Zv/kryeministrja Belinda Balluku ka prezantuar vendimet e marra sot në mbledhjen e qeverisë.
Ndër të tjera ajo bëri me dije se do të ketë një marrëveshje me Gjermaninë për rindërtimin e ndërtesave publike.
“Sot kemi marrë një vendim për spitalet dhe klinikat mjekësore. Është propozuar nga Ministria e Infrastrukturës dhe Energjisë. Ajo që do të përfitojë është dhe zgjatja e jetëgjatësisë së objekteve. Është miratuar një marrëveshje mes qeverisë dhe GIZ-it për furnizim me ujë, është një marrëveshje që i ofron këtij sektori 1.5 milion euro.
Tjetër marrëveshje ka qenë ajo mes Këshillit të Ministrave dhe fondit shqiptar të Zhvillimit për ndërtesat e vjetra. Është një marrëveshje e rëndësishme pasi do të ndikojë në ndërtimin e shkollave të shkatërruar nga tërmeti i vitit 2019. Do të akordohen 3.5 milionë euro dhe do të ketë shërbime inxhinierie për të gjitha objektet që do të përfshihen në këtë marrëveshje.
Tjetër pikë e rëndësishme është përmirësimi i VKM-së për miratimin rregullave të energjisë elektrike që nuk janë objekt koncesioni. Kemi vendosur të lehtësojmë këto procese duke dhënë aplikime për të pasur një kohë paraprake për studime”, tha ajo.
Balluku: Ushtarët ukrainas do të trajnohen në bazën ajrore në Kuçovë.
Në bazën ajrore të NATO-s në Kuçovë nuk përjashtohet mundësia për të trajnuar ushtarë të Ukrainës. Lajmi është bërë me dije nga zv.kryeministrja, Belinda Balluku, e cila tha se kjo bazë Ajrore është një aset i Shqipërisë, por sigurisht edhe i NATO-s dhe nëse këta të fundit do e shohin të arsyeshme, Shqipëria është gati.
“Baza Ajrore e Kuçovës është një aset e Shqipërisë, por i përket dhe NATO, në koordinim të plotë të NATO nëse shihet e nevojshme dhe e arsyeshme, ne jemi të gatshëm, sa i përket kapaciteteve, i përmbush të gjitha kushtet, ka standarde të larta”, tha Balluku.
Balluku u pyet edhe se kur do të vihet në punë TEC i Vlorës. Në përfundim të mbledhjes së Këshillit të Ministrave, Balluku sqaroi se po vijon puna.
“Ka një plan që të vërë në punë TEC e Vlorës, është punuar në mënyrë intensive, duhet të kuptoni në TEC-in e Vlorës, sistemi i ftohjes ka qenë ndërtuar gabim, ai nuk ka punuar asnjë ditë dhe shteti ka paguar një kredi të marrë dhe nuk është dhënë asnjë përgjigje pse është projektuar keq, ne mësojmë nga gabimet e së shkuarës, ne kemi 2 vite që punojmë për rindezjen e TEC, por jo në kapacitet që ai ka sot, ka qenë 300 mega, ndërsa sot 350 mega në total”, përfundoi Balluku.
Ministri për Evropën dhe Punët e Jashtme, z. Igli Hasani
Në Këshillin e Ministrave sot miratuam disa vendime të cilat lidhet me fushat e përgjegjësisë së Ministrisë për Evropën dhe Punët e Jashtme.
Mbështetur në prioritetet e qeverisë shqiptare për zhvillimin e shpejtë dhe të qëndrueshëm të turizmit në vendin tonë dhe bazuar në statistikat e vitit 2023, ku numri i turistëve ka shënuar një rritje të konsiderueshme, Ministria për Evropën dhe Punët e Jashtme në bashkëpunim me Ministrin e Brendshme kanë propozuar shtrirja kohore dhe përsëritja e së njëjtës listë shtetesh përfituese për këtë sezon. Për këtë arsye sot vendosëm rinovimin e zgjatjes së afatit të hyrjes për qëllime turistike për shtetasit eArabisë Saudite, Bahrejnit, Katarit, Omanit dhe Tajlandës gjatë sezonit veror.
Po kështu, pas ndryshimeve në fushën e përgjegjësisë së MEPJ, ku cështjet e diasporës kanë kaluar edhe ligjërisht në këtë ministri është parë e nevojshme përfshirja e Agjencisë Kombëtare të Diaporës, në varësi të MEPJ.
