Është ndarë sot nga jeta në moshën 64-vjeçare publicisti, analisti dhe mendimtari i njohur Artur Zheji, si pasojë e një arresti kardiak të ndodhur në Sarandë. Sipas njoftimit zyrtar të policisë, ai është ndjerë keq rreth orës 16:10 dhe ka ndërruar jetë gjatë transportit për në spital.
I lindur më 29 gusht 1961 në Tiranë, Artur Zheji rridhte nga një familje me rrënjë të thella kulturore. Ishte djali i gjuhëtarit të njohur Petro Zheji dhe aktores Besa Imami, dhe nip i studiuesit Gjergj Zheji. Kjo trashëgimi intelektuale ndikoi në formimin e tij si një nga zërat më të artikuluar dhe reflektues të jetës publike në Shqipëri.
Gjatë karrierës së tij shumëvjeçare, Artur Zheji ka kontribuar në disa nga institucionet kryesore mediatike të vendit, duke mbajtur pozicione të rëndësishme si drejtues në Radio Televizionin Shqiptar dhe Agjencinë Telegrafike Shqiptare, si dhe kryeredaktor i gazetës “Mapo”. Ai u bë i njohur për publikun e gjerë përmes emisionit televiziv “360 Gradë”, ku solli debate të thella dhe këndvështrime të guximshme mbi realitetin politik e shoqëror.
I njohur për analizat e tij të thelluara, për integritetin profesional dhe për kurajën për të thënë të vërtetën, Zheji ka qenë mentor për breza të rinj gazetarësh dhe një zë i rëndësishëm në debatin publik shqiptar.
Humbja e tij përbën një boshllëk të ndjeshëm në median shqiptare dhe në jetën intelektuale të vendit.
Redaksia e ARGUMENTUM shpreh ngushëllimet më të sinqerta për ndarjen e parakohshme nga jeta të gazetarit dhe intelektualit Artur Zheji.
Një figurë e spikatur e mendimit të lirë, me penë të mprehtë dhe kontribut të çmuar në median dhe gazetarinë shqiptare,
Ngushëllimet tona më të ndjera familjes, miqve dhe kolegëve të tij.
U prehtë në paqe.
