Sot shënohen 36 vite nga 7 shtatori 1990, kur delegatët e zgjedhur të Kuvendit të Kosovës shpallën Kosovën republikë dhe miratuan kushtetutën e saj në një mbledhje të fshehtë të mbajtur në Kaçanik.
Në një postim në faqen e tij në Facebook, kryeministri në detyrë i Kosovës, Albin Kurti, kujtoi këtë ngjarje, të cilën e cilësoi si një nga momentet themelore të rrugëtimit politik dhe historik të Kosovës.
Sipas Kurtit, më 7 shtator 1990, dy muaj pas miratimit të Deklaratës Kushtetuese të 2 Korrikut, 80 nga 111 delegatët e Kuvendit të Kosovës arritën të mblidheshin në Shtëpinë e Kulturës në Kaçanik, ku unanimisht miratuan dokumentin kushtetues dhe shpallën Kosovën republikë.
Kurti e përshkruan këtë akt si një kundërvënie politike dhe juridike ndaj regjimit të atëhershëm serb, i cili në vitin 1989 kishte suprimuar autonominë e Kosovës.
“Autonomia e fituar më 1974 dhe e suprimuar më 1989, u zëvendësua me republikë më 1990”, shkruan Kurti.
Në postimin e tij, kryeministri në detyrë e cilëson Republikën e shpallur në Kaçanik si “republikë për rezistencë”, duke theksuar se rezistenca fillimisht paqësore dhe më pas e armatosur do të kulmonte me luftën e viteve 1998-1999 dhe veprimtarinë e Ushtrisë Çlirimtare të Kosovës.
Kurti e lidh aktin e 7 shtatorit 1990 me shpalljen e pavarësisë së Kosovës më 17 shkurt 2008, kur, sipas tij, “republika e Kosovës e shpallur më 7 shtator 1990 në Kaçanik, u ripërtëri në Republikën e Kosovës, shtet të pavarur, sovran dhe demokratik”.
Në fund të mesazhit, Kurti shprehu mirënjohje për brezin që kontribuoi dhe u angazhua për Republikën e Kosovës gjatë viteve ’90, duke përcjellë urime për të ardhmen politike të vendit.
Përvjetori i 7 shtatorit mbetet një datë e rëndësishme në narrativën politike dhe historike të Kosovës, si një nga aktet që paraprinë shpalljen e pavarësisë së saj më 2008.
© 2026 Argumentum
