Në ambientet e Pallatit të Kongreseve në Tiranë më 16 shtator u çel zyrtarisht Java Kulturore e Arabisë Saudite, një ngjarje e veçantë që synon të forcojë lidhjet kulturore e miqësore mes Shqipërisë dhe Mbretërisë Saudite përmes ekspozitave, muzikës, artizanatit dhe shkëmbimeve artistike.
Në ceremoninë e hapjes morën pjesë ministri në detyrë i Ekonomisë, Kulturës dhe Inovacionit, Blendi Gonxhja, dhe ambasadori i Arabisë Saudite në Shqipëri, Faisal Ghazi Hifzi, të cilët u shprehën me fjalë të ngrohta për rëndësinë e kësaj ngjarjeje dhe perspektivat që ajo hap për marrëdhëniet mes dy vendeve.
Ministri Gonxhja, duke u ndalur te rëndësia e kësaj jave kulturore, theksoi se ajo përbën një mundësi të jashtëzakonshme për të zbuluar thellësinë e kulturës saudite dhe për të ndërtuar ura bashkëpunimi të qëndrueshme në fushat e kulturës, turizmit dhe arsimit. Ai e përshkroi këtë ngjarje si një “laborator ku miqësia përkthehet në përvojë dhe shije të përbashkët”, duke nënvizuar rëndësinë e dialogut dhe bashkëpunimit ndërkulturor.
“Ky instalacion imersiv është një nder, një kureshtje, një shtysë shumë e madhe për bashkëpunime të mëtejshme,” tha ministri Gonxhja, duke theksuar se kjo është një mundësi për të lidhur marrëveshje të rëndësishme dhe për të mësuar nga një vend që është ekspert dhe eksperimentues në fushën e zhvillimit kulturor, duke ruajtur njëkohësisht traditat e tij.
Ai vuri në pah rëndësinë e turizmit si kapital të madh në bashkëpunimin mes dy vendeve:
“Shqipëria, me mbi 10 milionë vizitorë në vit, po bëhet një destinacion i rëndësishëm mesdhetar. Në këtë kuadër, Arabia Saudite me Vision 2030, ku po investon miliarda për ta bërë turizmin motor kryesor të ekonomisë së saj, vjen me shembuj suksesi për t’u ndjekur.”
Ministri Gonxhja u shpreh optimist se bashkë skuadrat shqiptare dhe saudite do të mund të ndërtojnë ura të reja bashkëpunimi në shumë fusha: nga restaurimi i monumenteve dhe muzeve, te organizimi i festivaleve kulturore, shkëmbimet artistike dhe programet për studentë dhe sipërmarrës të rinj.
“Mund të mësojmë shumë nga përvoja e tyre në zhvillimin e projekteve kulturore me dimensione të mëdha dhe të ndajmë me ta bukurinë e trashëgimisë sonë,” përfundoi ministri.
Fjala e ambasadorit Faisal Ghazi Hifzi: Kultura si urë lidhëse dhe themel për dialog ndërkulturor
Në fjalën e tij përshëndetëse, ambasadori i Arabisë Saudite në Shqipëri, Faisal Ghazi Hifzi, theksoi se kultura është një urë lidhëse mes popujve, duke reflektuar thellësinë e marrëdhënieve historike dhe miqësisë së ngushtë mes Mbretërisë së Arabisë Saudite dhe Republikës së Shqipërisë.
Ai nënvizoi rëndësinë e trashëgimisë kulturore të pasur të Arabisë Saudite dhe diversitetin artistik që e karakterizon atë, duke përmendur rëndësinë e Vision 2030 në promovimin e kulturës si një nga shtyllat kryesore të zhvillimit të vendit.
“Kjo javë kulturore, me ekspozitat, shfaqjet artistike dhe programet muzikore tradicionale që sjell, hap një dritare drejt një kulture autentike, e orientuar kah e ardhmja,” tha ambasadori, duke shtuar se kultura është themeli i dialogut ndërkulturor dhe një mjet i fuqishëm për ndërtimin e urave të miqësisë mes popujve.
Ambasadori falënderoi qeverinë shqiptare për mikpritjen e ngrohtë dhe bashkëpunimin e frytshëm me Ministrinë e Kulturës në organizimin e kësaj jave, duke e cilësuar këtë ngjarje si një mundësi të jashtëzakonshme për njohje më të thellë dhe afrimitet kulturor midis dy vendeve.
“Po ashtu, më lejoni të përcjell përshëndetjet dhe vlerësimin e Qeverisë së Mbretërisë së Arabisë Saudite për Republikën e Shqipërisë – për Qeverinë dhe popullin e saj mik – për mikpritjen bujare të këtij aktiviteti dhe partneritetin e frytshëm me Ministrinë e Kulturës së Shqipërisë në realizimin e tij,” përfundoi ambasadori.
Java Kulturore e Arabisë Saudite në Shqipëri nisi me një program të gjallë që pasqyron përkushtimin e Mbretërisë për të festuar trashëgiminë kulturore dhe dialogun kulturor global. Në Pallatin e Kongreseve u hap një ekspozitë e dorëshkrimeve arabe të rralla, të cilat përbëjnë një pasuri të çmuar të ruajtur me kujdes në bibliotekat saudite.
Në Këndet e Punimeve Artizanale, artizanët sauditë demonstruan mjeshtërinë e tyre duke prezantuar teknikat tradicionale dhe duke ofruar mundësinë për të mësuar mbi trashëgiminë kulturore të vendit.
Për më tepër, ekspozita e instrumenteve muzikore tradicionale dhe performancat e përbashkëta mes muzikantëve sauditë dhe shqiptarë krijuan një atmosferë të veçantë bashkëpunimi artistik.
Në ditët në vijim, vizitorët do të kenë mundësi të shijojnë produktet tradicionale të Arabisë Saudite, të ndjekin shfaqje filmash të shkurtër që tregojnë larminë dhe pasurinë kulturore të rajoneve të ndryshme saudite, si dhe koncerte nga artistë të njohur.
Java Kulturore e Arabisë Saudite, që do të vazhdojë deri më 20 shtator 2025, është organizuar me mbështetjen e Ministrisë së Ekonomisë, Kulturës dhe Inovacionit dhe përfaqëson një hap të rëndësishëm në forcimin e marrëdhënieve dypalëshe midis Shqipërisë dhe Arabisë Saudite.
Kjo ngjarje shërben si një platformë e fuqishme për promovimin e dialogut kulturor, shkëmbimin artistik dhe zhvillimin e projekteve të përbashkëta në fushat e kulturës, turizmit dhe arsimit, duke hapur rrugën për bashkëpunime të mëtejshme me dimensione të gjera dhe strategjike.
/Argumentum.al
