Nga Eljanos Kasaj
Më 12 korrik, në sesionin e 47-të të Komitetit të Trashëgimisë Botërore të mbajtur në Paris, u mor vendimi për të përfshirë objektin kulturor rus “Pikturat shkëmbore të Shpellës Shulgan-Tash/Наскальная живопись пещеры Шульган-Таш” në Listën e Trashëgimisë Botërore të Organizatës së Kombeve të Bashkuara për Arsim, Shkencë dhe Kulturë (UNESCO).
“Pikturat shkëmbore në shpellën Shulgan-Tash në Federatën Ruse janë në Listën e Trashëgimisë Botërore të UNESCO-s”, tha organizata zyrtare në një deklaratë të botuar në platformën X.
Shpella Shulgan-Tash (ose e njohur ndryshe si “Shpella Kapova/Капова пещера”), e vendosur në Rezervatin Natyror Shulgan-Tash,në distriktin e Bruzjanskijt(Бурзянский район) të Republikës së Bashkortostanit(Башҡортостан Республикаһы ), është një vend unik arkeologjik me rëndësi të madhe në Federatën Ruse por dhe në botë.
Ky sajt është një depo e pikturave shkëmbore më të lashta të Euroazisë Veriore, e cila përfshin më shumë se 200 imazhe unike të njerëzve, kafshëve dhe shenjave gjeometrike krijuara në kushte të ngrirjes së përhershme mosha e të cilave varion nga 16,000 deri në 20,000 vjet më parë. Pikturat shkëmbore të zbuluara në këtë shpellë janë shembulli i vetëm i artit shpellor paleolitik në Rusi dhe Evropën Lindore.
Siç vuri në dukje Rinat Aljautdinov(Ринат Жафярович Аляутдинов), përfaqësuesi i përhershëm i Federatës Ruse në UNESCO, gjatë fjalimit të tij në seancë, “më shumë se 200 imazhe shumëngjyrëshe të krijuara 16,000 vjet më parë mund të konsiderohen me të drejtë një trashëgimi e përbashkët”. “Ky sajt është një kujtesë për unitetin e origjinës shpirtërore të njerëzimit, i cili manifestohet në diversitetin e kulturave të barabarta të popujve të ndryshëm”, theksoi më tej diplomati.
Nga ana tjetër, deputeti i Asamblesë Shtetërore të Republikës së Bashkortostanit dhe kreu i grupit të punës për përgatitjen e dosjes të nominimit së sajtit historik, zoti Danir Gainullin(Данир Гайнуллин), duke folur në seancën e UNESCO-s, theksoi se shpella Shulgan-Tash është një objekt unikal. “Për popullin Bashkir, ajo ka qenë dhe mbetet një vend i shenjtë që nga kohërat e lashta. Dhe tani ne, së bashku me popullsinë vendase, vazhdojmë të punojmë për të ruajtur trashëgiminë tonë për brezat e ardhshëm.”
Pikturat shkëmbore të Shpellës Shulgan-Tash” janë sot oficialisht objekti i 34-t rus në regjistrin prestigjioz të tarshëgimisë botërore së UNESCO-s.
/Argumentum.al
