Fokus
Vizita e parë zyrtare e Presidentit të Ri të Shqipërisë z. Bajram Begaj u zhvillua në Kosovë si pjesë e traditës. Megjithatë, Zoti Begaj nisur dhe nga axhenda e tij, kishte parashikuar që kjo vizitë të shkonte përtej traditës presidenciale.
“Vij në shtëpi dhe në shtëpinë e shqiptarisë si bir e vëlla, mes bijve të kësaj toke krenare dhe vëllezërve të të njëjtit identitet, aty ku shtëpia është e mikut dhe Zotit”, tha z. Begaj. Janë fjalë të mëdha që shqiptarit të moçëm do ti dukeshin si fjalë që kërkonin “BESË” .
Ndonëse në pamje të parë marrëdhëniet institucionale mes Shqipërisë dhe Kosovës janë shumë të mira dhe pritjet e tilla zyrtare janë tejet vëllazërore, por nga ana tjetër ndërmjet kryeministrave Rama dhe Kurti ka shumë ndasi e përplasje politike.
Ndaj në vizitën e tij të parë Presidenti i Republikës së Shqipërisë tentoi një “mision” përbashkues.
Presidenti Begaj zgjodhi disa simbole përbashkuese për të përmbushur jo vetëm protokollin zyrtar por si elemente që neutralizojnë çdo hendek politik ndërmjet dy vendeve.
Vizita te varri i Presidentit Ibrahim Rugova, ku ka kryer homazhe në nderim të tij- I pari President dhe themelues i Republikës, Homazhet te memoriali i Familjes Jashari, simboli i rezistencës dhe qëndresës së Kosovës, të cilët sakrifikuan jetën e tyre për pavarësi e liri. Vizita në Kompleksin e “Lidhjes së Prizrenit” e cila përbën ngjarjen më të rëndësishme deri atëherë të Rilindjes Kombëtare dhe një nga ngjarjet më madhore në historinë e popullit shqiptar.
Por ndërsa përmendim këto tre simbole përbashkuese, Presidenti Begaj u përball me tre hendeqe që shënjuan vizitën e tij zyrtare në Kosovë dhe që do të sfumonin misionin e tij si “pajtues”
– Traktati i mbrojtjes reciproke, propozuar nga Presidentja e KKosovës Znj. Vjosa Osmani.
– Refuzimi i takimit me LDK-në në selinë qendrore të saj,
– Iniciativa “Ballkani i Hapur”
Janë këto tre pika kyçe që do tregonin edhe njëherë se mes nesh janë disa çështje për të cilat duhet folur dhe punuar shumë, përndryshe do ta humbasim njëri-tjetrin.
Le ti shqyrtojmë secilën prej tyre ;
– Traktati i mbrojtjes reciproke
Presidentja znj. Vjosa Osmani gjatë konferencës së përbashkët me presidentin z. Bajram Begaj, duke falënderuar kreun e shtetin tonë tha se Shqipëria ka qenë zëri i Kosovës, aty ku nuk ka përfaqësim.
Megjithatë Presidentja tha se ka ardhur koha që Shqipëria dhe Kosova të nënshkruajnë një traktat që dy shtetet të reagojnë për mbrojtjen e përbashkët.
“Është me rëndësi që me Shqipërinë të kemi edhe një traktat për mbrojtje të ndërsjellë, me të cilin në mënyrë reciproke do të reagojmë në rast të cenimit të dy shteteve tona. Ka disa vite që e kam bërë një propozim të tillë, i cili është në harmoni me praktikat ndërkombëtare dhe aplikohet nga shumë shtete, përfshirë edhe aleatët tanë strategjik. Prandaj, mendoj se është koha që të bëjmë hapa të duhur në këtë drejtim”, ka nënvizuar presidentja.
Presidenti Begaj do të komentonte këtë propozim në një intervistë për RTK në Prishtinë duke theksuar se do të punojë fort për ta çuar përpara këtë propozim, por vendimi përfundimtar duhet të jepet nga Kuvendet e dy vendeve.
