Kryeministri Edi Rama e ka cilësuar protestën e zhvilluar gjatë muajit qershor kundër projektit në Zvërnec si një moment reflektimi për qeverinë dhe Partinë Socialiste, duke deklaruar se mesazhi i ardhur nga qytetarët nuk duhet parë si refuzim i punës së bërë, por si një tregues i pritshmërive të reja të shoqërisë shqiptare.
Në mbledhjen e përbashkët të Grupit Parlamentar të Partisë Socialiste dhe kabinetit qeveritar, Rama u ndal gjerësisht te ajo që ai e quajti “pasqyra e Bulevardit të Flamingove”, duke argumentuar se Shqipëria ka hyrë në një fazë të re, ku qytetarët nuk mjaftohen më me faktet dhe arritjet e qeverisë, por kërkojnë standarde më të larta në shërbime, transparencë dhe mënyrën e qeverisjes.
Rama theksoi se gjatë muajit qershor bulevardi u mbush me njerëz nga të gjitha rrugët e jetës, nga të gjitha kategoritë shoqërore, moshat dhe një shpend i rrallë, i bukur dhe i brishtë u bë simbol i vëmendjes më të madhe globale që Shqipëria ka përjetuar ndonjëherë brenda 1 muaji.
“Kam sjellë me vete edhe dy dokumente që mishërojnë reflektimin tim përpara pasqyrës së bulevardit të flamingove dhe janë të hapura për t’u lexuar, analizuar dhe ndryshuar që ta përmbushin sa më mirë qëllimin e tyre: dokumenti strategjik për kthesën që duhet të garantojë mandati i katërt në procesin qeverisës dhe i dyti është një aneks për mënyrën se si PS duhet ta mbështesë kthesën e mandatit të 4-t”, tha Rama.
Kryeministri solli në vëmendje episodin e një kryebashkiaku, i cili u indinjua nga protesta e një grupi qytetarësh.
“Qëlloi pikërisht në një nga ditët e qershorit që një kryetar bashkie, shok i yni, njeri që i rri në kokë punës dhe komunitetit më erdhi shumë i acaruar me një grup qytetarësh që i kishin dalë në protestë për një problem në lagjen e tyre në periferi të asaj bashkie. ‘I kam gjetur në llum, nuk kishin rrugë, trotuare, për ndriçim nuk bëhej fjalë. I bëra me rrugë, trotuare, me drita, me pemë, u bëra kopsht dhe u vura dhe stola, por janë mosmirënjohës’”, solli Rama në vëmendje bisedën.
Por, sipas kryeministrit “pikërisht kjo fjalë, mosmirënjohës, është pikënisja e perspektivës së re që na duhet, sepse në përmbajtjen e saj gjendet kuptimi më i gabuar i fazës së re ku ka hyrë Shqipëria”.
“Prandaj dua që t’ua them unë atyre që dolën në bulevard gjatë qershorit dhe atyre që kanë protestuar në heshtje, pa zë, vetëm apo me të tjerë kudo në Shqipëri apo jashtë, jo vetëm gjatë qershorit por qysh pas zgjedhjeve të qershorit të kaluar: Ju nuk jeni mosmirënjohës, jeni matësi i ri i standardeve tona. Ju që mbushët bulevardin nuk protestuat kundër Shqipërisë që ne ndërtuam gjatë 3 mandate të para. Edhe ata që gjatë ditës ishin në punën e shtetit dhe në mbrëmje shkonin në protestë nuk dolën në bulevardin e flamingove për të sulmuar qeverinë apo për t’ju bashkuar këngës ‘Rama jepe dorëheqjen’”, tha Rama.
“Bulevardi i Flamingove”, simbol kombëtar dhe ndërkombëtar
Duke analizuar jehonën ndërkombëtare të protestës, kryeministri Edi Rama u ndal te roli që, sipas tij, pati lidhja e projektit të Zvërnecit me familjen e ish-presidentit amerikan Donald Trump. Ai argumentoi se kjo rrethanë ndikoi që një çështje që në kushte të tjera do të mbetej një debat i brendshëm shqiptar, të merrte përmasa globale.
Sipas Ramës, në epokën e rrjeteve sociale, pamjet, emocionet dhe interpretimet mund të krijojnë narrativa që tejkalojnë kufijtë e një vendi.
“Zvërneci dha videon revoltuese, flamingoja dha simbolin magjepsës, hija e vjehrrit më të famshëm në botë dha magnetin global, dhe algoritmi bëri pjesën tjetër”, deklaroi Rama.
Kryetari i Partisë Socialiste, njëherësh Kryeministri Edi Rama u shpreh sot se protestat e lidhura me projektin e Zvërnecit, në rastin më të mirë do ishin një çështje shqiptare jashtë vëmendjes së botës.
Por, sipas Ramës, për shkak se në qendër të atij projekti është dhëndri më i famshëm në botë, Donald Trump dhe e bija e tij, falë kësaj lidhjeje çështja u bë legjendë globale.
“Por falë asaj lidhjeje, ajo u bë menjëherë një legjendë globale, ku shumëkush ndër fansat e huaj të protestës, përfshirë edhe një senator mitik të SHBA-së, deshi ta shihte Shqipërinë si shëmbëlltyrën guximtare të një Davidi të vogël, që u ngrit dhe u rebelua ndaj Goliathit të plotfuqishëm, duke bërë thirrje që bota mbarë ta merrte nga Shqipëria mësimin dhe të ngrihej në atë revolucionin e madh dhe të shumëpritur të ish-proletarëve”, tha Rama.
