Xi Jinping, sekretar i përgjithshëm i Komitetit Qendror të Partisë Komuniste të Kinës dhe president i Kinës, u takua të premten pasdite në Pekin me Pak Thae Song, anëtar i Komitetit të Përhershëm të Byrosë Politike të Komitetit Qendror të Partisë së Punëtorëve të Koresë, nënkryetar i Komisionit të Çështjeve Shtetërore të Republikës Popullore Demokratike të Koresë (RPDK) dhe kryeministër i Kabinetit të RPDK-së, i cili ndodhet në Kinë për një vizitë zyrtare.
Xi theksoi se muajin e kaluar ai zhvilloi një vizitë shtetërore në RPDK, gjatë së cilës së bashku me sekretarin e përgjithshëm të Partisë së Punëtorëve të Koresë Kim Jong Un dhanë orientime strategjike për forcimin dhe zhvillimin e miqësisë tradicionale kino-koreanoveriore. Kreu i shtetit i Kinës theksoi që miqësia brez pas brezi, ndarja e një të ardhmeje të përbashkët dhe mbështetja reciproke kanë qenë gjithmonë tiparet dalluese të marrëdhënieve ndërmjet dy vendeve. Traktati i Miqësisë, Bashkëpunimit dhe Ndihmës së Ndërsjellë midis Kinës dhe RPDK-së ka vendosur një bazë të rëndësishme politike dhe juridike për marrëdhëniet dypalëshe. Të dyja palët ranë dakord ta shfrytëzojnë 65-vjetorin e nënshkrimit të traktatit për të trashëguar dhe zhvilluar më tej miqësinë tradicionale dhe për të çuar përpara marrëdhëniet dypalëshe.
Xi u shpreh më tej se, përballë një situate ndërkombëtare komplekse dhe në ndryshim, Kina dhe RPDK-ja duhet të ruajnë vendosmërinë strategjike, të zbatojnë konsensusin e rëndësishëm të arritur nga udhëheqësit e të dy vendeve dhe të nxisin zhvillimin e mëtejshëm të marrëdhënieve ndërmjet dy partive dhe dy shteteve, në shërbim të ndërtimit socialist dhe modernizimit të secilit vend. Ai bëri thirrje për përparimin e qëndrueshëm të bashkëpunimit praktik, forcimin e mbështetjes popullore, shfrytëzimin e përbashkët të trashëgimisë revolucionare dhe zgjerimin e shkëmbimeve rinore për të trashëguar miqësinë tradicionale ndërmjet të dy vendeve. Gjithashtu, presidenti kinez kërkoi forcimin e bashkëpunimit strategjik për të mbrojtur me vendosmëri sovranitetin, sigurinë dhe interesat e zhvillimit të secilit prej të dy vendeve, duke krijuar një mjedis të favorshëm ndërkombëtar për zhvillimin e tyre.
Foto nga Xinhua
Nga ana e tij, Pak Thae Song përcolli përshëndetjet e përzemërta të sekretarit të përgjithshëm Kim Jong Un për presidentin Xi Jinping, si edhe urimet për 105-vjetorin e themelimit të Partisë Komuniste të Kinës dhe për arritjet e zhvillimit të Kinës. Ai tha se vizita e presidentit Xi në RPDK këtë vit ka shënuar një moment historik të ri në zhvillimin e marrëdhënieve dypalëshe. Sipas tij, Traktati i Miqësisë, Bashkëpunimit dhe Ndihmës së Ndërsjellë midis RPDK-së dhe Kinës ofron garanci të forta për zhvillimin e marrëdhënieve ndërmjet dy vendeve. Pala verikoreane do të zbatojë konsensusin e rëndësishëm të arritur nga udhëheqësit e të dy vendeve, do të mbështesë me vendosmëri qëndrimin e Kinës për çështje thelbësore si Tajvani, do të promovojë zhvillimin e vazhdueshëm të miqësisë ndërmjet dy vendeve dhe do të kontribuojë së bashku për ruajtjen e paqes dhe qëndrueshmërisë rajonale.
Në takim mori pjesë edhe ministri i Jashtëm i Kinës Wang Yi./cgtn
