Në ceremoninë për 10-vjetorin e Ditës së Demokracisë dhe Unitetit Kombëtar, ambasadori i Turqisë në Shqipëri Sh.T.Z. Baris. Ceyhun Erciyes vlerësoi rezistencën e popullit turk ndaj tentativës për grusht shteti të vitit 2016.
Dhjetë vjet pas ngjarjeve që shënuan një nga momentet më të rëndësishme në historinë moderne të Turqisë, Ambasada e Republikës së Turqisë në Tiranë organizoi ceremoninë përkujtimore me rastin e 15 Korrikut – Ditës së Demokracisë dhe Unitetit Kombëtar, duke rikujtuar rezistencën e qytetarëve turq kundër tentativës për grusht shteti të vitit 2016.
Në aktivitet morën pjesë përfaqësues të institucioneve shqiptare, diplomatë, përfaqësues të komunitetit turk në Shqipëri, personalitete të jetës publike dhe medias. I pranishëm ishte edhe deputeti i Kuvendit të Madh Kombëtar të Turqisë, Burhan Kayatürk.
Në fjalën e tij, Ambasadori i Republikës së Turqisë e cilësoi natën e 15 korrikut 2016 si një moment vendimtar në historinë moderne të vendit, kur, sipas tij, populli turk mbrojti demokracinë, rendin kushtetues dhe pavarësinë e shtetit përballë tentativës për grusht shteti të organizuar nga FETÖ.
Ambasadori kujtoi se gjatë ngjarjeve të asaj nate humbën jetën 253 qytetarë, ndërsa rreth 3 mijë persona mbetën të plagosur, duke i cilësuar ata dëshmorë dhe veteranë të rezistencës demokratike.
Një moment i veçantë i ceremonisë ishte prezantimi i Muhammed Ali, Meryem Yaren dhe Halit Kerem Ertaş, fëmijët e Mehmet Emin Ertaş, një prej qytetarëve të plagosur gjatë përballjes me puçistët në vitin 2016. Ambasadori shprehu mirënjohje për veteranët dhe familjet e tyre, duke theksuar se sakrifica e tyre mbetet simbol i mbrojtjes së demokracisë turke.
Një pjesë e rëndësishme e fjalimit iu kushtua organizatës FETÖ, të cilën autoritetet turke e konsiderojnë përgjegjëse për tentativën e grushtit të shtetit. Ambasadori e përshkroi atë si një organizatë terroriste me shtrirje ndërkombëtare, e cila, sipas Ankarasë, vepron përmes strukturave të ndryshme të maskuara si organizata të shoqërisë civile, institucione arsimore apo organizata fetare.
Ai deklaroi se lufta kundër FETÖ-s mbetet një nga prioritetet kryesore të sigurisë kombëtare të Turqisë dhe se bashkëpunimi me vendet partnere, përfshirë Shqipërinë, do të vazhdojë për të parandaluar aktivitetet e organizatës.
Ambasadori theksoi gjithashtu se Turqia vazhdon të informojë autoritetet dhe opinionin publik shqiptar mbi atë që e konsideron rrezikun e FETÖ-s, me synimin që, sipas tij, Shqipëria të mos përballet me përvoja të ngjashme me ato të Turqisë.
Në përfundim të ceremonisë, ai ftoi të pranishmit të merrnin pjesë në panelin me temë “Vullneti Kombëtar dhe Rezistenca Demokratike: 15 Korriku në 10-vjetorin e tij”, organizuar nga Presidenca e Komunikimit e Republikës së Turqisë.
Fjala e plotë e Ambasadorit të Republikës së Turqisë në ceremoninë përkujtimore të 15 Korrikut
I nderuar Deputeti i Kuvendit, Z. Burhan Kayatürk,
Të nderuar Përfaqësues të Institucioneve,
Të dashur Miq,
Të nderuar bashkatdhetarët tanë, si dhe vëllezërit tanë shqiptarë,
Dhe ju përfaqësues të medias,
Sot, përkujtojmë 10-vjetorin e fitores demokratike të kombit turk e arritur kundër tentatives tinzare për grusht shteti e orkestruar nga FETÖ në natën e 15 korrikut 2016.
Natën e 15 korrikut 2016, kombi fisnik turk shkroi një epope të paharrueshme duke mbrojtur vullnetin, demokracinë dhe pavarësinë e tij. Kjo tentative tradhtare për grusht shteti, e cila i kushtoi jetën 253 qytetarëve tane dhe përfundoi me plagosjen e gati 3,000 të tjerëve, u shpartallua nga rezistenca e vendosur e kombit tonë fisnik, i cili deklaroi: “Vullneti është i yni, Fitorja është e Jona”.
