Protesta kundër investimit turistik të planifikuar në Zvërnec dhe ndryshimeve në ligjin për zonat e mbrojtura vijoi edhe sot në Tiranë, duke hyrë në ditën e saj të 30-të radhazi. Tubimi i kësaj të hëne u veçua nga pjesëmarrja e gjashtë eurodeputetëve të Parlamentit Evropian, të cilët iu bashkuan protestuesve dhe shprehën mbështetje për kauzën e tyre.
Qytetarët u mblodhën fillimisht në sheshin “Skënderbej”, prej nga marshuan drejt bulevardit “Dëshmorët e Kombit” dhe më pas përpara godinës së Kryeministrisë. Me pankarta në duar, protestuesit kërkuan dorëheqjen e Kryeministrit Edi Rama, largimin e asaj që e cilësojnë si “kastë e vjetër politike” dhe shfuqizimin e ndryshimeve në ligjin për zonat e mbrojtura.
Përpara Kryeministrisë, organizatorët dhe aktivistët mbajtën fjalime, duke theksuar se protesta po fiton gjithnjë e më shumë mbështetje.
Aktivisti Edison Lika deklaroi se protesta ka goditur “në zemër sistemin e vjetër politik”.
“Protesta goditi në zemër sistemin e vjetër. I ka dhënë goditje establishmentit politik, mediave të kapura dhe oligarkëve që e kanë mbajtur në pushtet”, u shpreh ai.
Më pas, një pjesë e protestuesve u zhvendos drejt Universitetit Politeknik të Tiranës, ku shpalosën një banderolë gjigante me mbishkrimet “Ju erdhi fundi!” dhe “Shqipëria nuk është në shitje”. Në shenjë proteste u ndezën edhe flakadanë. Pas këtij veprimi pati momente tensioni, pasi protestuesit pretenduan se policia ndërhyri duke rrëzuar banderolën.
Gjashtë eurodeputetë në mbështetje të protestës
Ndërkohë gjashtë eurodeputetë i janë bashkuar protestës që po zhvillohet sot në Tiranë. Në sheshin para kryeministrisë fjalën e mori edhe eurodeputetja gjermane Martina Hermina Antonia “Tineke” Strik, cila shprehu solidaritetin e saj të plotë me protestuesit.
“Solidaritet me popullin shqiptar që po proteston. Vijoni me mobilizimin në protestë, zëri juaj do shprehet edhe në Bruksel. Populli shqiptar nuk e pranon mohimin e të drejtës së fjalës dhe qeveria duhet të dëgjojë qytetarët dhe jo njerëzit e pasur”, u shpreh ajo.
Eurodeputetja gjermane theksoi se moratoriumi në zonat e mbrojtura, kërkon ndalimin e ndërtimeve në këto zona. Ajo deklaroi më tej se me këtë protestë Shqipëria po tregon se i përket Bashkimit Europian.
Megjithëse eurodeputetët nuk ishin pjesë e një delegacioni zyrtar të Parlamentit Evropian dhe nuk përfaqësonin një qëndrim institucional të Bashkimit Evropian, pjesëmarrja e tyre i dha protestës një dimension ndërkombëtar.
Protesta vijon
Në përfundim të tubimit, një nga organizatorët, Arben Kola, njoftoi se protesta do të vazhdojë edhe nesër. Sipas tij, protestuesit do të mblidhen në Rrjoll, ku pretendojnë se është rivendosur gardhi i hequr disa ditë më parë, ndërsa paradite do të zhvillojnë edhe një protestë përpara Kuvendit.
Me 30 ditë rezistencë të pandërprerë, protesta ka kaluar tashmë fazën e një reagimi spontan qytetar, duke u shndërruar në një lëvizje të organizuar me synimin për të ushtruar presion të vazhdueshëm ndaj qeverisë. Pjesëmarrja e eurodeputetëve në këtë etapë të protestës shihet nga organizatorët si një shenjë se kauza e tyre ka nisur të tërheqë vëmendjen edhe në nivel evropian. Ndërsa protestuesit paralajmërojnë përshkallëzim të aksioneve në ditët në vijim, mbetet për t’u parë nëse kjo rezistencë njëmujore do të sjellë një reagim politik apo institucional ndaj kërkesave të tyre.
/Argumentum.al
