Presidenti rus, Vladimir Putin, urdhëroi të enjten forcat e tij që të mos sulmojnë një fabrikë çeliku në qytetin ukrainas të Mariupolit, ku janë strehuar forcat e fundit mbrojtëse të Ukrainës.
Forcat e Armatosura Ruse dhe forcat e Republikës Popullore të Donetskut (DPR) kanë çliruar qytetin e Mariupolit, i raportoi të enjten presidentit Vladimir Putin ministri rus i Mbrojtjes Sergej Shoigu.
“Forcat e Armatosura Ruse dhe forcat e Republikës Popullore të Donetskut kanë çliruar Mariupolin”, tha Shoigu.
Sipas tij, pjesëtarët e mbetur të njësive nacionaliste janë strehuar në zonën industriale të fabrikës së çelikut Azovstal.
Shefi rus i mbrojtjes theksoi se regjimi i Kievit në të vërtetë e kishte shpallur Mariupolin kryeqytetin e përkohshëm të rajonit të Donetskut në vitin 2014, duke e kthyer atë në një zonë shumë të fortifikuar dhe një strehë për nacionalistët radikalë. Një sasi e madhe armësh të rënda dhe pajisje ushtarake, duke përfshirë tanke, raketa-hedhës të shumëfishtë Smerch dhe Uragan, sisteme të artilerisë së rëndë dhe sisteme raketore Tochka-U, u vendosën në qytet. Sistemi raketor ka një rreze veprimi prej 120 kilometrash, ndërsa qyteti rus i Taganrog ndodhet 94 kilometra larg Mariupolit, vuri në dukje Shoigu. Sipas ministrit të mbrojtjes, rezervat e ushqimit dhe municionit u krijuan në Mariupol si pjesë e përgatitjeve për luftime të zgjatura. Objektet kryesore të infrastrukturës së qytetit, përfshirë portin detar, u minuan.
Presidenti Putin i tha ministrit të tij të Mbrojtjes, Sergei Shoigu në një takim televiziv, se forcat ruse duhet të bllokojnë fabrikën “në mënyrë që asnjë mizë të mos mund të kalojë” dhe se vazhdimi i planeve për të sulmuar atë vend do të rrezikonte në mënyrë të panevojshme trupat ruse.
Ministri Shoigu i tha presidentit Putin se janë 2,000 trupa ukrainase në fabrikën Azovstal, por se pjesa tjetër e Mariupolit, një qytet port i rëndësishëm, ishte “çliruar”.
Fati i civilëve në qytetin e rrethuar ka nxitur shqetësimin e komunitetit ndërkombëtar dhe zëvendëskryeministrja ukrainase, Iryna Vereshchuk, tha të enjten se katër autobusë qenë në gjendje të evakuojnë civilë përmes një korridori humanitar të mërkurën.
/Argumentum.al
