Turqia ka kërkuar që Interpoli të lëshojë një “Red Notice” për kryeministrin izraelit Benjamin Netanyahu dhe shtetasin izraelit Afek Moskovitch, në kuadër të një çështjeje penale që lidhet me ndërhyrjen e Izraelit ndaj një flotiljeje që transportonte ndihma humanitare drejt Gazës.
Ministri turk i Drejtësisë, Akın Gürlek, bëri të ditur të premten se Ministria e Drejtësisë i ka kërkuar Ministrisë së Brendshme të nisë procedurën për kërkesën drejtuar Interpolit. Dokumentet përkatëse, sipas tij, i janë përcjellë edhe Ministrisë së Jashtme turke.
Çështja po shqyrtohet nga Gjykata e 11-të e Rënde Penale e Stambollit, ku janë 35 të pandehur, mes tyre Netanyahu dhe Moskovitch. Sipas autoriteteve turke, ndaj dy të akuzuarve janë lëshuar urdhër-arreste më 14 korrik 2026, nën akuzën për “gjenocid”.
Akuza lidhet me ndërhyrjen ndaj aktivistëve të Global Sumud Flotilla, të cilët po përpiqeshin të dërgonin ndihma humanitare në Gaza. Sipas ministrit Gürlek, procedimi përfshin akuza për krime kundër njerëzimit, gjenocid, privim të rënduar të lirisë, plagosje të qëllimshme, torturë, dëmtim prone, grabitje të rënduar dhe rrëmbim të mjeteve të transportit.
Gürlek deklaroi se Ankaraja do të përdorë të gjitha mekanizmat ligjorë në dispozicion për të kërkuar përgjegjësi për krimet që, sipas saj, janë kryer në Gaza.
Një “Red Notice” e Interpolit nuk përbën automatikisht një urdhër-arresti ndërkombëtar. Ajo është një kërkesë drejtuar autoriteteve policore të vendeve anëtare për të lokalizuar dhe, në përputhje me ligjin vendas, për të ndaluar përkohësisht një person në pritje të procedurave të mëtejshme, përfshirë ekstradimin.
Kërkesa e Ankarasë vjen në një periudhë tensionesh të shtuara mes Turqisë dhe Izraelit. Turqia ka qenë një nga kritikët më të ashpër të veprimeve ushtarake izraelite në Gaza, ndërsa marrëdhëniet mes dy vendeve janë tensionuar më tej edhe nga zhvillimet e fundit në Siri.
/Argumentum.al