“Është një ide fillestare që duhet trajtuar me kujdes nga institucionet përkatëse, e mirëkuptoj Presidenten Osmani dhe do të punoj intensivisht që ky traktat bazuar në dritaren ligjore të avancojmë, por mendoj se kuvendet respektive do të jenë ato që do të vendosin. Mendoj se në kushtet aktuale të sigurisë, dhënia e këtij mendimi kërkon më shumë idenë që mbështetja e republikës së Shqipërisë duhet të jetë e nevojshme në momente të tilla. E kam thënë që Shqipëria do të jetë gjithmonë kontributore për sigurinë e Kosovës, dhe qenia e KFOR në Kosovë është një garanci e shtuar për sigurinë në rajon”, tha Begaj.
Duhwt thënë se ky propozim erdhi si rrufe në qiell të hapur, jo sepse Kosova nuk është në rrezik, nisur dhe nga tensionet e fundit ndërmjet Prishtinës dhe Beogradit, por si dy vende vëllezër, ky propozim nuk ka vlerë të diskutohet.
Shqipëria ka qenë gjithmonë përkrah Kosovës si një e tërë në ditët më të vështira të saj. Nuk është e nevojshme të përmedim kontributin e pashoq të Shqipërisë në vitet 97-99 ndaj Kosovës në luftën e saj për Liri.
Nga ana tjetër, NATO është garantuesi i sigurisë dhe paqes në rajon por njëkohësisht shtylla kryesore e mbrojtjes për Shqipërinë si anëtare e saj dhe e Kosovës si një vend që falë saj (Aleancës Atlantike) gëzon sot Pavarësinë .
Presidentja e Kosovës nuk duhet t’i kishte lejuar vetës provokime të tilla ndaj vëllait shqiptar, kur e gjithë propozimi i saj sfumohet me deklaraten e Presidentit Begaj.
“Jam i nderuar të jem në Prishtinë, në vizitën time të parë si President– dhe kjo jo thjesht në respekt të traditës, por si një simbolikë e natyrshme, që mishëron lidhjen tonë të pandashme dhe të pandryshueshme – e vulosur nga historia, gjuha jonë e përbashkët dhe heronjtë tanë ndër shekuj. Dy dialekte dhe një gjuhë, dy Republika dhe një komb, kjo është harta jonë e përbashkët patriotike me destinacion Brukselin dhe bashkimin tonë në aleancën EuroAtlantike.
Së bashku fituam luftën, bashkë duhet të luftojmë për të ruajtur paqen. Ky është amaneti dhe trashëgimia solemne e Ismail Qemalit dhe Isa Boletinit; e Ibrahim Rugovës dhe Adem Jasharit; e çdo luftëtari të UÇK-së, e çdo kulm-kulle në çdo pëllëmbë të kësaj toke që quhet Republika e Kosovës”, tha ne fjalene tij qe ne krye te heres President i Republikes e Shqiperise .
Ky është hendeku i parë që u përballë Presidenti Begaj gjatë vizitës së tij zyrtare në Kosovë edhe pse si bir e si vëlla, Z. Begaj tashmë duket se duhet ta provoje me fakte këtë vëllazëri mes dy vendeve tona.
-“Incidenti” me Partinë e LDK-së. Kush refuzoi takimin me kë?
Presidenti i Shqipërisë, Bajram Begaj ka refuzuar t’i takojë anëtarët e Lidhjes Demokratike të Kosovës në selinë qendrore të saj. Në një koment për mediat e Kosovës, zëdhënësja e LDK-së, Sibel Halimi tha se kjo parti ka shprehur keqardhje për mosrealizimin e takimit zyrtar me Begajn.
“Lidhja Demokratike e Kosovës shprehë keqardhje për mosrealizimin e takimit zyrtar me Presidentin e ri të Shqipërisë, shkëlqesinë e tij Bajram Begaj; me rastin e vizitës së tij të parë në Kosovë. Për dallim nga krerët institucional paraprak të Shqipërisë, Presidentët e shkuar, Kryeministrin e tanishëm, e të tjerë kryeministra paraprak, Presidenti Begaj ka refuzuar të takojë LDK-në në selinë qendrore të saj”, tha ajo.
Por cila është e verteta e mosrealizimit të këtij takimi.
Kush refuzoi të takohej me kë?
