Ambasadori i Ukrainës në Shqipëri, Volodymyr Shkurov në një intervistë ekskluzive për VOX News me gazetarin Erion Habilaj flet për luftën që ka nisur Rusia ndaj vendit të tij, situatën që ndodhen qytetet ukrainase, refugjatët, si dhe ndihmat që po jep Perëndimi. Shkurov tregon arsyet pse Vladimir Putin ka nisur këtë luftë që po shkakton me mijëra viktima dhe çfarë pritet të ndodhë në vijim. Ambasadori Shkurov vlerëson qëndrimin e Shqipërisë ndaj popullit ukrainas dhe thotë se Putin kërkon që në vitin 2022 të vizatojë kufijtë e Europës me tanke. I pyetur për pavarësinë e Kosovës, ambasadori i Ukrainës thotë se për momentin fokusi është përballja me luftën dhe në një moment tjetër do të rishikohet qëndrimi edhe për Kosovën, ndërsa nuk nguron ta falënderojë Prishtinën për mbështetjen që ka treguar ndaj Ukrainës.
Vox News: Zoti Ambasador faleminderit që gjetët kohë për të zhvilluar këtë bisedë. Janë bërë më shumë se katër muaj që nga koha që Rusia ka nisur një sulm ushtarak ndaj vendit tuaj. Në gjykimin tuaj përse në vitin 2022 Rusia përdor forcën dhe tenton të pushtojë një vend të pavarur?
Volodymyr Shukrov: Ju faleminderit! Nuk është e lehtë t’i përgjigjesh pyetjes suaj, pasi duket si një pyetje retorike. Shumica dërrmuese e njerëzve në mbarë botën nuk arrin ta kuptojnë pse në vitin 2022 Rusia po përdor forcën dhe po përpiqet të pushtojë një vend të pavarur. Duket se, udhëheqja e lartë e Rusisë jeton ende në të kaluarën dhe përpiqet të realizojë ambiciet e veta perandorake në këtë mënyrë. Duket vërtet e tmerrshme kur, në mijëvjeçarin e tretë, dikush po përpiqet më anë të tankeve të vizatoj kufijtë në kontinentin evropian. Por kjo nuk është vetëm një luftë, është një përpjekje për të zhdukur popullin ukrainas, pasi çdo ditë Rusia, përmes sulmeve me raketa vret popullsinë civile në rajone të ndryshme të Ukrainës. Në fakt, territore të sigurta, nuk kemi ne sot.
Lidhur me konstatimin e analistëve ndërkombëtarë të cilët shohin këtë luftë të Rusisë si një përpjekje të Vladimir Putin për të rikthyer lavdinë e ish-Bashkimit Sovjetik, Ambasadori thotë se për lidershipin rus, rënia e Bashkimit Sovjetik rezultoi vërtet një tragjedi.
“Mund të pajtohemi me këtë qëndrim të analistëve ndërkombëtarë. Për lidershipin rus, rënia e Bashkimit Sovjetik rezultoi vërtet një tragjedi. Natyrisht, Rusia do të donte të vazhdonte të mbante Ukrainën dhe pjesën tjetër të ish-republikave sovjetike në sferën e saj tradicionale të ndikimit. Nëse marrim parasysh argumentet e lidershipit rus, atëherë i bie se është politika e zgjerimit të NATO-s që shkaktoi atë që po ndodh tani, por kohët e fundit është e vështirë për t’i kuptuar ato, pasi shkaqet që ata parashtronin u rrezuan gjatë kësaj lufte dhe po shfaqen argumente gjithnjë me të reja. Megjithatë, a nuk ka të drejtë një shtet i pavarur, në këtë rast – Ukraina, të zgjedhë në mënyrë të pavarur rrugën e zhvillimit të tij dhe formën e garancive të sigurisë së tij”?
