Nën kujdesin e Ambasadës së Türkiye-s në Tiranë është organizuar ceremonia përkujtimore për përvjetorin e gjashtë të tentativës për grusht shteti në Türkiye, tentativë e ndërmarrë nga organizata terroriste FETO, ditë që shënohet si Dita e Demokracisë dhe Unitetit Kombëtar, raporton Anadolu Agency(AA).
Në aktivitetin e organizuar tek Memoriali i Dëshmorëve të 15 Korrikut në Parkun e Madh të Liqenit Artificial në Tiranë, ishin të pranishëm ambasadori i Türkiye-s në Tiranë, Tayyar Kağan Atay, drejtori i Institutit “Yunus-Emre”-Tiranë, Ömer Osman Demirbaş, koordinatorja e Agjencisë Turke për Bashkëpunim dhe Koordinim (TIKA) në Tiranë, Emine Gizem Başkan, zyrtarë të tjerë të institucioneve turke, përfaqësues të organizatave të shoqërisë civile, qytetarë turq dhe qytetarë shqiptarë.
–“FETO përbën një kërcënim serioz për sigurinë e shteteve”
Ambasadori Atay në fjalën e tij në aktivitet tha se janë mbledhur sot për të mbajtur të gjallë kujtimet e 251 qytetarëve turq që ranë dëshmorë duke i rezistuar tentativës të pabesë dhe të përgjakshme të grushtit të shtetit nga organizata terroriste FETO, natën e 15 korrikut 2016.
Duke kujtuar bombardimin e institucioneve turke nga puçistët, si Parlamentin, Kompleksin Presidencial, strukturat e policisë dhe të tjera, ambasadori turk tha se kanë kaluar gjashtë vite nga tentativa e dështuar për grusht shteti të FETO-s dhe gjatë kësaj kohë Türkiye po lufton këtë organizatë terroriste si në Türkiye, ashtu edhe jashtë saj, në shtete e tjera ku ndodhet.
“FETO, e cila ka humbur shtyllën kurrizore në vendin tonë tani po përpiqet të mbijetojë duke përdorur strukturën e saj jashtë vendit. Për këtë arsye, përbën një rëndësi të veçantë nga pikëpamja e ndërgjegjësimit të miqve tanë ndaj kërcënimit të FETO-s për sigurinë e tyre kombëtare dhe rendin kushtetues”, tha ai.
Ambasadori Atay theksoi se qeveria turke prej vitesh kërkon ekstradimin e kreut të organizatës terroriste FETO, Fetullah Gülen, nga SHBA si anëtarëve të tjerë të FETO-s nga vendet evropianë drejt Türkiye, duke shtuar se “Fatkeqësisht këto kërkesa ende nuk janë përmbushur”.
“Dua të nënvizoj faktin se FETO përbën një kërcënim serioz për sigurinë e shteteve në të cilat ushtron aktivitet. Në këtë kontekst, për fat të keq Shqipëria është një nga vendet ku FETO ruan praninë e saj, veçanërisht në sektorin e arsimit dhe shëndetësisë. Nga ana tjetër, një numër në rritje i qeverive të botës e kuptojnë rrezikun që paraqet kjo organizatë terroriste për veten e tyre dhe po ndërmarrin hapat e nevojshëm”, tha ai.
Ambasadori turk shtoi më tej se FETO gjithashtu angazhohet në aktivitete të paligjshme, si mashtrime, pastrim parash dhe kontrabandë armësh, duke shtuar se si rezultat i kësaj, anëtarët e FETO-s po spastrohen nga sektori publik dhe privat në shumë shtete.
“Pas vitit 2016, shumë shkolla jashtë vendit që ishin të lidhura me këtë organizatë terroriste i kaluan në administrim Fondacionit Turk Maarif. Sot Shkollat e Fondacionit Maarif funksionojnë në shumë shtete dhe tashmë me aktivitetet e tyre ofrojnë një arsim të cilësisë së lartë në rangun botëror”, tha ambasadori Atay.
Ambasadori Atay u shpreh se lufta kundër FETO-s do të vazhdojë me një vendosmëri të madhe dhe theksoi se gjithashtu kjo është e nevojshme të kryhet nga të gjithë vendet ku ka prezencën organizata terroriste FETO.
– “Ngjarjet e hidhura të 15 korrikut 2016 janë një leksion i madh jo vetëm për Türkiye-n, por për demokracinë e çdo vendi”
Në emër të organizatave të shoqërisë civile përshëndeti Petrit Zeneli, kryetar i Shoqatës Atdhetare Kulturore të Krahinës së Vakëfeve, Korçë, i cili tha se rimblidhen sot në të njëjtin vend për të përkujtuar dhe nderuar mes emocionesh e lotësh ngadhënjimin mbi tentativën e dështuar për grusht shteti nga ana e grupimit të fshehtë komplotisto-terrorist gylenist.
“Është i gjashti vit ky që ndiejmë dhimbje e pikëllim, si të jemi para Bashkisë së İstanbul-it famëmadh, para detit të fotografive të martirëve, përshfaqur njëri më i ri se tjetri, njëri më i bukur se tjetri, njëri më i qeshur se tjetri, por që, fatkeqësisht, dora gjakatare puçiste e lëvizjes FETO ua preu në mes udhëtimin e jetës, ëndrrat e bukura të asaj mbrëmjeje ngazëlluese vere”, tha Zeneli.
Duke folur për tentativën për grusht shteti, Zeneli tha se ishte cenuar rendi kushtetues i një prej fuqive më të mëdha demokratike, ushtarake dhe ekonomike, të globit, i superfuqisë rajonale, garancisë për paqe dhe siguri, duke shtuar se “Ndaj, pa dallime politike, fetare e gjeografike lindje e perëndim, të gjithë u gjendën në përkrahje të popullit të madh turk dhe të presidentit Erdoğan. Ngjarjet e hidhura të 15 korrikut 2016 janë një leksion i madh jo vetëm për Türkiye-n, por për demokracinë e çdo vendi në botë”./AA