Ministria e Drejtësisë, në bashkëpunim me grupin e punës për hartimin e Kodit të ri Penal, zhvilloi sot tryezën e dytë të prezantimit teknik të draftit të Kodit të ri Penal, përpara fillimit të konsultimeve të gjera publike që do të zhvillohen për këtë draft.
Në fjalën e tij ministri i Drejtësisë Ulsi Manja bëri të ditur se për draftin e Kodit të ri Penal janë parashikuar që të zhvillohen rreth 25 tryeza konsultimi publik. Ministri shtoi se Shqipëria do të ketë një Kod të ri Penal vetëm pasi të marrë aprovimin nga Brukseli.
Manja theksoi gjithashtu edhe rolin e Ministrisë së Drejtësisë në këtë proces ka qenë ai i porositësit të hartimit të draftit të ri të Kodit Penal të vendit.
“Që nga 25 korriku e deri tani ka patur mjaft komente, analiza, debate, diskutime, por edhe shqetësime për aspekte të veçanta teknike të vetë draftit, por edhe të procesit të ndjekur dhe rolit të Ministrisë së Drejtësisë në këtë proces.
“Kemi mbajtur shënime të gjitha komentet, analizat, sugjerimet, shqetësimet, por për hir të së vërtetës nga momenti i publikimit të draftit në faqen e Ministrisë së Drejtësisë, deri më tani kanë ardhur numër shumë i vogël komentesh dhe janë disa organizata të shoqërisë civile që kanë kërkuar të jenë pjesë e konsultimit publik dhe dëshirojnë të marrin pjesë në diskutime.
“Roli i Ministrisë së Drejtësisë në këtë proces është ai i porositësit të draftit të Kodit të ri penal të Republikës së Shqipërisë. Ministria e Drejtësisë në emër të qeverisë shqiptare kemi porositur këtë draft edhe si përmbushje e detyrimeve tona në kuadër të strategjisë ndersektoriale të drejtësisë por edhe procesit të negociatave me BE-në”, tha Manja.
Në fjalën e tij Manja bëri një kronologji të punës për hartimin e drafti të ri të Kodit Penal. Manja tha se për shkak të ndryshimeve të shumta që ka pësuar Kodi i Penal ndër vite, por edhe për shkak të direktivave të BE-së, është konkluduar se duhet hartuar një draft i ri.
“Në procesin e hartimit apo draftimit të ligjeve, ka dy rrugë ose nëpërmjet Drejtorisë së Kodifikimit dhe Legjislacionit që kemi në Ministrinë e Drejtësisë ose nëpërmjet grupit të punës së ekspertëve të fushës të kontraktuar nga Ministria e Drejtësisë. Kemi zgjedhur këtë të dytën edhe për shkak të rëndësisë që ka hartimi i Kodit të ri Penal në jetën politike, juridike dhe ekonomikë të një vendi.
“Sa i takon procesit, pas reformës në drejtësi në vitin 2017 është miratuar strategjia ndërsektoriale e drejtësisë 2017-2020, strategji e cila përcaktoi objektivat për 4 vite në fushën e drejtësisë. Në pikën 4 thuhet që Shqipëria merre përsipër përmirësimin e legjislacionit penal në përputhje me standardet evropiane. Kjo u mbart edhe në dy strategjitë e tjera 2021-2025 dhe 2024-2030.
“Për shkak të ndryshimeve të shumta që kishte pësuar kodi që nga 1995, por edhe për shkak të reflektimit të një mase të konsiderueshme të direktivave të BE-së sa i takon fushës penale është konkluduar se duhet hartuar një draft i ri penal”, tha Manja.
Manja bëri të ditur se pjesa e përgjithshme e Kodit të ri Penal është materializuar gjatë vitit 2020 nga një grup pune që e ka kryesuar Arben Rakipi.
Sipas ministrit këtij grupi pune i janë bashkëngjitur herë pas here ekspertë të caktuar të fushës qoftë nga avokatia, gjykata, prokuroria dhe ekspertë të lirë.
“Pjesa e përgjithshme është finalizuar me një tryezë të rrumbullakët më 23.10.2020 me pjesëmarrës të grupit të punës dhe drejtuesve të KLGJ, KLP, SPAK, BKH, nga gjykata si dhe drejtues të prokurorive”, tha Manja.