Z.Begaj tha se i bëri ftesën për Kuvend, njëjtë si të gjithë partive të tjera, por LDK kërkoi që takimi të zhvillohej në selinë e partisë. Presidenti tha se kishte dëshirë që të bënte bashkë të gjithë liderët e partive politike, por ishte e pamundur.
“Unë jam Presidenti i Republikës së Shqipërisë dhe erdha në Kosovë për të biseduar si në shtëpinë time, doja t’i mbaja këto takime aty që është edhe tempulli politik, në Kuvendin e Kosovës. Ftesa ime ka qenë mjaft e qartë, në Kuvendin e Republikës së Kosovës. Në përgjigjen e LDK, thuhet se Presidenti i Shqipërisë ishte i mirëpritur në godinën e LDK, aktualisht ftesa ishte e bëra nga ana jonë, nga protokolli i Kuvendit të Kosovës dhe takimet ishin të paracaktuara. Unë erdha me ftesë të Presidentes së Kosovës dhe doja që takimet të bëheshin në nivelin që i takon Presidentit. Personalisht doja që takime mes partive politike shqiptare të bëheshin bashkë jo të ndara, nuk ia arrita dot, mision i pamundur, i takova veç e veç”, tha Begaj për RTK.
Dukej se Z.Begaj ka dashur të diktoje “rregullat” si ish-Gjeneral, por LDK, Partia e Ibrahim Rugovës që i dha Kosovës Demokracinë dhe Lirinë nuk iu “nënshtrua “ Presidentit të Shqipërisë.
Ky incident tregon jo vetem për një mungesë të theksuar respekti të dyanshëm por dhe një mungesë “vëllazërie” që shumë trumbetohet por pak faktohet.
“Open Ballkan”
Duhet thënë se vizita e parë e kreut të ri të shtetit shqiptar u prit me shume vëmendje në Kosovë dhe në Shqipëri, edhe për të parë qëndrimin e tij lidhur me iniciativën ” Ballkani i Hapur”. Një iniciative që refuzohet bindshëm nga pala e Kosovës.
Ndonëse gjatë konferencës me homologen e tij znj. Osmani, Presidenti Begaj nuk e komentoi këtë iniciative, ai ka folur rreth kësaj teme për Radio Televizionin e Kosovës.
Kreu i shtetit shqiptar tha se duhet inkurajuar çdo nismë rajonale ku shqiptarët janë bashkë, duke i bërë një thirrje të drejtpërdrejtë Kosovës që të bëhet pjesë e Ballkanit të Hapur
Pas viteve ‘90 Shqipëria ka qenë faktor stabiliteti, Ballkani i Hapur nuk ka personalizim apo pronar. Nëse do të jetë një nismë që do të mbetet në planin gjithëpërfshirës dhe me pjesëmarrjen e 6 vendeve të Ballkanit me interesa qartësisht ekonomike, duhet të përfitojnë të gjithë. Është e duhura. Kosova e Shqipëria kanë qëndrime të ndryshme por kjo sjell diversitetin dhe zhvillimin. Çdo iniciativë rajonale ku shqiptarët janë bashkë duhet përkrahur. Duhet kohë të jemi bashkë edhe në këtë. Çdo iniciativë që ka në thelb përfitime ekonomike dhe mirëqenien e popullit them është e mirëpritur”, u shpreh ai.
Asnjë surprizë as ketej dhe as matanë kufirit, duke ditur mbështjen që kryeministri Rama i ka dhënë Presidentit Begaj, por le të themi që kjo ishte një provë për Presidentin e ri për të parë qasjen e tij ndaj kësaj iniciative.
Një hendek që Z. Begaj nuk e kapërceu dot por vetëm e thelloi më shumë.
Kjo vizitë zyrtare e Presidentit të Shqipërisë në Kosovë vetëm sa konfirmoi përplasjet dhe ndasitë politike ndërmjet dy shteteve tona që janë një Komb. E duke qenë se jemi bijtë e një Kombi, interesi kombëtar duhet të prevaloje mbi atë politik…vetëm kështu mund ta mbrojmë njëri-tjetrin andej dhe këtej Drinit!
© 2022 Argumentum
