Sot mbarë bota kujton humanisten e madhe shqiptare, Nëna Terezë që me dashurinë saj për të varfërit u bë NENA e gjithë botës.
Sot më 5 shtator përkujtojmë 25 vjetorin e ndarjes nga jeta e Nënë Terezës dhe 6 vjetorin e shenjtërimit të saj nga Papa Françesku.
Pikërisht në këtë 6-vjetor të Shenjtërimit të Nënë Terezës, Vatikani e kujton shenjtorën shqiptare me një monedhë të veçantë.
Selia e Shenjtë do të nxjerrë monedhën me vlerë 2 euro, që mban portretin e Nënë Terezës. Monedha është realizuar nga artistja Orietta Rossi.
Në anën e pasme është Nënë Tereza duke mbajtur në krahë një fëmijë indian. Ky imazh është ndoshta emblema e përsosur e përkushtimit që Nënë Tereza u ofroi njerëzve më të varfër për të lehtësuar vuajtjet e tyre në minimum. Rreth figurës, për më tepër, gjejmë në krye mbishkrimin “NËNË TERESA E KALKUTËS” dhe në fund “CITTÁ DEL VATICANO”. Në pjesën e drejtë, më në fund, janë datat “1997-2022”.
Nënë Tereza, e vlerësuar me Çmimin Nobel për Paqen në vitin 1979, shpallur e Lume nga Papa Gjon Pali II në vitin 2003 dhe shenjte nga Papa Françesku më 4 shtator 2016
Papa Françesku, njohu dy mrekullitë e saj, të shërimit të të sëmurëve pas vdekjes së saj më 1997.
Murgesha “u lumturua” në tetor të vitit 2003, nga Papa Gjon Pali II. Ai miratoi mrekullinë e parë pas vdekjes së saj. Një grua 30-vjeçare në Kolkata tha se ajo u shërua nga një tumor në stomak pas lutjeve të Nënë Terezës. Një komitet i Vatikanit tha se nuk mund të gjente asnjë shpjegim shkencor për shërimin e saj dhe e shpalli atë një mrekulli.
Më 5 shtator 2016, Në një ceremoni madhështore në Sheshin “Shën Pjetri” në Vatikan, Papa Françesku, njohu dy mrekullitë e Nënë Terezës, të shërimit të të sëmurëve pas vdekjes së saj më 1997.
“Me gjak, unë jam shqiptare. Me shtetësi, jam indiane. Me besim, unë jam një murgeshë Katolike. Sipas profesionit tim, unë i përkas botës. Për nga zemra ime, unë i përkas plotësisht Zemrës së Jezusit”, janë fjalët e thëna nga Nënë Tereza, që jetën e saj ia përkushtoi të varfërve.
Anjezë Gonxhe Bojaxhiu, që më vonë e ndryshoi emrin në Nënë Tereza, lindi me 1910 nga prindër shqiptarë. Ajo i mori mësimet e para në një shkollë në qytetin e Shkupit dhe në moshën 18 vjeçare u dorëzua murgeshë. Pasi u specializua në Irlandë u vendos në Indi, ku në vitin 1950 themeloi urdhrin e saj të murgeshave të quajtur Misionarët e Bamirësisë.
Nga ky moment Nenë Tereza do të bëhej nënë e të gjithëve dhe jetën e saj do t’ia dedikonte tërësisht të varfërve. Urdhri i Nënë Terezës numëron mbi 4000 misionarë dhe është shtrirë në mbi 100 vende të botës. Nëne Tereza nuk e pranoi asnjëherë famën. Ajo ka thënë se gjithçka e bënte për hir të dashurisë së Zotit.
Nënë Tereza udhëtonte për të kryer misionin e saj me një automjet gjysmë të shkatërruar. Kur Papa Pavli VI kryente një vizitë në Indi në 1964 i dhuroi asaj limuzinën e tij. Ajo e shiti atë për të siguruar fonde për koloninë e lebrozëve, të cilët i ndihmonte.
Liderë nga e gjithë bota e kanë vizituar atë. Ish-kryeministri i Indisë, Indira Gandi, pas takimit u shpreh se: “Të takosh Nënë Terezën do të thotë të përjetosh ndjenjën e inferioritetit dhe atë të pushtetit të madh të mirësisë dhe të fuqisë së dashurisë”.
Ajo vazhdoi me vetëmohim të predikonte mesazhin e saj të dinjitetit njerëzor dhe respektit për çdo qenie njerëzore të lindur apo jo.
Kur mori çmimin Nobel për Paqe në vitin 1979 ajo bëri këtë apel: “Shkatërrimtari më i madh i paqes së sotme është thirrja e një fëmije të pafajshëm ende të palindur. Nëse një nënë vret fëmijën që mban në barkun e saj, atëherë çfarë mbetet për ty dhe mua?
Lutja e Shenjtës Nënë Terezë
“Lutja ime për secilin prej jush
është që ju të jeni vetëm të Jezusit nëpërmjet shën Marisë.
O Shën Mari, ma jep zemrën tënde kaq të mrekullueshme,
kaq të pastër, kaq të papërlyer,
zemrën tënde kaq të mbushur me dashuri e përvuajtëri
që të më bëjë të denjë ta marr në zemër Jezusin
me anë të Bukës së Jetës dhe ta dua atë ashtu si e do ti
dhe t’i shërbej atij në fytyrat e çpërfytyruara të të varfërve.
O Shën Mari, Nënë e Jezusit, bëhu Nëna ime tani.
