Ambasadori i ri i Shteteve të Bashkuara në Shqipëri, Eric Wendt, ka nisur takimet zyrtare në Tiranë, pak ditë pasi paraqiti letrat kredenciale te Presidenti Bajram Begaj dhe mori zyrtarisht detyrën.
Takimi i parë me drejtuesit e qeverisë shqiptare u zhvillua me Kryeministrin Edi Rama. Në një postim të shkurtër në rrjetet sociale, Rama e cilësoi takimin si një mirëseardhje për ambasadorin e ri, duke shkruar: “Welcome”, ndërsa theksoi se një partneritet i fortë matet nga ajo që dy vendet arrijnë së bashku.
Nga ana tjetër, Ambasada amerikane dha më shumë detaje mbi përmbajtjen e takimit. Sipas saj, Wendt dhe Rama diskutuan për thellimin e bashkëpunimit në fushën e mbrojtjes, zgjerimin e tregtisë dhe investimeve, si dhe forcimin e luftës kundër krimit të organizuar.
Pas takimit me Kryeministrin, Wendt u takua me ministrin për Evropën dhe Punët e Jashtme, Ferit Hoxha, në kontaktin e parë mes tyre. Takimi ishte parashikuar edhe në agjendën zyrtare të ministrit për 30 shtatorin.
Hoxha e cilësoi Shtetet e Bashkuara si një nga partnerët strategjikë më të afërt dhe më të çmuar të Shqipërisë, duke nënvizuar vlerat e përbashkëta demokratike, partneritetin e sigurisë brenda NATO-s dhe lidhjet historike mes dy vendeve.
Në mesazhin e tij, ministri theksoi se Shqipëria synon të thellojë më tej marrëdhëniet dypalëshe me SHBA-në, veçanërisht në mundësitë ekonomike dhe investimet, sigurinë dhe stabilitetin rajonal, si dhe në koordinimin përballë sfidave globale.
Hoxha vendosi gjithashtu në të njëjtin kuadër strategjik anëtarësimin e Shqipërisë në Bashkimin Evropian dhe partneritetin transatlantik, duke i cilësuar ato si dy dimensione të politikës së jashtme shqiptare.
Eric Wendt mori zyrtarisht detyrën më 26 shtator, kur i dorëzoi Presidentit Begaj letrat kredenciale. Ai pason Yuri Kim, ndërsa prej largimit të kësaj të fundit në vitin 2023, misioni diplomatik amerikan në Tiranë ishte drejtuar nga Nancy VanHorn si e ngarkuar me punë.
Mandati i Wendt nis në një moment kur agjenda e marrëdhënieve shqiptaro-amerikane përfshin çështje të sigurisë dhe mbrojtjes, luftën kundër krimit të organizuar, si dhe zgjerimin e dimensionit ekonomik të partneritetit.
© 2026 Argumentum
