Ministri i Tregtisë i Kinës Wang Wentao dhe Komisioneri Evropian për Tregtinë dhe Sigurinë Ekonomike Marosh Shefçoviç zhvilluan bisedime në Paris më 3 qershor mbi çështjet tregtare, si tarifat antisubvencion të BE-së për automjetet elektrike kineze, hetimin antidumping të Kinës për brendin me origjinë nga BE-ja dhe politikat e kontrollit të eksportit, bëri të ditur të shtunën një zëdhënës i Ministrisë së Tregtisë të Kinës.
Të dyja palët zhvilluan diskutime të sinqerta e të thella mbi çështjet urgjente dhe të rëndësishme, duke përfshirë ato të mësipërme, dhe udhëzuan ekipet e tyre të punës të shtojnë përpjekjet për të bërë përgatitje ekonomiko-tregtare për agjendën e rëndësishme midis Kinës dhe BE-së këtë vit, tha zëdhënësi.
Foto nga VCG
Ata zhvilluan një diskutim profesional dhe të thelluar mbi çështjen e automjeteve elektrike, duke hedhur një hap të rëndësishëm në drejtimin e duhur lidhur me zgjidhjen e problemit, deklaroi Ministria.
Negociata të angazhimit mbi çmimet për automjetet elektrike kanë hyrë në fazën përfundimtare, por përpjekje të mëtejshme nga të dyja palët janë ende të nevojshme. BE-ja propozoi gjithashtu eksplorimin e rrugëve të reja teknike, të cilat Kina do t’i vlerësojë për zbatueshmërinë nga anët ligjore dhe teknike, sipas Ministrisë.
Të dyja palët i udhëzuan ekipet e tyre të punës të shtojnë përpjekjet për të gjetur zgjidhje të pranueshme reciprokisht në një mënyrë që përputhet me dispozitat e tyre ligjore përkatëse dhe rregullat e OBT-së, dhe për t’i zgjidhur mosmarrëveshjet tregtare në mënyrën e duhur.
Lidhur me rastin e brendit, të dyja palët patën një diskutim “miqësor dhe të sinqertë”, bëri të ditur Ministria. Ndërmarrjet franceze dhe shoqatat përkatëse i kanë paraqitur palës kineze kërkesa lidhur me angazhimin për çmimet dhe kanë arritur një marrëveshje me autoritetet hetimore kineze mbi kushtet kryesore.
Kina po shqyrton tekstin e plotë të angazhimeve për çmimet dhe, nëse ato do ta kalojnë këtë proces shqyrtimi, njoftimi përfundimtar i vendimit duhet të publikohet para 5 korrikut.
Foto nga VCG
Kina ka treguar plotësisht sinqeritetin e saj në zgjidhjen e mosmarrëveshjeve tregtare me BE-në përmes dialogut dhe konsultimit. Ajo gjithashtu shpreson që BE-ja do të punojë në të njëjtin drejtim me Kinën, do t’i tratojë shqetësimet e Kinës siç duhet dhe do të krijojë kushte për zgjerimin e mëtejshëm të bashkëpunimit, tha zëdhënësi.
Kreu i dikasterit kinez të Tregtisë Wang Wentao i sqaroi palës së BE-së politikat e kontrollit të eksportit të Kinës, duke theksuar se zbatimi i kontrolleve të eksportit mbi mineralet e rralla dhe elemente të tjera është një praktikë e zakonshme ndërkombëtare, sipas zëdhënësit.
Kina u kushton rëndësi të madhe shqetësimeve të palës europiane dhe është e gatshme të krijojë një kanal të gjelbër për aplikimet përkatëse dhe të përshpejtojë procesin e miratimit, tha Ministria.
Wang shprehu shpresën se pala e BE-së do të punojë në të njëjtin drejtim me Kinën dhe do të marrë masa efektive për të lehtësuar, garantuar dhe promovuar tregtinë me Kinën, në përputhje me rregullat e produkteve të teknologjisë së lartë, sipas zëdhënësit./cgtn
