Kryeministri Edi Rama ka prezantuar kuptimin dhe filozofinë e dokumentit strategjik “BESA”, të cilin qeveria e konsideron si bazën e një qasjeje të re në vendimmarrje dhe në marrëdhënien mes institucioneve dhe qytetarëve.
Dokumenti vjen pas reflektimit mbi atë që u cilësua si “Protesta e Flamingove”, një reagim qytetar ndaj disa vendimeve dhe projekteve qeveritare, duke synuar të krijojë një mekanizëm të ri komunikimi dhe përgjegjshmërie publike.
Përmes një postimi në rrjetet sociale, Rama ka shpjeguar se “BESA” mbështetet mbi katër shtylla kryesore:
- B – Besim
- E – Empati
- S – Shërbim
- A – Angazhim
Sipas kryeministrit, këto katër elemente përbëjnë një kontratë të re politike me qytetarët, ku qeverisja duhet të bazohet më shumë në dëgjim, transparencë dhe reagim ndaj shqetësimeve publike.
“Besa” është prezantuar si një dokument strategjik dhe politik për mandatin e katërt të Partisë Socialiste, duke synuar adresimin e pakënaqësive qytetare dhe forcimin e llogaridhënies përmes institucioneve ekzistuese dhe mekanizmave të rinj të kontrollit e konsultimit.
Testi i parë konkret i kësaj qasjeje do të jetë projekti i Zvërnecit. Brenda një afati 90-ditor, qeveria synon të zhvillojë dëgjesa publike, përfshirë edhe grupet që kanë protestuar kundër projektit, si dhe të bëjë publike dokumentacionin përkatës apo të realizojë një vlerësim paraprak.
Pas këtij procesi pritet të merret një vendim për të ardhmen e projektit, duke e kthyer çështjen e Zvërnecit në provën e parë për zbatimin praktik të parimeve të “Besës”.
© 2026 Argumentum