Sa i përket perceptimit publik se sulmi rus ndaj Ukrainës ka bashkuar më shumë Perëndimin, siç është Bashkimi Europian ashtu dhe vendet e NATO-s. Dhe nëse ky bashkim në interes të Ukrainës, dhe a jeni të kënaqur nga reagimi i NATO-s për të frenuar agresionin rus ndaj vendit tuaj Ambasadori Shkurov përgjigjet kështu:
Agresioni i Rusisë kundër Ukrainës vërtet kontribuoi në bashkimin e vendeve të BE-së dhe NATO-s. Ukraina po merr një ndihmë të fuqishme si në sferën e mbrojtjes ashtu edhe në aspektin financiar. Aktualisht, NATO vepron si një garantues i sigurisë së Ukrainës në kundërshtimin e saj ndaj agresorit rus. Është e dukshme edhe pjesëmarrja e vendeve të BE-së dhe NATO-s në zhvillimin e mekanizmave për rindërtimin e Ukrainës pas luftës. Shembull i këtij uniteti dhe bashkëpunimi është edhe konferenca ndërkombëtare për rimëkëmbjen e shtetit tonë e cila po zhvillohet në 4-5 korrik në qytetin zviceran të Luganos.
Gjithashtu, dua të shtoj se Platforma e Rimëkëmbjes së Ukrainës do të përbëhet nga tre nivele:
– I pari, niveli i lartë, ku do të përfaqësohen liderët e shteteve.
– I dyti, grupi i Përbashkët Koordinues, i cili do të përfshijë krerët e pushtetit ekzekutiv dhe vendimmarrës (“decisionmakers”) nga Ukraina, SHBA, BE, Britania e Madhe, Polonia dhe vende të tjera partnere.
– I treti, grupi tematik nga fushat e industrisë. 24 grupe të Këshillit Kombëtar për Rindërtimin e Ukrainës.
Ambasadori Shkurov vlerëson dhe shpreh mirënjohje të veçantë, për popullin e Shqipërisë për mbështetjen që po u jep popullit të Ukrainës.
” I jemi mirënjohës Shqipërisë për solidaritetin dhe mbështetjen ndaj Ukrainës si në nivel bilateral ashtu dhe shumëpalësh. Pozicioni solidar i Shqipërisë me Ukrainën është veçanërisht i dukshëm në Këshillin e Sigurimit të OKB-së, ku Shqipëria kryeson aktualisht si një anëtare jo e përhershme e Këshillit të Sigurimit të OKB-së. Shqipëria ofron ndihmë humanitare Ukrainës, merr pjesë në zhvillimin e mekanizmave për rindërtimin e vendit tonë pas luftës. Për të gjitha këto kryeministri i Shqipërisë Edi Rama foli me Presidentin e Ukrainës Volodymyr Zelenskyi dhe kryeministrin e Ukrainës Denys Shmyhal më 15 qershor, gjatë vizitës së tij zyrtare në Ukrainë. Një mirënjohje të veçantë, dëshiroj të shpreh për popullin e Shqipërisë për mbështetjen që po u jep popullit të Ukrainës”.
Ndërsa sa i përket Kosovës i pyetur nga VoxNews nese ka ardhur momenti i një qasje tjetër dhe të njihni Kosovën si një shtet i Pavarur, Ambasadori i Ukrainës në Tiranë thotë se për njohjen e pavarësisë së Kosovës, mund të flitet në një fazë të mëvonshme, duke shprehur mirënjohën ndaj Kosovës për solidaritetin dhe mbështetjen e Ukrainës në luftën e saj kundër agresorit rus.
“Çështja e njohjes së Kosovës është ngritur vazhdimisht. Gjithashtu, këtë çështje e ngriti edhe kryeministri Edi Rama gjatë vizitës së tij në Kiev më 15 qershor. Ukraina po monitoron me vëmendje situatën në Ballkan, veçanërisht në rajonin e Ballkanit Perëndimor. I jemi mirënjohës Kosovës për solidaritetin dhe mbështetjen ndaj Ukrainës në luftën e saj kundër agresorit rus. Tani është e rëndësishme për ne të dalim nga zjarri i luftës. Për njohjen e pavarësisë së Kosovës, mund të flitet në një fazë të mëvonshme”.
/Argumentum.al