Rama tha se në epokën e rrjeteve sociale, ngjarje të tilla mund të shndërrohen shpejt në simbole ndërkombëtare, ku pamjet, emocionet dhe interpretimet e ndryshme krijojnë narrativa që tejkalojnë kufijtë e një vendi.
“Ky është fakt i kohës së kanaleve sociale ku noton sot bota. Zvërneci dha videon revoltuese, flamingoja dha simbolin magjepsës, hija e vjehrrit më të famshëm në botë dha magnetin global, dhe algoritmi i yshtur nga ustallarë të ndërhyrjes në punët e tjerëve bëri pjesën tjetër. Me një shkrepëse të ndezur pranë pyllit me pisha në Nartë, shpërndau një zjarr marramendës anembanë botës”, u shpreh Rama.
Rama theksoi se, pavarësisht jehonës ndërkombëtare, “shkaku i shqetësimit ishte brenda vendit dhe zemra e protestës ishin qytetarët shqiptarë”.
Sipas tij, përgjigjja ndaj kësaj situate duhet të vijë nga institucionet shqiptare dhe jo nga aktorë që, sipas tij, kërkojnë të përfitojnë politikisht duke nxitur pakënaqësi.
Kreu i Ekzekutivit shtoi se disa kundërshtarë e kanë përdorur protestën për interesa të tjera, duke deklaruar se “ata kanë pasur nevojë për plagën, por nuk ishin ata që e krijuan protestën”.
“Prandaj përgjigja duhet të jetë e jona, jo e sharlatanëve, ekstremistëve apo çdo dështaku publik që në këto raste gjenden gjithmonë gati me receta çudibërëse për popullin, të cilat shkruhen vetëm mbi një parim: o burra rrëzojmë gjithçka, të rregullohet çdo gjë dhe unë të kap diçka. Ata kishin nevojë për plagën, por nuk e krijuan ata protestën. E rrëmbyen dhe vazhduan ta mishërojnë si llumi që dekanton pasi thahet prurja e ujit të rrjedhshëm”, vijoi ai.
Kryeministri ngriti gjithashtu shqetësimin për ndikimin e dezinformimit në rrjetet sociale, duke thënë se qëllimi i aktorëve keqdashës është dobësimi i besimit të qytetarëve te institucionet, media, drejtësia, parlamenti dhe procesi i integrimit evropian.
“Një vend pa besim është i pambrojtur dhe një demokraci pa besim është një shesh për çdo përshesh”, deklaroi Rama.
Ai u ndal edhe te shfaqja e gjuhës së urrejtjes fetare dhe etnike gjatë protestave, duke e cilësuar si një zhvillim shqetësues dhe një objektiv të mundshëm të operacioneve të manipulimit të opinionit publik.
Sipas Ramës, sfida kryesore mbetet ruajtja e besimit shoqëror dhe përballimi i një realiteti të ri, ku informacioni dhe perceptimet publike ndikohen gjithnjë e më shumë nga hapësira digjitale.
“Sepse një vend pa besim është i pambrojtur dhe një demokraci pa besim është një shesh për çdo përshesh. Fakti që për herë të parë Shqipëria përjetoi shijen e stërkeqe të dasisë fetare dhe urrejtjes etnike, të cilat u manifestuan për turpin e të gjithë neve në rrugën e protestës, ishte drejtpërdrejt objektiv i operacionit të tyre”, tha ai.
Dokumenti “Besa”
Kryeministri Edi Rama siguroi sot se vendimet e qeverisë nuk do të përjetohen si prerje në besë, ku qytetarët të ndihen të painformuar dhe të papërfillur.
Për këtë arsye Rama prezantoi dokumentin e titulluar “Besa”, një aleancë sipas tij, për të kthyer protestën e flamingove në test pjekurie të demokracisë.
“E kam titulluar me emër të vjetër dhe shumë të madh: Besa. E di që do të hapë debat, por e zgjodha edhe pse do të hapë debat. Nuk gjeta asnjë fjalë që ta thotë më qartë që vendimet të mos përjetohen më si prerje në besë, të mos ndihen si të padëgjuar e të painformuar, të papërfillur”, tha Rama.
Rama theksoi se ka shkruar po ashtu një ankes për mënyrën si PS do ta mbështesë kthesën
“E di që para se ta lexoni do të jetë hedhur në kanale sociale, i mbuluar me pupla sorrash. Beteja sot nuk është mes qeverisë dhe qytetarëve. Është mes atyre që duan një Shqipëri më të drejtë e të besueshme dhe atyre që e kanë të domosdoshme një Shqipëri të përçarë dhe pa besim te shteti. Atyre, që i patë edhe dje, të grumbulluar si një grup i vogël sorrash te foltorja e parlamentit. Edhe pse tani, bulevardi i ka lënë si zogj korbi të kategorisë së dytë”, shtoi Rama.
Kryeministri theksoi se aleanca që na duhet është për ta mbrojtur kritikën, për ta kthyer zemërimin në ndryshim, pyetjen në provë dhe protestën nga një çast përplasjeje në një test pjekurie të demokracisë
© 2026 Argumentum
