Kryeministri Edi Rama përsëriti të shtunën ftesën për dialog me protestuesit kundër qeverisë, por thirrja e tij u refuzua, ndërsa në Tiranë pritet të zhvillohet një protestë kombëtare me pjesëmarrjen e studentëve, pedagogëve dhe qytetarëve. Më pas, Rama doli në një komunikim të përbashkët për mediat me ministrin e Brendshëm, Ervin Demo, ku foli për shkaqet e protestave, të drejtën për të protestuar dhe aktet e dhunës, ndërsa ministri njoftoi vijimin e identifikimit të personave të dyshuar përmes pamjeve filmike.
Në mëngjes, Rama përsëriti ftesën për bisedime me protestuesit, duke vendosur një tavolinë dhe karrige para Kryeministrisë, me mbishkrimin “Dialog”. Protestuesit e kanë refuzuar ftesën, duke këmbëngulur në kërkesën për dorëheqjen e kryeministrit dhe të qeverisë.
Gjatë një komunikimi për mediat nga Kryeministria, Rama tha se prej katër muajsh ka dëgjuar protestuesit e mbledhur para zyrës së tij, të njohur si “Flamingot”, por sipas tij, ata nuk kanë paraqitur kërkesa konkrete dhe kanë refuzuar vazhdimisht të ulen për dialog.
“Unë i kam dëgjuar protestuesit poshtë zyrës sime për katër muaj. Unë kam dëgjuar më shumë se kushdo tjetër”, deklaroi Rama.
Ai tha se ka komunikuar me disa protestues përmes mesazheve dhe telefonit, duke i ftuar për bisedime. Sipas kryeministrit, disa prej tyre kanë shprehur dëshirën për dialog, por janë penguar nga frika se mund të cilësoheshin si tradhtarë nga pjesëmarrës të tjerë.
Rama theksoi se qeveria po punon për të adresuar shkaqet që i shtyjnë qytetarët, pavarësisht bindjeve politike, të mbështesin protestat.
“Protesta është një e drejtë që askush nuk mund ta mohojë. Liria për të protestuar është një e drejtë që çdo shtet demokratik duhet ta garantojë. Dhe rruga e protestës paqësore është rruga që çon tek dialogu”, tha ai.
Kryeministri akuzoi disa grupe se kanë nxitur dhunën gjatë protestave, duke përmendur persona të radikalizuar ideologjikisht e fetarisht, individë me precedentë penalë dhe grupin “Antifa”. Ai pretendoi gjithashtu se disa persona janë nxitur ose paguar për të shkaktuar përçarje dhe e cilësoi situatën si një përpjekje për të organizuar një “revolucion të shëmtuar ballkanik”.
Ministri Demo: Policia po analizon qindra orë filmime
Ministri i Brendshëm, Ervin Demo, deklaroi se Policia e Shtetit po përdor pamje nga mediat, rrjetet sociale dhe kamerat e institucioneve publike e private për të identifikuar personat e dyshuar për akte dhune dhe dëmtim të pronës.
Sipas tij, qindra orë filmime po analizohen me ndihmën e teknologjisë, e cila po përshpejton procesin e identifikimit, edhe në rastet kur personat kanë tentuar të fshehin fytyrën me maska.
“Ne kemi dita-ditës raste të identifikueshme, edhe kur protestuesit kanë fshehur pamjen e tyre nëpërmjet maskave”, tha Demo.
Ai shtoi se policia do t’i përcjellë Prokurorisë materialet e dokumentuara për personat që dyshohet se kanë kryer akte dhune kundër institucioneve publike dhe pronës private.
“Policia e Shtetit do të punojë çdo ditë për aq kohë sa duhet për të vënë përpara drejtësisë të gjithë ata të cilët kanë shkatërruar pronën publike dhe kanë cenuar bizneset private”, deklaroi ministri.
Demo tha se përpunimi i pamjeve vetëm përmes burimeve njerëzore do të ishte një proces i vështirë, ndërsa përdorimi i teknologjisë po ndihmon në identifikimin më të shpejtë të personave të dyshuar.
Protesta e së shtunës pritet të mbledhë studentë nga Tirana dhe qytete të tjera, pedagogë dhe qytetarë që kundërshtojnë qeverinë. Kërkesa kryesore e protestuesve mbetet dorëheqja e Ramës dhe e qeverisë së tij.
Protestat e ditëve të fundit janë shoqëruar me përplasje mes protestuesve dhe policisë, si dhe me dëmtime të pronës publike e private. Ndërsa qeveria ka përsëritur gatishmërinë për dialog dhe ka dënuar aktet e dhunës, protestuesit kanë vijuar të kërkojnë largimin e kryeministrit.
Rama ka përjashtuar dorëheqjen dhe ka argumentuar se dhuna rrezikon aspiratën e Shqipërisë për anëtarësim në Bashkimin Evropian deri në vitin 2030. Ndërkohë, Bashkimi Evropian ka dënuar dhunën, duke theksuar njëkohësisht të drejtën e qytetarëve për tubime paqësore.
© 2026 Argumentum
