Pas 25 vitesh shërbimi si baritor në Shqipëri, Mons. George Frendo, dorëzoi sot (22.01.22) zyrtarisht detyrën si si Arqipeshkv i Tiranës dhe Durrësit për t’ja besuar këtë detyrë të rëndësishme Arjan Dodaj,
Arqipeshkvi i ri i Arqidioqezës Metropolitane Tiranë-Durrës është zyrtarisht Imzot Arjan Dodaj. Përgjatë ceremonisë së shenjtë që u mbajt në Katedralen e Shën Palit në Tiranë Imzot George Frendo i kaloi detyrën e Arqipeshkvit të Kishës Katolike, Imzot Arjan Dodaj Imzot George Frendo tha se shqiptarët dhe Shqipëria do të jenë gjithmonë në zemrën e tij.
“Gjithmonë e kam dashur Shqipërinë dhe shqiptarët dhe te ky popull kam gjetur dashuri e respekt më shumë se sa meritoja. Falënderoj popullin shqiptar që u bë edhe populli im. Do largohem nga Shqipëria me keqardhje, por mu duk e drejtë t’i kaloj vitet te fundit të jetës sime në vendlindje. I drejtohem pasardhësit tim, për më shumë se 4 vite kemi punuar ngushtë bashkë. Emri yt do të përmendet në meshë çdo ditë e kjo do të thotë se nuk do jesh vetëm në zbatimin e detyrës tënde, është një dioqezë me ty. Je shumë më i ri se unë dhe je shqiptar, që do të thotë se je më i aftë se unë për të kuptuar mentalitetin, psikologjinë e kulturën e këtij vendi. Për këto avantazhe që unë nuk i kisha, le të jenë për t’u një dhuratë që të bën shumë më afër deleve që Zoti do të të dhurojë“, tha Frendo.
Në fjalën e rastit Imzot Dodaj premtoi se do të shërbejë me devotshmëri dhe do ta kryejë denjësisht detyrën, ndërsa falënderoi Imzot George Frendon për kontributin e tij.
“Duke e filluar shërbesën time baritore, të dashur besimtarë, akoma më shumë dua të rrënjosem në fenë në Krishtin, Shëlbuesin tone; e duke fiksuar vështrimin në Të, të dëftoj gjithmonë ndaj njerëzve dhe shoqërisë shqiptare: Ja Qengji i Hyjit, ja Shpëtimtari i vetëm i njeriut. Ai i jep dinjitet çdo njeriu! Në këtë shërbim të Ungjillit, në këtë Kishë Apostolike, mirënjohja ime është për paraardhësin tim Imzot George Frendo, që na ka dëshmuar një fe të gjallë me dashuri të madhe për Kishën dhe të varfrit, i angazhuar për një Kishë në ecje që së bashku me popullin e Hyjit, dëshirojmë ta çojmë përpara“, deklaroi Arjan Dodaj.
Në ceremoninë e përurimit ishin dhe drejtuesit më të lartë të shtetit dhe politikës, Presideti Ilir Meta, Kryetarja e Parlamentit Lindita Nikolla, Kryeminisri Edi Rama dhe Kryetari i Partisë Demokratike Lulzim Basha. Imzot Dodaj u duk se pati dhe një mesazh për politikën kur tha se “sa të lodhur jemi Jezus, nga zërat që ulërasin, që përçajnë, që akuzojnë, që dënojnë e ndonjëherë edhe mallkojnë duke menduar që kështu mbrojnë drejtësinë, të ardhmen dhe kombin!
Çliroji nga errësira dhe nga mashtrimi ata që kërkojnë mirëqenien nëpërmjet korrupsionit, manipulimit dhe abuzimit të përgjegjësive që iu janë besuar”.
Mons. Frendo tha se po largohet me keqardhje nga Shqipëria dhe shqiptarët që e dëshën shumë.
Frendo: Jemi mbledhur këtu për një rast shumë të veçantë dhe shumë të rëndësishëm për Arqi-dioqezën tonë, përurimin e arqipeshkvit të ri Imzot Arjan Dodaj. Duke mbaruar shërbimin tim si arqipeshkv i kësaj dioqeze përfitoj nga rasti për të falenderuar së pari Zotin që gjatë gjithë jetës sime, por veçanërisht gjatë këtyre viteve si arqipeshkv, më ka përdorur mua me gjithë mungesat dhe kufizimert e mia. Kërkoj falje prej Zotit dhe prej meshtarëve, motrave dhe besimtarëve që mund ti kem fyer me ndonjë fjalë ose gjest nga ana ime ose nuk u kam dhënë shembull të mirë si i krishterë dhe bari.
