Shqiptarë nga e gjithë bota u mblodhën sot në protestën e thirrur në orën 14:00 në mbështetje të ish-krerëve të UÇK-së të cilët po gjykohen në Dhomat e Specializuara për krime gjatë luftës.
“Nderim për ata që luftuan për të ardhmen tonë”, “Drejtësi për heronjtë e popullit tim”, dhe “Pesë vjet në gjykim, liria nuk duhet askund, padrejtësia nuk mund të zgjasë përgjithmonë – liri tani”, ishin disa nga pankartat në gjuhën angleze.
Protesta e 14 shtatorit u thirr nga mërgata shqiptare dhe u mbështet nga Organizata e Veteranëve të Luftës së UÇK-së (OVL-UÇK).
Mediet raportuan se protestuesit gjatë grumbullimit kaluan edhe pranë ndërtesës së Gjykatës Speciale, për të vazhduar në lokacionin ku është parashikuar të mbahet protesta.
Pamjet tregojnë edhe forca të shtuara të sigurisë të autoriteteve holandeze, ku po ashtu janë vendosur edhe bllokada nëpër rrugët ku do të kalojnë protestuesit.
Mijëra protestues u mblodhën në vendin e caktuar ku do të zhvillohet protesta ku sipas pamjeve të KosovaPress, 500 protestues ishin mbledhur për më shumë se dy orë para nisjes së protestës.
Ish-veteranë dhe qytetarë nga shumë vende të botës, Kosova, Lugina e Preshevës, Maqedonia e Veriut, Shqipëria, Amerika dhe vende të tjera europiane, ishin të pranishëm në Hagë, në protestën e thirrur në mbështetje të ish-krerëve të UÇK-së
Protesta ishte paralajmëruar të jetë masive për shkak të interesimit të madh të shqiptarëve nga vende të ndryshme të botës.
Para protestuesve morën fjalën disa përfaqësues të veteranëve të luftës.
Kreu i OVL-UÇK, Hysni Gucati u bëri thirrje ndërkombëtareve që të mos i mbyllin sytë para siç tha ai padrejtësive. Ai tha se çlirimtarët nuk duhet të gjykohen si kriminelë.
Përfaqësuesi i Këshillit të Protestës për Evropë, Fatmir Koci deklaroi para protestuesve se sot janë mbledhur për të ngritur zërin për të thënë “mjaft me padrejtësi”.
“Po përballemi me një padrejtësi të pafalshme. Shteti serb nuk ka dhënë asnjë llogari për krimet e kryera”, tha ai.
Në Speciale rasti kryesor po zhvillohet kundër ish-krerëve të UÇK-së, përkatësisht ndaj ish-presidentit Hashim Thaçi, ish-kryeparlamentarëve Kadri Veseli dhe Jakup Krasniqi dhe ish-deputetit të Kosovës, Rexhep Selimi. Ata akuzohen për krime lufte dhe krime kundër njerëzimit, të cilat i kanë hedhur poshtë të katërt.
/Kosovapress/
