Lëvizja VETËVENDOSJE! ka reaguar me kritika të ashpra ndaj qëndrimeve të Kryeministrit të Shqipërisë, Edi Rama, lidhur me protestat në Tiranë për mbështetje të ish-krerëve të Ushtrisë Çlirimtare të Kosovës që po gjykohen nga Gjykata Speciale në Hagë. Në një deklaratë të drejtpërdrejtë, VETËVENDOSJE! e akuzon Ramën për hipokrizi politike dhe mungesë të përgjegjësisë ndërkombëtare.
“Para se të protestojnë në sheshe, disa politikanë duhet të tregojnë pendesë për qëndrimet që i kanë mbajtur më parë. Edi Rama ishte ndër më të zëshmit për themelimin e Gjykatës Speciale – dhe këtë e bëri pikërisht në Kosovë,” thuhet në reagimin e Lëvizjes.
Sipas VETËVENDOSJE!-s, Kryeministri Rama kishte ardhur me helikopter në Kosovë më 2015 për të ushtruar presion politik që të votoheshin ndryshimet kushtetuese për krijimin e kësaj gjykate, e cila sot po ndjek penalisht ish-udhëheqës të UÇK-së për krime lufte.
“Institucionet e Shqipërisë, si anëtare e OKB-së, Këshillit të Evropës, OSBE-së dhe NATO-s, kanë detyrim të flasin në këto forume për drejtësinë dhe të vërtetën e luftës sonë, jo në sheshin ‘Skënderbej’,” thekson Lëvizja.
Lëvizja përsërit qëndrimin e saj historik ndaj Gjykatës Speciale, të cilën e ka kundërshtuar që nga themelimi:
“Qëndrimi ynë mbetet i pandryshuar: UÇK-ja nuk ka qenë kurrë ndërmarrje kriminale. Pretendimi i Prokurorisë është i padrejtë. Serbia është ajo që duhet të gjykohet për gjenocid dhe krime të luftës.”
Reagimi i plotë i Lëvizjes VETËVENDOSJE!
Lëvizja VETËVENDOSJE! qëndron në krah të të gjithë qytetarëve që protestojnë e kërkojnë drejtësi për ish-krerët e Ushtrisë Çlirimtare të Kosovës në Tiranë. Qëndrimi ynë për Gjykatën Speciale mbetet i pandryshuar.
Kujtojmë se Gjykata Speciale nuk erdhi vetvetiu, por nisi që në vitin 2008 nga një rezolutë e propozuar në Këshillin e Evropës nga kryesuesi i deputetëve të Federatës Ruse në Asamblenë Parlamentare të Këshillit të Evropës, Konstantin Kosachev, por që u miratua si rezolutë me propozim të senatorit Dick Marty në vitin 2011.
Lufta e Ushtrisë Çlirimtare të Kosovës ka qenë e drejtë dhe e domosdoshme. Në anën tjetër, pretendimi i Prokurorisë se brenda UÇK-së ka ekzistuar një grup kriminal është i pasaktë dhe i padrejtë. UÇK-ja nuk ka qenë ndërmarrje kriminale dhe nuk ka pasur struktura të tilla. Përkundrazi, për krime të luftës duhet të gjykohet Serbia, ajo është shkaktarja e gjenocidit dhe krimeve masive e sistematike ndaj popullit të Kosovës.
Mirëpo, për ecjen tonë të sinqertë përpara si shtet e si komb duhet me patjetër të reflektojmë mbi qëndrimet tona karshi kësaj Gjykate në kohën kur u themelua. Reflektimi nuk është gabim, por në këtë drejtim shumë nga ata që sot dalin në kundërshtim me Gjykatën Speciale, dje ishin lobuesit më të mëdhenj për themelimin e saj. Para se të protestojnë, këta aktorë dhe politikanë duhet të tregojnë të paktën një minimum pendese për qëndrimet e tyre të gabuara në të kaluarën. Një shembull i qartë është vet Kryeministri aktual i Shqipërisë, Edi Rama, i cili madje kishte ardhur në Kosovë në vizitë emergjente me helikopter për të bindur palët këtu që të votonin pro themelimit të kësaj Gjykate.
Por, Lëvizja VETËVENDOSJE!, si atëherë më 2015, si sot më 2025, është e palëkundur se drejtësia duhet të ndriçojë të vërtetën dhe e vërteta nuk ka si të jetë ndryshe veçse në anën e luftës dhe përpjekjes së paepur të popullit të Kosovës për çlirim e pavarësi sikur popujt e tjerë.
Në anën tjetër, institucionet e Shqipërisë si shtet anëtar i OKB-së, i Këshillit të Evropës, i OSBE-së, i NATO-s e shumë pranë Bashkimit Evropian, kanë përgjegjësi dhe mundësi që këtë çështje ta ngrejnë në këto forume ndërkombëtare, aty ku flitet e vendoset për drejtësi, e jo në sheshin “Skënderbe” në Tiranë.
Po ashtu shtetet mike të Kosovës që tashmë gëzojnë anëtarësi në këto organizata, duhet të bëjnë shumë më tepër për të mbrojtur të vërtetën e luftës sonë dhe për të çuar përpara drejtësinë. Njëjtë siç duhet bërë më shumë në këto forume për njohjen e gjenocidit dhe gjykimin e krimeve kundër njerëzimit, krimeve të luftës që Serbia i ka kryer në Kosovë e në mbarë Ballkanin.
/Argumentum.al
