Pasditen e së premtes, presidenti kinez Xi Jinping zhvilloi bisedime në Pekin me presidenten e Namibisë, Netumbo Nandi-Ndaitwah, e cila ndodhet në Kinë për një vizitë shtetërore. Dy krerët e shteteve njoftuan së bashku ngritjen e marrëdhënieve dypalëshe në nivelin e komunitetit me të ardhme të përbashkët Kinë–Namibi në epokën e re.
Foto nga Xinhua
Xi Jinping-u theksoi se Kina dhe Namibia gëzojnë një miqësi tradicionale të thellë që nga vendosja e marrëdhënieve diplomatike, dhe e kanë trajtuar gjithmonë njëra-tjetrën mbi bazën e barazisë dhe mbështetjes reciproke, duke thelluar vazhdimisht bashkëpunimin miqësor. Ai tha më tej se, ndërsa Kina po çon përpara modernizimin kinez dhe Namibia po ecën drejt objektivave të saj të zhvillimit për vitin 2030, është momenti i duhur për të zgjeruar bashkëpunimin dypalësh. Kina është e gatshme të forcojë koordinimin e strategjive të zhvillimit me Namibinë, për të ecur përpara së bashku në rrugën e modernizimit.
Foto nga Xinhua
Xi Jinping-u paraqiti tre propozime për ndërtimin e komunitetit me të ardhme të përbashkët Kinë–Namibi në epokën e re. Së pari, duhet të forcohet mbështetja reciproke, të intensifikohen kontaktet e nivelit të lartë dhe shkëmbimet e përvojës në qeverisje, si edhe të vazhdohet mbështetja e ndërsjellë për çështjet që lidhen me interesat thelbësorë dhe shqetësimet kryesore të secilës palë. Së dyti, duhet të shfrytëzohet potenciali i bashkëpunimit dhe të rritet cilësia e tij. Kina mirëpret më shumë produkte cilësore nga Namibia në tregun kinez dhe është e gatshme të thellojë bashkëpunimin në infrastrukturë, energjetikë, industrinë minerare, bujqësi, arsim, shkëmbime rinore dhe shkencë e teknologji. Së treti, duhet të ruhet fryma e solidaritetit dhe e bashkëpunimit për të mbrojtur multilateralizmin, duke forcuar koordinimin për ruajtjen e drejtësisë dhe barazisë ndërkombëtare dhe duke kontribuuar në ndërtimin e një komuniteti me të ardhme të përbashkët për njerëzimin.
Kreu i shtetit kinez theksoi gjithashtu se ndihma ndaj Afrikës për ta shndërruar përparësinë e saj në burime natyrore në përparësi zhvillimi është një rrugë e rëndësishme për modernizimin e kontinentit. Sipas tij, Kina është e gatshme të vazhdojë bashkëpunimin me vendet afrikane në sektorin minerar mbi bazën e përfitimit të ndërsjellë, konsultimit miqësor dhe inovacionit, për ta çuar bashkëpunimin kino-afrikan në këtë fushë në një nivel më të lartë.
Foto nga Xinhua
Nga ana e saj, presidentja Netumbo Nandi-Ndaitwah tha që miqësia mes Namibisë dhe Kinës ka rrënjë të thella dhe marrëdhëniet dypalëshe kanë ruajtur prej kohësh një nivel të lartë zhvillimi. Ajo ritheksoi se Namibia i përmbahet me vendosmëri parimit të “një Kine”, është e gatshme të mësojë nga përvoja e zhvillimit të Kinës, të forcojë shkëmbimet partiake dhe të thellojë bashkëpunimin në tregti, industrinë minerare, infrastrukturë, shkencë e teknologji dhe bujqësi. Ajo mirëpriti gjithashtu më shumë investime të ndërmarrjeve kineze në Namibi dhe shprehu mirënjohje për mbështetjen afatgjatë të Kinës ndaj vendeve afrikane, duke shtuar se Namibia është e gatshme të forcojë koordinimin me Kinën për të mbrojtur interesat e përbashkët të vendeve në zhvillim dhe për të ndërtuar një komunitet me të ardhme të përbashkët për njerëzimin.
Foto nga Xinhua
Pas bisedimeve, dy krerët e shtetit dëshmuan nënshkrimin e një sërë dokumentesh bashkëpunimi në fusha si tregtia dhe ekonomia, shëndetësia, arsimi dhe burimet njerëzore.
Të dyja palët publikuan gjithashtu Deklaratën e Përbashkët të Republikës Popullore të Kinës dhe Republikës së Namibisë mbi ndërtimin e komunitetit me të ardhme të përbashkët Kinë–Namibi në epokën e re.
Xi Jinping-u dhe bashkëshortja e tij Peng Liyuan organizuan një ceremoni mirëseardhjeje për presidenten Netumbo Nandi-Ndaitwah dhe bashkëshortin e saj në Pallatin e Madh të Popullit. Në mbrëmje ata shtruan edhe një banket mirëseardhjeje.
Në aktivitete mori pjesë edhe ministri i Jashtëm kinez Wang Yi./cgtn
