Presidenti kinez Xi Jinping dhe homologu i tij rus Vladimir Putin dërguan të dielën letra urimi për Ekspozitën e dhjetë Kinë-Rusi, e cila u hap në kryeqendrën e provincës Heilongjiang të Kinës Verilindore, Harbin.
Duke theksuar që ky vit shënon 30-vjetorin e partneritetit strategjik të koordinimit Kinë-Rusi dhe 25-vjetorin e nënshkrimit të Traktatit të Fqinjësisë së Mirë dhe Bashkëpunimit Miqësor Kinë-Rusi, Xi u shpreh se bashkëpunimi dypalësh në fusha të ndryshme është thelluar e forcuar vazhdimisht, duke arritur rezultate të frytshme falë përpjekjeve të përbashkëta të të dy vendeve.
foto nga VCG
Ai shprehu shpresën që kjo ekspozitë do të shërbejë si një mundësi për sektorët e ndryshëm të të dy vendeve për të shfrytëzuar afërsinë e tyre gjeografike dhe epërsitë përplotësuese, për të thelluar bashkëpunimin e gjithanshëm praktik, për të promovuar më tej zhvillimin ekonomik e shoqëror dhe për të rritur vazhdimisht mirëqenien e të dy popujve, duke dhënë kështu kontribute në zhvillimin e qëndrueshëm e afatgjatë të partneritetit strategjik gjithëpërfshirës të koordinimit Kinë-Rusi për një epokë të re.
foto nga VCG
Në mesazhin e tij, Putini tha se ekspozita është shndërruar në veprimtarinë më të madhe ekspozuese midis dy vendeve, duke ofruar një platformë për dialog të drejtpërdrejtë e të thelluar midis dy palëve.
Ai shprehu besimin që kjo ekspozitë do të arrijë rezultate pozitive, do të planifikojë perspektiva të reja të bashkëpunimit reciprokisht të dobishëm midis dy vendeve dhe do t’u sjellë përfitime dy popujve./.cgtn
