Ambasada e Federatës Ruse në Shqipëri organizoi një pritje solemne me rastin e 81-vjetorit të Fitores në Luftën e Madhe Patriotike të viteve 1941–1945. Ky aktivitet u zhvillua në një atmosferë përkujtimore dhe bashkëbisedimi, duke mbledhur përfaqësues të korpusit diplomatik, rretheve të biznesit, figurave të jetës kulturore, gazetarëve, anëtarëve të Shoqatës së Miqësisë “Shqipëri–Rusi”, si dhe bashkatdhetarëve që jetojnë në Shqipëri.
Në fjalën e tij përshëndetëse, Ambasadori i Rusisë në Shqipëri, A. A. Zaitsev, theksoi rëndësinë historike të Luftës së Madhe Patriotike dhe rolin vendimtar të Bashkimit Sovjetik dhe Ushtrisë së Kuqe në fitoren ndaj nazizmit. Ai e përshkroi nazizmin si një ideologji të bazuar në urrejtjen ndaj njeriut dhe në parimet e epërsisë racore, e cila kërcënoi ekzistencën e kombeve të tëra dhe solli shkatërrime të paprecedenta në Evropë dhe më gjerë.
Ambasadori kujtoi se fitorja erdhi me një çmim jashtëzakonisht të rëndë njerëzor, ku 27 milionë qytetarë të Bashkimit Sovjetik humbën jetën. Ai theksoi se këto sakrifica nuk ishin vetëm në mbrojtje të Atdheut, por përfaqësonin një kontribut vendimtar në çlirimin e gjithë botës nga rreziku nazist. Sipas tij, kujtimi i këtyre ngjarjeve duhet të mbetet i gjallë si një mësim historik dhe moral për brezat e sotëm dhe të ardhshëm.
Në vijim të fjalës së tij, Ambasadori Zaitsev u ndal edhe te sfidat e sotme në interpretimin e historisë së Luftës së Dytë Botërore. Ai shprehu shqetësim për tendencat e rishikimit të ngjarjeve historike, duke theksuar se në disa raste vërehen përpjekje për të minimizuar ose deformuar rolin e Bashkimit Sovjetik në fitoren ndaj fashizmit. Sipas tij, këto praktika rrezikojnë të cenojnë të vërtetën historike dhe të krijojnë konfuzion mbi përgjegjësitë dhe rolet e aktorëve të luftës.
Ambasadori theksoi gjithashtu se në disa raste ndodhin interpretime të padrejta, ku agresorët historikë paraqiten si çlirimtarë, ndërsa çlirimtarët e vërtetë vendosen në një dritë të zbehtë. Ai nënvizoi rëndësinë e ruajtjes së kujtesës historike si një detyrë morale ndaj atyre që sakrifikuan jetën në luftën kundër nazizmit.
Duke iu referuar kontekstit rajonal dhe marrëdhënieve me Shqipërinë, Ambasadori Zaitsev shprehu solidaritet me popullin shqiptar, i cili së fundmi ka përkujtuar Ditën e Dëshmorëve të Atdheut. Ai vlerësoi lart kontributin e Shqipërisë në Luftën e Dytë Botërore si pjesë e koalicionit antifashist, duke theksuar se dhjetëra mijëra djem dhe vajza shqiptare ranë në përballjen me pushtuesit italianë dhe gjermanë.
Në këtë kuadër, u nënvizua rëndësia e ruajtjes së kujtesës së përbashkët historike dhe nderimit të atyre që dhanë jetën për liri, si një element që forcon respektin dhe mirëkuptimin mes popujve.
Në vazhdim të aktivitetit, në ambientet e ambasadës u organizuan ekspozitat “Regjimenti ynë i Pavdekshëm” dhe “Fytyrat e Fitores”, të cilat pasqyronin kujtimet dhe historitë e luftës përmes materialeve arkivore dhe portreteve të pjesëmarrësve në luftë. Po ashtu, u zhvillua edhe fushata “Shiriti i Shën Gjergjit”, si simbol i kujtesës dhe respektit për veteranët dhe të rënët.
Fjala e Ambasadorit A. A. Zaitsev (e plotë)
“Të nderuar mysafirë,
Të dashur miq shqiptarë dhe kolegë!
Më vjen mirë t’Ju përshëndes Ju në pritjen e sotme, kushtuar ditës së Fitores në Luftën e Madhe Patriotike. Me gjithë zemër Ju uroj gëzuar me këtë festë të shenjtë!
81 vjet më parë mbaroi një nga luftrat më të tmerrshme dhe më të përgjakshme në historinë e njerëzimit, u mposht nazizmi – ideologjia e urrejtjes së njeriut dhe e epërsisë racore që iu mohua popujve të tëra e drejta për të jetuar.
Peshën më të madhe të luftës kundër Gjermanisë hitleriane dhe aleatëve të saj e mbajti BRSS-ja. Fitorja u bë e mundur me një çmim të lartë – 27 milionë njerëz vdiqën, mijëra qytete dhe fshatra u dogjën dhe u shkatërruan nga bombardimet. Qindra mijëra ushtarë të Ushtrisë së Kuqe ranë duke çliruar Evropën. Këto viktima kolosale u bënë jo vetëm për të mbrojtur Atdheun tonë, me to u pagua lirimi i të gjithë njerëzimit nga murtaja kafe.
Kujtimi i ngjarjeve të luftës, i mizorive dhe krimeve të nazizmit, dhe i asaj me çfarë mundimesh u mundësua fitorja nuk duhet të zbehet kurrë. Ky kujtim është një garanci se tmerret e së shkuarës nuk do të përsëriten kurrë.
Duke e kuptuar këtë, ne po vëzhgojmë me një shqetësim tendencat e sotme për të rishikuar vlerësimet e shkaqeve dhe pasojave të Luftës së Dytë Botërore, përpjekjet për të nënvlerësuar rolin e Bashkimit Sovjetik në fitoren ndaj fashizmit. Jo rrallë ndodhin falsifikime të hapura. Për politikanë të caktuar në vendet perëndimore është e vështirë të pajtohen me faktin se ishte ushtari sovjetik që i solli Evropës lirinë, dhe në mënyrë të paskrupullt ngatërrohen vendet e agresorëve dhe çlirimtarëve.
Me ndjenjat më të sinqerta shpreh solidaritetin me popullin shqiptar, i cili feston sot, më 5 maj, Ditën e Dëshmorëve – të partizanëve dhe patriotëve që luftuan kundër pushtuesve italianë dhe gjermanë. Duke qenë pjesë e koalicionit antifashist, Shqipëria dha kontributin e saj në fitoren ndaj armikut të përbashkët.
28 mijë bij dhe bija ranë në këtë luftë.
Le të kujtojmë mësimet e Luftës së Madhe Patriotike, le të çmojmë arritjet e gjyshërve tanë që na siguruan të drejtën e jetës dhe lirisë. Ju uroj edhe një herë Gëzuar Ditën e Fitores dhe ju ftoj të nderojmë kujtimin e dëshmorëve të Atdheut me një minutë heshtje.”
© 2026 Argumentum
