demokracinë, opozitën dhe shtetin e të drejtës.
Kryesorja, SHBA-të do ta përdorin naftën venezueliane si armë kundër Kinës, Rusisë dhe Iranit, aleatët e Maduros dhe blerësit e saj më të mëdhenj.
Përfundimi i pestë është se Europa duhet të intensifikojë përgatitjet e saj në kushtet e ndryshimit të botës dhe rendit ndërkombëtar, si pasojë e veprimit politik dhe ushtarak të SHBA-ve. Po shihet qartë se SHBA-të po i largohen përherë dhe më shumë konsultimit me aleatët e tradicionalë europianë, sepse tanimë për SHBA-të, BE-ja dhe vendet e saj anëtare nuk janë më më aleatë vlerash dhe parimesh demokratike, por vetëm partnerë dhe klientë transaksionesh ekonomike. Madje, Strategjia e Re e Sigurisë Kombëtare Amerikane ka edhe klauzolën mbi mbështetjen për “rezistencën patriotike në Europë, që qytetërimi i saj të mos shuhet në 20 vitet e ardhëshme“.
Zhvillimet më të fundit lidhur me dështimin e demarsheve për armëpushim dhe paqe në Ukrainë dhe distancimi ndaj Europës së moderuar dhe demokratike në favor të ekstremit të djathtë janë kambana të fuqishme alarmi që Europa të zbatojë sa më shpejt procesin historik të riarmatimit, që brenda vitit 2030 ajo të kthehet edhe në një Bashkim të Madh Mbrojtës.
2. Hesape pa Hanxhinë! Kjo mund të thuhet për Samitin e Vullnetmirëve të Ukrainës mbajtur në Paris më 6 Janar, me praninë e liderëve nga mbi 50 vende. Pavarësisht nga hapat dhe përpjekjet që u bënë lidhur me vazhdimin e mbështetjes ushtarake të Ukrainës me trupa perendimore, për garantimin e marrëveshjes së mundshme të paqes, edhe ky takim nuk arriti ndonjë gjë të re dhe thelbësore. Kjo jo për faj të mbështetësve të Ukrainës, por faktit se Moska ende pa u mbyllur ai takim në Paris i refuzoi kategorikisht idetë e saj; madje u përgjigj duke goditur Kievin me raketat Oreshnik. Siç po duken bathët, duket se nisur nga shqetësimi i drejtë dhe qëllimi i mirë për t’u dalë punëve përpara në kohë Europa po i ” bën hesapet pa hanxhinë rus”. Ca më tepër, kur SHBA-të e kanë spostuar Ukrainën nga përparësitë e tyre gjeopolitike, duke i lënë dorë të lirë Putinit në ” zonën e vet të influencës”. Për pasojë, paqja duket shumë larg, duke na kujtuar thënien e moçme ” peshku në det, tigani në zjarr”!
3. A do të “ngrijë” NATO në Groenlandë? Kjo pyetje madhore gjeopolitike nuk moridot përgjigje as në takimin e ministrave të Jashtëm të Danimarkës/Groenlandës në Shtëpinë e Bardhë me zv.Presidentin J.D.Vance dhe Sekretarin e Shtetit Rubio më 14 Janar. Me të drejtë, të gjitha vendet Europiane kanë shprehur gatishmërinë për kompromise dhe konkretisht ta lejojnë SHBA-të që të shtojnë në maksimum praninë e tyre ushtarake në Groenlandë dhe bashkë me NATO-n të sfidojnë Kinën dhe Rusinë në përpjekjet e tyre në atë ishull. Ndaj qysh më 15 janar në Groenlandë shkuan trupat e para ushtarake nga disa vende europiane, për të dhënë mesazhin se Groenlanda nuk shitet, nuk dorëzohet dhe nuk pushthoet.Diplomacia europiane do të bëjë çmos, sepseaneksimi ushtarak i Groenlandës nga SHBA-të do të jetë fundi i NATO-s, me pasoja të paparashikueshme tragjike për Perëndimin.
4. Mesazhe të gabuara! I pari lidhet me praninë e zv.Kryeministres Belinda Balluku më 12 Janar në një takim në Ambasadën amerikane. Madje gafë diplomatike; se ajo është zyrtarisht e pandehur për korrupsion, në një kohë kur SHBA-të dhe Ambasada amerikane në Tiranë ka kohë që po u bien fort kambanave të alarmit për luftën ndaj krimit të organizuar dhe korrupsionit. Në vend të këtyre pranive të pavend, ajo do kishte bërë mirë të kishte dhënë dorëheqjen, pa e detyruar as Kryeministrin ta shkarkonte dhe të mos vononte as një ditë mbledhjen e Komisionit të Mandateve të Kuvendit. Teste dhe sfida të tilla ndaj SHBA-ve në shtëpinë e saj në Tiranë nuk janë fare të nevojshme. E ç’ti thoshte Van hardi Ballukut, t’i tregonte shembullin e Mogherinit apo të zyrtarëve të lartë dhe kongresmeneve amerikanë të cilët, pa pritur të thirren të pandehur japin dorëhqjen; sepse në lojë nuk është emri dhe fati i një zyrtari por i besimit publik të shteti dhe te qeveria. Ne e respektojmë prezumimin e pafajësisë dhe urojmë që ajo të dali e pafajshme, edhe pse dosjet me gjynahet e saj janë bërë mullar.
Mesazhin e dytë të gabuar e dha Kryeministri Rama në ceremoninë për një firmë amerikane fituese të tenderit për Parkun Eologjik në Tropojë, në prani edhe të të Ngarkuarës me Punë të Ambasadës amerikane, Nancy VanHorn. Jashtë çdo logjike dhe etike, aty ku nderohet një kompani amerikane, ai sfidon dhe flet për Kinën që na konsideron si pikë mjalti! Kësaj i thonë Han e shan han e bagdad!
© 2026 Argumentum