Kalimi i çështjeve të diasporës në fushën e përgjegjësisë Ministrisë për Evropën dhe Punët e Jashtme ka rritur nivelin e autoritetit shtetëror përgjegjës për marrëdhëniet me diasporën nga niveli i një ministri shteti, në nivel Ministri për Evropën dhe Punët e Jashtme. Ky projektvendim ka si qëllim pikërisht krijimin e një strukture në varësi të Ministrisë për Evropën dhe Punët e Jashtme si Agjencia Kombëtare e Diasporës, për të kryer ato funksione administrative që lidhen me çështjet e diasporës dhe që janë brenda fushës së përgjegjësisë së përgjithshme të MEPJ.
Krijimi i Agjencisë si një institucion varësie në Ministrinë që ka në fushën e saj të përgjegjësisë çështjet e diasporës, diktohet nga nevoja për kryerjen e disa funksioneve të cilat kërkojnë shkallë të lartë specializimi në menaxhim apo drejtim, dhe do të jetë mbështetje e këshillim për këtë ministri.
Qeveria miraton skemën e mbështetjes në Bujqësi, Denaj: Mbi 70 000 fermerë përfitues në 8 sektorë
Qeveria miratoi këtë të mërkurë kriteret e mbështetjes për fermerët përmes skemës kombëtare.
Ministrja e Bujqësisë dhe Zhvillimit Rural, Anila Denaj në përfundim të mbledhjes së qeverisë bëri të ditur se synohet mbështetja e mbi 70 000 fermerëve, që do të mbështeten përmes skemës kombëtare. Sipas Denajt, në fokus do të jetë bashkimi i fermerëve, duke synuar ekonominë e shkallës. Denaj tha se janë 77 % e fermerëve përfitues nga skema e miratuar sot.
“Vitin e kaluar mundësuam 51 milionë dollarë investime për më shumë se 65 000 fermerë. Këtë vit synojmë që fondi të mbështesë mbi 70 000 fermerë. Këtë vit skema kombëtare synon të mbështesë sektorët përmes dy parimeve bazë. Së pari, konsolidimin e sektorit përmes bashkimit, duke synuar që përmes bashkimit të operatorëve të rritet ekonomia e shkallës dhe cilësia e produktit. Dhe përmes kësaj synojmë tregjet elitare në eksportet që janë çdo vit e më të rritura, por dhe një presion gjithnjë e më të shtuar të konsumit të brendshëm duke shfrytëzuar dhe rritjen numrit të turistëve”, tha Denaj.
“Në total janë përcaktuara tetë masa. Së pari, mbështetja për lopët në vlerën 10 000 lekë për krerë, për tufa mbi 10 krerë në fermë. Së dyti, bagëtitë e imta me mbështetje 1 200 për krerë, për tufa mbi 100 krerë për fermë. Mbështetja për bletarinë në vlerën 1000 lekë për zgjua, ku ferma duhet të ketë të paktën 50 zgjoje. Mbështetje për perimet, luleshtrydhet dhe rrushi në tavolina sera me vlerën 200 000 lekë për hektarë, por jo më shumë se dy sezone dhe jo më pak se 1 hektarë fermë. Kemi një produkt të ri, bimët mjekësore aromatike, 30 000 lekë për hektarë dhe jo më pak se një hektar të kultivuar. Nafta për bujqësinë do të vazhdojë me të njëjtat kritere, që s’do të mundësohet me naftë të dhëna me bidona apo kartë, por lekë në llogari”, tha Denaj.
“Mbështetej për certifikimin e fermave organike, që ka qenë dhe do vazhdojë të jetë edhe në vitin 2024 sipas standardeve ndërkombëtare”, tha Denaj.
Denaj tha se “prioritet do të kenë aplikuesit që do janë anëtarë të një shoqërie të bashkimit bujqësor, ose bashkim operatorësh me të paktën shtatë anëtarë. Përjashtim bën rasti i serrave, do të jetë katër numri minimal i anëtarëve. Prioritet pra do të jetë për aplikuesit që vijnë si bashkësi operatorësh në të dy format dhe pjesa tjetër do të shpërndahet në mënyrë të barabartë për pjesën tjetër të aplikantëve që plotësojnë kriteret”.
/Argumentum.al