Erdhi koha të largohem nga ky vend jo se jam i mërzitur. Gjatë këtyre 25 viteve që kam shërbyer në Shqipëri nuk më ka ardhur kurrë keq që kam ardhur si misionar në këtë vend, gjithmonë e kam dashur Shqipërinë dhe shqiptarët dhe te ky popull gjithmonë kam gjetur dashuri dhe respekt më shumë sesa meritoja. Përzemërsisht falenderoj popullin shqiptar që u bë dhe populli im. Do të largohem nga Shqipëria me shumë keqardhje por mu duke e drejtë të kaloj pjesën e fundit të jetës time në vendlindjen time bashkë me vëllezërit domenikanë. Ju premtoj se do të mbeteni gjithmonë në qendrën e zemrës sime dhe do t’ju kujtoj me lutje.
Ai kërkoi një bashkëpunim më të mirë mes fesë dhe politikës për një Shqipëri më të denjë për shqiptarët.
Frendo: Gëzohem që në këtë ceremoni përveç autoriteteve civile dhe politike janë të pranishëm dhe përfaqësuesit e besimeve kryesore në Shqipëri. Shoqëria ka nevojë për politikën dhe politikanët por ka nevojë dhe për besimet. Politika mund të ndryshojë dhe përmirësojë strukturat por besimet e kanë diçka që politika nuk e ka, mund të ndryshojnë zemrat, mund të arrijnë atje ku nuk arrin dot politika. Europa, përfshirë dhe Shqipërinë, po bëhet çdo ditë e më shumë një kontinent pagan. Ne si besime të ndryshme bashkë me politikanët le të angazhohemi më shumë për një Shqipëri më të drejtë, më morale, më vëllazërore, një Shqipëri më të denjë për shqiptarët.
Pasardhësit të tij i uroi suksese, teksa i vuri në dukje dhe avantazhet kundrejt tij që janë garanci se ai do ta përmbushë me sukses misionin që i është ngarkuar.
Frendo: Shumë i dashur vëlla, për më shumë se katër vjet kemi punuar shumë ngushtë së bashku. Zoti po të beson një mision më fisnik dhe delikat. Emri yt do të përmendet në meshë çdo ditë, nuk do të jesh vetëm në zbatimin e misionit tënd. Gjatë këtyre viteve vetë vura re se Zoti të ka dhuruar shumë gjëra të bukura që të bëjnë kompetent për të kryer misionin tënd me përkushtim dhe besnikëri. Je shumë më i ri dhe shqiptar, je më i aftë se unë për të kuptuar mentalitetin, kulturën dhe psikologjinë e këtij populli.Të gjithë këto avantazhe që unë nuk i kisha le të jenë për ty dhuratë që e bëjnë një bari shumë më afër deleve që Zoti do të të dhurojë.
Kryepeshkopi i Kryedioqezës Tiranë-Durrës, Imzot Arjan Dodaj u zotua se do ta kryejë me dinjitet shërbimin ipeshkvnor.
Imzot Dodaj u shugurua meshtar nga Papa Gjon Pali II në Bazilikën e Shën Pjetrit më 11 maj 2003 dhe u mishërua në Dioqezën e Romës, si anëtar i Vëllazërisë meshtarake të Bijve të Kryqit në komunitetin “Shtëpia e Marisë”.
Pas shugurimit meshtarak kreu detyra të ndryshme baritore. Nga viti 2003 deri në vitin 2004 ka qenë zëvendës famullitar në Famullinë “Shën Domeniko Guzman”, në Romë; nga viti 2004 deri në vitin 2005, zv/rektor i rektoratit të “San Giovanni della Malva” dhe kapelan i komunitetit shqiptar në Romë; nga viti 2005 deri në vitin 2017, zëvendës famullitar i Famullisë “Shën Rafaeli Kryeengjëlli”, në Romë.
Në vitin 2017, me miratimin e peshkopit të tij, Kardinal-Vikarit të Shenjtërisë së Tij për Dioqezën e Romës, u transferua si prift fidei donum në Kryepeshkopatë Tiranë-Durrës, ku kreu këto detyra baritore: Vikar i Përgjithshëm, Famullitari “Në Zemrën e Papërlyer të Zojës” në Gramëz; Kryeparlamentari i universitetit; Sekretari i Dytë i Konferencës Ipeshkvnore Shqiptare dhe Sekretari i Përgjithshëm i Sinodit Dioqezan.