Sot, jemi të nderuar që kemi ne mesin tonë Muhammed Ali, Meryem Yaren dhe Halit Kerem Ertaş fëmijët e familjes z. Mehmet Emin Ertaş, (tashmë ‘‘veteran’’) një qytetar i cili u plagos në këmbë nga plumbat e qëlluar nga pjesëtarët e organizatës terroriste gjatë tentativës për grusht shteti. Në këtë përvjetor domethënës, jam i nderuar t’i mikpresim ata këtu në Shqipëri dhe t’jua prezantoj juve.
Me këtë rast, në praninë e tyre, shprehim edhe një herë mirënjohjen tonë më të thellë për veteranët tanë, veçanërisht për babanë e tyre, z. Mehmet Emin Ertaş, i cili i rezistoi përpjekjes tinzare për grusht shteti me koston e jetës, si dhe përkujtojmë me lutje dhe mirënjohje martirët/deshmoret tanë që humbën jetën në këtë kauzë.
FETÖ, e cila lufton për të çuar përpara axhendën e saj të fshehtë, është një organizatë terroriste dhe nje celul e krimit të organizuar shumështresore, ndërkombëtare dhe me karakteristika të ngjashme te kultit, të rralla në histori, që ndonjëherë paraqitet si një organizatë e shoqërisë civile, ndonjëherë si një institucion arsimor dhe ndonjëherë futur nën petkun e një bashkësie fetare.
Është një gabim i rëndë të supozohet se objektivi i vetëm i FETÖ-s është Republika e Turqisë. Organizata FETÖ, e maskuar si aktivitete të tilla si ndihma humanitare, arsim dhe tregti, madje duke shfrytëzuar vlerat fetare, përpiqet të fitojë ndikim në pjesë të ndryshme të botës, ndërkohë që kërcënon rendin publik të vendeve në të cilat vepron përmes aktiviteteve të paligjshme që shtrihen nga evazioni fiskal dhe pastrimi i parave deri tek kontrabandimi i emigrantëve.
Një pjesë e konsiderueshme e strukturave të lidhura me FETÖ-n në vendet mike dhe aleate janë penguar falë bashkëpunimit ndërkombëtar të realizuar nga shteti ynë. Edhe pse organizata po përpiqet të rifitojë dukshmërinë dhe të forcojë bashkëpunimin e saj me qarqet armiqësore ndaj Turqisë duke përdorur mundësitë e propagandës dhe lobimit, struktura e saj ka pësuar një goditje të rëndë në nivel global.
Megjithatë, FETÖ vazhdon praninë e saj në disa vende mike nën maska të ndryshme. Ne vazhdojmë t’u shpjegojmë miqve tanë shqiptarë në çdo rast se sa i madh është rreziku i FETÖ, në mënyrë që partneri ynë strategjik Shqipëria të mos përjetojë përvojat e dhimbshme që ka kaluar vendi ynë. Ne do të vijojmë me vendosmëri përpjekjet tona për të rritur ndërgjegjësimin e publikut shqiptar ndaj qëllimeve te errëta të FETÖ-s.
Lufta kundër FETÖ-s është një nga komponentët më të rëndësishëm të sigurisë sonë kombëtare. Vdekja e udhëheqësit të organizatës në SHBA në tetor 2024, pa u nxjerrë para drejtësisë, nuk na ka bërë të vetëkënaqur. Askush nuk duhet të dyshojë, Republika e Turqisë do të vazhdojë luftën e saj pa u lodhur derisa kjo organizatë tinëzare të zhduket plotësisht.
Përpara se të përfundoj fjalën time, dua t’ju falënderoj për pjesëmarrjen tuaj dhe t’ju ftoj të merrni pjesë në diskutimin në panel me titull “Vullneti Kombëtar dhe Rezistenca Demokratike: 15 Korriku në 10-vjetorin e tij”, të organizuar nga Presidenca e Komunikimit të Republikës së Turqisë në hotelin Hilton Garden Inn menjëherë pas kësaj ceremonie.
Me këtë rast, i përkujtoj me respekt dhe mirënjohje të gjithë dëshmorët tanë që e sollën Republikën e Turqisë deri në ditët e sotme.
Ju faleminderit.
© 2026 Argumentum
