Eksperti i sigurisë, Agim Musliu, në një postim në rrjetet sociale ka komentuar vendimin për moscertifikimin e Listës Serbe për zgjedhjet e ardhshme, duke theksuar se kjo nuk përbën një padrejtësi, por është pasojë e veprimeve të vazhdueshme antikushtetuese të këtij subjekti politik.
Sipas Musliut, Lista Serbe po përpiqet të paraqitet si viktimë, por në fakt është vetë fajtore për situatën në të cilën ndodhet. “Që nga dita e parë, ajo ka vepruar kundër shtetit të Kosovës dhe institucioneve të tij, gjithmonë duke ndjekur direktivat e Beogradit”, shprehet Musliu.
Ai thekson se ky subjekt ka bllokuar ligje, ka sabotuar procese integruese, është përfshirë në barrikada dhe në akte të dhunës të organizuar në veri të vendit. Sipas tij, udhëheqësi real i Listës Serbe, Milan Radoiçiq, ka qenë organizatori i sulmit terrorist në Banjskë, ndërsa drejtues të tjerë kanë marrë pjesë në veprime të dhunshme dhe aktivitete kriminale.
Musliu nënvizon se një subjekt me një histori të tillë nuk duhet të trajtohet si parti politike. “Komunikatat e tyre flasin vetë – e mohojnë shtetin e Kosovës duke përdorur termin ‘Kosova e Metohija’, kërkojnë që njësi të Policisë së Kosovës të shpallen terroriste, ndërkohë që heshtin për krimet e kryera nga kriminelët serbë ndaj vetë serbëve të Kosovës, madje edhe me viktima”, shton ai.
Në përfundim, eksperti i sigurisë thekson se nuk mund të pritet certifikim e legjitimitet nga një subjekt që për vite me radhë ka dëshmuar se nuk e njeh shtetin ku kërkon të marrë pjesë në zgjedhje.
Postimi i plotë:
Moscertifikimi i Listës Serbe, pasojë e veprimeve të saj antikushtetuese
Lista Serbe po paraqitet si viktimë, por e vërteta është se vetë e ka sjellë veten në këtë pozitë.
Që nga dita e parë ka punuar kundër Kosovës dhe institucioneve të saj, gjithmonë sipas udhëzimeve të Beogradit. Ka bllokuar ligje, ka sabotuar proceset integruese, është përfshirë në barrikada dhe madje udhëheqësi i saj real organizoi sulmin terrorist në Banjskë.
Drejtuesit e saj kanë qenë në barrikada dhe në dhunën e organizuar në veri, ndërsa kryetari faktik i saj, terroristi Milan Radoiçiq, udhëhoqi sulmin terrorist në Banjskë.
Asnjë subjekt tjetër me histori të tillë kriminale, terroriste dhe sabotuese nuk do të duhej të trajtohej si parti politike! Vetë komunikatat e tyre e tregojnë qartë se e mohojnë Kosovën duke e quajtur ende ‘Kosova e Metohija’, duke kërkuar që njësi të Policisë të shpallen terroriste, ndërkohë që për vite të tëra kanë hesht para kriminelëve serbë që kanë terrorizuar serbet e Kosoves, madje edhe me viktima.
Nuk mund të presësh certifikim e legjitimitet kur me vite e ke dëshmuar se nuk e njeh shtetin në të cilin do të marrësh pjesë në zgjedhje.
Andaj, mendoj qe moscertifikimi i Listes Serbe nuk është padrejtësi ndaj tyre
KQZ nuk e certifikon Listën Serbe për zgjedhjet lokale të 12 tetorit
Kujtojmë se Komisioni Qendror i Zgjedhjeve (KQZ) i Kosovës nuk e ka certifikuar sot Listën Serbe – subjektin më të madh politik të serbëve të Kosovës – për pjesëmarrje në zgjedhjet lokale të 12 tetorit, duke nxitur reagime të menjëhershme nga Serbia, e cila e ka dënuar ashpër këtë vendim.
Vendimi u mor në mbledhjen e pasdites së së enjtes, ku rekomandimi për certifikimin e Listës Serbe mori vetëm dy vota për, dy kundër dhe shtatë abstenime nga anëtarët e KQZ-së.
Lista Serbe, e cila ka mbështetjen e hapur të Beogradit, ka të drejtë të ankohet kundër këtij vendimi në Panelin Zgjedhor për Ankesa dhe Parashtresa (PZAP). Sipas disa njohësve të çështjeve ligjore, PZAP mund të vendosë ta rrëzojë këtë vendim të KQZ-së, ashtu siç kishte vepruar edhe më herët në rastin e zgjedhjeve parlamentare, kur Listës Serbe i ishte mundësuar pjesëmarrja pas një vendimi fillestar për moscertifikim.
Dy anëtarët e KQZ-së nga Lëvizja Vetëvendosje, Sami Kurteshi dhe Alban Krasniqi, ishin të vetmit që votuan hapur kundër certifikimit të Listës Serbe, duke theksuar qëndrimet e tyre kundër lejimit të pjesëmarrjes së këtij subjekti në zgjedhje.
/Argumentum.al