O shën Mari, Nëna e Jezusit,
më ndihmo që të jem e pastër dhe e përvuajtur si Ti,
sepse dua të jem shenjte dhe e këndshme
për Trininë Shenjte, ashtu siç ishe, siç je Ti.
T’i kërkojmë Zojës sonë të na japë zemrën e saj,
kaq të papërlyer, kaq të pastër për ta dashur Jezusin
që të bëhemi të denjë për ta marrë Jezusin
nëpërmjet bukës së jetës
dhe pamjes së çpërfytyruar të të varfërve.
(Nënë Tereza)
Në 6-vjetorin e kësaj ngjarjeje të shënuar, politikanë dhe autoritete shtetërore përcollën mesazhe.
Kryeministri Rama uroi shqiptarët në këtë ditë të shenjtërimit të gruas së paqes në botë, shqiptares Nënë Tereza.
Presidenti i Republikës, Bajram Begaj uroi sot ditën e shenjtërimit të Nënë Terezës.
“Shenjt Tereza e Kalkutës, dëshmi e gëzimit, që buron nga dashuria për jetën dhe për madhështinë e dinjitetit njerëzor”, u shpreh Begaj në një postim në rrjetet sociale.
“Bija shqiptare është simbol i mohimit të privilegjit vetjak dhe shërbimit të pakursyer ndaj të vuajturit, të uriturit, të pamundurit e të harruarit”, theksoi Begaj.
“Në një botë, që rend drejt materiales, shembulli i saj na fton të shohim brenda vetes, brenda familjeve dhe shoqërive tona për të kultivuar dashurinë për tjetrin dhe vlerat më të mira shpirtërore të popullit tonë, të cilat Nënë Tereza i ka lartësuar si askush tjetër në botë”, nënvizoi Begaj.
“E sotmja duhet të jetë një ditë reflektimi për secilin prej nesh për më shumë solidaritet për të afërmin, dashuri për njëri-tjetrin dhe shërbim për vendin!”, përfundoi Presidenti i Republikës, Bajram Begaj.
Xhaçka: Sa më shumë punë e solidaritet në shembullin e kësaj gruaje të jashtëzakonshme
Ministrja për Evropën dhe Punët e Jashtme, Olta Xhaçka uroi sot ditën e Shenjtërimit të Nënë Terezës.
“Sot, 6 vjet nga Shenjtërimit i Nënë Terezës. Një ditë që na bën të ndihemi krenarë e duhet të na frymëzojë të gjithë për sa më shumë punë e solidaritet në shembullin e kësaj gruaje të jashtëzakonshme”, theksoi Xhaçka në një postim në rrjetet sociale.
“Mirënjohja ndaj Shenjt Tereza e Kalkutës për të gjithë kontributin e saj për të varfërit është jetësuar përmes statujave të saj që gjenden në mbi 30 shtete të botës”, u shpreh Xhaçka.
Kryetari i Partisë së Lirisë Ilir Meta ka përcjellë një mesazh në 6-vjetorin e shenjtërimit të Nënë Terezës.
Në një postim në rrjetet sociale, Meta thekson se “Shën Nënë Tereza, simboli i jashtëzakonshëm i nënës shqiptare është frymëzimi që na nxit çdo ditë për të bërë gjëra të vogla me dashuri të madhe”.
“Kremtimi i Shenjtërimit të Nënë Terezës na kujton sot rëndësinë e shërbimit me dashuri, përulësi dhe përkushtim ndaj kujtdo që ka nevojë për ndihmë, solidaritet dhe përkrahje sociale, si dhe për t’u angazhuar fuqimisht për rikthimin e shpresës për një jetë dinjitoze, për të hapur horizonte të reja shprese dhe lumturie, për të ndërtuar një Shqipëri më të drejtë, më të dhembshur dhe pranë halleve të përditshme të qytetarëve”, shkruan Meta.
Ish-kryeministri Sali Berisha
“Sot dita e Shen Terezes!
Te dashur miq, sot mbare kombi shqiptar dhe katoliket ne Shqiperi dhe kudo ne bote, perulen me adhurim para shenjtores shqiptare shen Terezes. Ata nderojne shejtoren qe me virtutet e rralla te shpirtit te saj, dashurine, dhembshurine, perkushtimin dhe besimin e pakufishem te Krishti Mbret arriti te meritoje me te lartin titull, ate te Nenes se mbare njerezimit dhe pushtoi si askush tjeter per se gjalli zemrat e njerezve te te gjitha rracave e besimeve.
Ajo gjithashtu u nderua me çmimin Nobel dhe u be gruaja me e famshme e shekullit te saj. Rregjimi barbar i Enver Hoxhes i ndaloi Nene Terezes per dekada ardhjen ne Shqiperi, kurse neo-bllokmeni Edvin Kristaq Rama per te shprehur urrejtjen aterore ndaj shqiptares me te madhe te kohrave ne nje vendim antikombetar i hoqi shtatoren e tij nga kryeqyteti i vendi duke fyer keshtu mbare kombin shqiptar.
Une ju ftoj ju te dashur miq te shprehim nje mirenjohjen me te thelle Shen Terezes qe lartesoje sa askush tjeter emrin e shqiptarit dhe ka frymezuar e do frymezoje gjithmone dashurine, meshiren, dhimbeshurine si virtutet me larta e me te fuqishme te njeriut dhe njerezimit.”-shkruan Berisha.
/Argumentum.al
