Kreu i Prezencës së OSBE në Tiranë, ambasadori Berndt Borchardt deklaroi sot në edicionin e pestë të tryezës vjetore “Forumi për Zhvillimin e Medias”, se disa platforma online, abuzojnë mbi lirinë e shprehjes duke shpërndarë informacione të pavërteta tek opinioni publik.
“Media online është zhvilluar shumë kohët e fundit në krahasim me vitet e kaluara dhe kemi vënë re një zhvillim të madh të medies online. Kemi projekte tona lidhur me medien, projektet tona të fundit. Sa i përket progresit kanë qenë çështje të cilat duhet të adresohen dhe është e rëndësishme hapësira që duhet t’i jepet profesionalizmit. Kemi thirrur ekspertët për të dhënë rekomandimet për këtë çështje”, tha ambasadori Borchardt.
Borchard u ndal edhe tek rastet kur gazetarët janë kërcënuar për shkak të detyrës. Sipas tij, OSBE nuk i ka harruar ato raste, por shtoi se institucioni që ai përfaqëson është në krah të gazetarëve teksa i ftoi ata të mos ndalen në misionin e tyre në raport me të vërtetën.
“Sa i takon ndikimeve të medies”, theksoi Borchardt, “ka disa faqe në internet që përdorin informacion të ndikueshëm të anshëm dhe të pavërtetë dhe pronarët e tyre nuk dihen se kush janë dhe nuk mund të bëjmë sikur kemi harruar disa raste që gazetarët janë kërcënuar dhe ne e kemi ndjekur nga afër këtë çështje”.
“Këto çështje janë të rëndësishëm për t’u ndjekur dhe janë shumë e rëndësishme ndryshimet në ligjin mbi medien. Kemi përfaqësues për medies së lirë për të zhvilluar më në detaj dhe do japim mbështetjen tonë për profesionistët e medies. Inkurajojmë gazetarët të bëjnë më të mirën e tyre dhe ne kemi dhënë rekomandimet e tyre sa i përket medies, mbi të gjitha mbi transparencën dhe ndaj profesionalizmit në media. Këto janë disa çështje që nuk kanë të bëjnë vetëm me qeverinë, por janë detyrat që janë edhe për gazetarët”, tha Borchardt.
