Tirana mikpriti Konferencën e 28-të të Shefave të Shtabit të Përgjithshëm të Kartës së Adriatikut (SHBA-A5) që u bashkëkryesua nga shefi i Shtabit të Përgjithshëm i FA të Shqipërisë, gjenerallejtënant Arben Kingji, shefi i Shtabit të FA të Bosnje-Hercegovinës gjenerallejtënant Gojko Knezevic dhe komandanti i Komandës Amerikane në Evropë, gjeneral Alexus G. Grynkewich.
Punimet e kësaj konference, e cila zhvillohet për të dytin vit radhazi në vendin tonë, i përshëndeti ministri i Mbrojtjes Pirro Vengu, i cili theksoi vendosmërinë e Shqipërisë për të mbetur një partner i besueshëm dhe ndërtues konsensusi në rajon si dhe për të forcuar rolin e saj në sigurinë euroatlantike.
Vengu u shpreh se, “Karta e Adriatikut ka lindur nga një vizion bashkëpunimi, stabiliteti dhe fati i përbashkët euro-atlantik”.
“Parimet e saj mbeten të pandryshuara, por në një mjedis strategjik që ndryshon me shpejtësi ne duhet të përshtatemi dhe të ripërtërijmë misionin e saj”, tha Vengu.
Për Shqipërinë, shtoi ministri, “Karta nuk është thjesht një iniciativë tjetër rajonale, pasi kemi shumë, por është një nxitës i bashkëpunimit praktik dhe qëndrueshmërisë kolektive”.
Vengu theksoi se, pjesëmarrja e SHBA e bën një iniciativë shumë të rëndësishme.
“Vendimet e marra në Samitin e Hagës na japin një mundësi unike për të marrë përsipër më shumë përgjegjësi, për sigurinë tonë rajonale dhe për të marrë përsipër më shumë përgjegjësi brenda NATO-s dhe BE-së”, u shpreh Vengu.
Ministri nënvizoi se, “për të mbetur të rëndësishëm dhe të besueshëm duhet të veprojmë me vendosmëri në pesë fusha kyçe: Rritja e burimeve financiare për buxhetet tona të mbrojtjes; Zgjerimi i industrisë tonë të mbrojtjes dhe të prodhimit ushtarak; Fitim aftësish vdekjeprurëse dhe me përdorim të dyfishtë për të modernizuar Forcat tona të Armatosura; Investimi i në infrastrukturën kritike dhe kapaciteti i vendeve pritës për të forcuar qëndrueshmërinë dhe forcimi i ndërveprimit me aleatët dhe partnerët përmes trajnimeve dhe operacioneve”.
Vengu theksoi se, “Shqipëria po ecën me vendosmëri në këtë rrugë duke rritur shpenzimet e mbrojtjes, duke rigjallëruar bazat tona industriale, duke investuar në infrastrukturë në përputhje me prioritetet e NATO-s dhe të BE-së”.
“Qëllimi ynë është ta pozicionojmë Shqipërinë si një qendër të besueshme për industrinë e mbrojtjes, zinxhirët e furnizimit, lidhshmërinë dhe ndërveprimin ushtarak, lëvizshmërinë ushtarake në të gjithë Evropën Juglindore dhe rajonin e Adriatikut dhe në hapësirën me rëndësi të pamohueshme strategjike për sigurinë atlantike”, tha ai.
Në këtë kontekst, shtoi Vengu, “besojmë se NATO dhe BE-ja duhet të mbështesin vendosmërinë politike, vigjilencën strategjike dhe angazhimin ushtarak në rajonin tonë”.
“Shqipëria mbetet e përkushtuar ndaj pajtimit, stabilitetit dhe bashkëpunimit dhe kjo është arsyeja se pse rreth 500 trupa tona në misionet tona të NATO-s dhe BE-së janë të dislokuara në KFOR, në ALTHEA. Ndërsa kontributet tona në Letoni dhe Bullgari sinjalizojnë se ne i marrim seriozisht edhe kërcënimet në krahun lindor të NATO-s”, tha Vengu.
Sa i përket Ukrainës, ministri shtoi se, Shqipëria do të vazhdojë mbështetjen politike dhe kontributet ushtarake.
Në përfundim të punimeve, shefat e Shtabit të Përgjithshëm nënshkruan Deklaratën e Përbashkët, ku theksohet rëndësia e bashkëpunimit rajonal, forcimit të kapaciteteve të përbashkëta dhe rritjes së sigurisë euroatlantike. Dokumenti parashikon angazhime konkrete për rritjen e investimeve në mbrojtje, modernizimin e forcave, sigurinë kibernetike dhe zhvillimin e stërvitjeve të përbashkëta, duke theksuar gjithashtu rëndësinë e përfshirjes së plotë të Kosovës si pjesë natyrale e kësaj nisme rajonale.
Në takim morën pjesë përfaqësuesit e vendeve nënshkruese të Kartës (SHBA, Shqipëria, Bosnje-Hercegovina, Kroacia, Mali i Zi, Maqedonia e Veriut), vendet me status vëzhgues (Kosova dhe Sllovenia), përfaqësues nga Gardat Kombëtare të SHBA dhe shtetet partnere të Programit të Partneritetit Shtetëror, si dhe zëvendëskomandanti i Komandës së Forcës së Bashkuar të NATO në Napoli.
/Argumentum.al
