SHBA dhe Shqipëria forcojnë bashkëpunimin në luftën kundër krimit ndërkufitar
235 profesionistë të zbatimit të ligjit nga Shtetet e Bashkuara, Shqipëria dhe vende të ndryshme të Europës morën pjesë në Sesionin e 42-të të Trajnimit të Vazhdueshëm të Kapitullit Europian të FBINAA-së, zhvilluar nga 19 deri më 23 shtator.
Në një postim në Facebook, Ambasada e SHBA-së në Tiranë thekson se aktiviteti bashkoi drejtues të lartë të strukturave ligjzbatuese, të trajnuar në Akademinë Kombëtare të FBI-së, me synim shkëmbimin e ekspertizës dhe forcimin e bashkëpunimit ndërkombëtar në luftën kundër krimit të organizuar.
“Kur Shtetet e Bashkuara dhe Shqipëria qëndrojnë së bashku, komunitetet tona janë më të sigurta”, thuhet në postimin e ambasadës.
Sipas ambasadës, FBINAA shërben si një platformë për forcimin e lidhjeve mes drejtuesve të institucioneve ligjzbatuese dhe për përmirësimin e bashkëpunimit në përballjen me krimin përtej kufijve.
“Qëllimi ynë është i qartë: zbatim më i fortë i ligjit, siguri më e madhe dhe komunitete më të sigurta në Shtetet e Bashkuara dhe në Shqipëri”, thekson Ambasada amerikane.
Foto Galeri:
© 2026 Argumentum
