Tensione janë regjistruar sot para godinës së Kuvendit, ku një protestë e qytetarëve është shoqëruar me përplasje mes protestuesve dhe forcave të rendit, ndërsa brenda sallës vijonte seanca plenare.
Sipas pamjeve nga vendngjarja, situata është përshkallëzuar kur një grup protestuesish është përpjekur të shtyjë kordonin policor të vendosur në perimetrin e jashtëm të institucionit. Forcat e policisë kanë ndërhyrë menjëherë për të zmbrapsur turmën, duke krijuar tensione dhe përplasje fizike pranë hyrjeve të Kuvendit.
Gjatë incidentit janë dëgjuar thirrje të forta verbale nga protestuesit drejtuar efektivëve të policisë, mes të cilave: “Mos na prek me dorë! Mos provokoni!”, ndërsa situata është shoqëruar me kaos dhe shtyrje.
Protestuesit, të mbledhur që prej nisjes së seancës plenare, kanë mbajtur pankarta dhe kanë hedhur thirrje kundër qeverisë dhe figurave politike, përfshirë slogane si “opozitë e shitur”, “Rama jep dorëheqjen” dhe të tjera të ngjashme. Në një moment, disa prej tyre kanë zhvendosur një kosh mbeturinash pranë godinës së Kuvendit dhe kanë shkruar në trotuar mesazhin “Parlament i krimit”.
Po ashtu, raportohet se protestuesit kanë hedhur vezë në drejtim të automjeteve në perimetrin e sigurisë së Kuvendit, ndërsa policia ka vendosur kordon për të mos lejuar hyrjen e tyre në ambientet e brendshme.
Në protestë janë përfshirë edhe grupe studentësh, të cilët kanë ngritur shqetësime për trajtim të pabarabartë nga institucionet, duke kërkuar që masat të jenë të njëjta për të gjithë qytetarët.
Për shkak të përshkallëzimit të situatës, forcat e rendit kanë kërkuar përforcime dhe në vendngjarje kanë mbërritur edhe forca të ndërhyrjes së shpejtë, me qëllim stabilizimin e situatës dhe hapjen e qarkullimit pranë Kuvendit.
Gjatë zhvillimeve, policia ka shoqëruar dy persona, mes tyre edhe Dritan Goxhaj, ndërsa protesta vijon me prani të shtuar të forcave të rendit dhe tensione të mbetura në zonë.
/Argumentum.al
