Emisarët e posaçëm të presidentit amerikan Donald Trump, Steve Witkoff dhe Jared Kushner, kanë mbërritur të shtunën në Moskë, në kuadër të një përpjekjeje të re amerikane për të ringjallur negociatat për përfundimin e luftës në Ukrainë.
Sipas agjencisë ruse TASS, avioni i delegacionit amerikan u ul në aeroportin Vnukovo në orën 12:52, sipas kohës së Moskës. Witkoff dhe Kushner u pritën në aeroport nga Kirill Dmitriev, i dërguari special i presidentit rus për investimet dhe bashkëpunimin ekonomik ndërkombëtar.
Vizita zhvillohet në një moment të rëndësishëm diplomatik. Presidenti Trump ka deklaruar se dy të dërguarit amerikanë po udhëtojnë me një propozim të ri për përfundimin e luftës, ndërsa pritet që ata të zhvillojnë bisedime me presidentin rus Vladimir Putin në Kremlin.
Putin ka deklaruar më herët se Witkoff dhe Kushner janë “gjithmonë të mirëpritur” në Rusi dhe se Moska është e kënaqur të punojë me ta. Zëdhënësi i Kremlinit, Dmitry Peskov, ka konfirmuar se Putin pritet të takohet me dy emisarët amerikanë, ndërsa Kremlini do të bëjë të ditura detajet e konsultimeve pasi ato të zhvillohen.
Një mision Moskë–Kiev
Vizita në Moskë është pjesë e një misioni diplomatik më të gjerë. Pas Rusisë, Witkoff dhe Kushner pritet të udhëtojnë në Kiev, ku do të takohen me presidentin ukrainas Volodymyr Zelensky. Ky do të ishte një zhvillim i rëndësishëm, pasi do të shënonte vizitën e parë të tyre në kryeqytetin ukrainas në kuadër të përpjekjeve të administratës Trump për ndërmjetësim.
Misioni amerikan zhvillohet ndërkohë që hendeku mes Moskës dhe Kievit mbetet i madh. Rusia vazhdon të kërkojë lëshime territoriale nga Ukraina, ndërsa Kievi i kundërshton këto kërkesa. Megjithatë, rikthimi i drejtpërdrejtë i emisarëve amerikanë në Moskë dhe paralajmërimi për një propozim të ri nga Uashingtoni sinjalizojnë një përpjekje për t’i dhënë një dinamikë të re diplomacisë së paqes.
Sipas raportimeve të fundit, presidenti Putin ka urdhëruar gjithashtu një pauzë 72-orëshe të goditjeve ndaj Kievit, që përkon me vizitën e emisarëve amerikanë dhe misionin e tyre të pritshëm në Ukrainë.
Vizita e Witkoff dhe Kushner në Moskë vjen rreth dhjetë ditë pas një tjetër kontakti të pazakontë të nivelit të lartë amerikan me Moskën. Më 25 gusht, drejtori i CIA-s, John Ratcliffe, zhvilloi një vizitë të papritur në kryeqytetin rus, ku, sipas raportimeve, u takua me drejtues të shërbimeve ruse të inteligjencës dhe sigurisë. Vizita, e cila zgjati vetëm disa orë, u zhvillua në mënyrë diskrete dhe u konfirmua më pas nga zëdhënësi i Kremlinit Dmitry Peskov, i cili e përshkroi atë si pjesë të kontakteve mes shërbimeve të sigurisë.
Fakti që vizita e Ratcliffe u pasua, vetëm pak ditë më vonë, nga rikthimi i emisarëve të Presidentit Trump në Moskë, i jep një rëndësi të veçantë këtij intensifikimi të kontakteve amerikano-ruse.
© 2026 Argumentum