Manja tha se drafti i hartuar i është përcjellë për mendim edhe disa ekspertëve italianë të cilët janë kërkuar nga Ministria e Drejtësisë për të dhënë opinion në lidhje me pjesën e përgjithshme të draftit të Kodit Penal.
“Ekspertët e kanë konkluduar opinionin e tyre me një raport të korrikut 2021 të cilën e ka patur në dispozicion grupi i punës për hartimin e draftit të Kodit Penal”, tha Manja.
Manja shtoi se “gjatë kësaj periudhe është vijuar edhe me hartimin e pjesës së posaçme të Kodit Penal dhe në vitin 2023 kam ngritur një grup pune jo për të shkruar Kodin e ri Penal, por për të bërë një vlerësim në disa indikator të draftit të shkruar të Kodit Penal qoftë të përgjithshme ashtu dhe të posaçme”.
Ministri nënvizoi se grupit të punës i është lënë afat deri në fund të tetorit 2023, teksa shtoi de Shqipëria në kuadër të negociatave duhet të ketë një Kod të ri Penal deri në fund të vitit 2026.
“Na duhet të kapim edhe axhendën tonë të negociatave dhe të integrimit me BE-në, sepse dihet fare mirë që Shqipëria do të duhet të ketë një Kod të ri Penal në fund të 2026-ës”, tha Manja.
Manja theksoi se gjatë periudhës shkurt-tetor është rishikuar drafti nen për nen.
“Janë kryer rreth 40 takime me ekspertë të fushave të ndryshme me qëllim diskutimin teknik nen për nen të draftit. Drafti është dorëzuar në Ministrinë e Drejtësisë, për të vijuar më tej punën drejtoria e Kodifikimit pranë Ministrisë së Drejtësisë, për të bërë një vlerësim të 54 direktivave që përmbajnë veprave penale të BE-së dhe tabelat e përputhshmërisë si detyrim që ne e kemi në procesin e përfarimit të legjislacionit”, tha Manja.
Manja shtoi se ky është procesi i një proces që ka filluar që në 2019 dhe kemi të bëjmë me një draft të Kodit Penal që ka marrë një kohë të madhe të shkrimit dhe hartimit të tij si draft.
“Roli ynë si Ministri e Drejtësisë ka qenë i porositësit të draftit në emër të qeverisë shqiptare. Do të vazhdojmë ta përmbushim këtë rol deri ditën që drafti i Kodit të ri Penal do të hyjë në procedurë parlamentare”, tha Manja.
Manja nënvizoi se drafti i Kodit të ri Penal do t’i nënshtrohet një konsultimi të gjerë dhe është parashikuar që të zhvillohen rreth 25 tryeza.
“Ky draft i Kodit të ri Penal do t’i nënshtrohet një konsultimi të gjerë publik dhe është menduar të ketë rreth 25 tryeza të konsultimit publik në lidhje me draftin e ri të Kodit Penal, duke përfshirë dhe aspekte të veçanta të këtij kodi me tematika të veçanta në lidhje me grup veprash”, tha Manja.
Ministri shtoi se Shqipëria do të ketë një Kod të ri Penal vetëm pasi të marrë “vulën” në Bruksel.
“Shqipëria do të ketë një Kod të ri Penal vetëm pas në procesi të gjerë të konsultimeve publike të brendshme dhe vetëm pasi të marrë “vulën” në Bruksel, sepse Shqipëria e ka të qartë destinacionin e saj, mbylljen e negociatave brenda 2027-ës dhe anëtarësimin e Shqipërisë në BE brenda 2030-ës, dhe sigurisht, ky kod do të jetë një kod ekuivalent siç janë të gjitha kodet penale moderne të BE-së.
Ne do të kemi një Kod të ri Penal të dakordësuar plotësisht me Brukselin. Kjo tryezë sot vlen për të qartësuar edhe aspekte të tjera teknike të Kodit, me qëllim që procesi i konsultimit publik të jetë një proces i qartë, dhe pse jo në përfundim të procesit komentet të jenë një vlerë e shtuar për të pasuruar këtë draft me standardet më të mira evropiane”, tha Manja
