Kryetari i grupit parlamentar të Partisë Socialiste, Taulant Balla uroi sot 100-vjetorin e vendosjes së marrëdhënieve diplomatike mes Shqipërisë dhe Mbretërisë së Bashkuar.
Balla tha se “marrëdhëniet dhe bashkëpunimi me Mbretërinë e Bashkuar janë sot në një nivel të shkëlqyer, në dobi të forcimit të shtetit ligjor dhe të parimeve të ekonomisë së tregut, të ruajtjes së stabilitetit, paqes e prosperitetit në rajonin tonë e më gjerë si dy vende aleate anëtare të NATO-s, si edhe në kuadër të OKB, OSBE, KiE etj”.
“Gjatë kohës si anëtare e BE-së, por edhe pas brexit, Britania e Madhe ka mbështetur dhe mbështet anëtarësimin e Shqipërisë në Bashkimin Europian. Shqetësimi më shumë i fryrë artificialisht në media sesa numrat realë, për rritje të numrit të shqiptarëve që po shkojnë në Mbretërinë e Bashkuar, po adresohet me përgjegjësi nga dy qeveritë tona, të cilat po punojnë bashkërisht për t’u treguar njerëzve se ka alternativa, qoftë këto të lidhura me mundësitë e vlefshme brenda Shqipërisë apo përmes rrugëve të ligjshme të punësimi apo bashkimit familjar, për të hyrë në Mbretërinë e Bashkuar”, tha ai.
Ne, vijoi Balla, “përulemi me mirënjohje ndaj komunitetit të madh shqiptar që jeton prej vitesh në ishull, të cilët duhen vlerësuar për kontributin që japin çdo ditë në jetën ekonomike dhe sociale të Mbretërisë së Bashkuar”.
“Deklarata diskriminuese me natyrë ksenofobe të ndonjë politikani britanik për interesa afatshkurtra apo nga media të caktuara, janë të papranueshme. E sigurt është se asgjë nuk mund ta zbehë faktin se miqësia mes dy popujve shqiptarë dhe britanikë mbart gjithmonë vlera të jashtëzakonshme”, shtoi ai.
Balla bëri po ashtu një historik të shkurtër që nga vendosja e marrëdhënieve diplomatike në vitin 1921.
“Procesi i vendosjes së marrëdhënieve diplomatike mes dy vendeve tona mori udhë që prej nëntorit 1921 kur Konferenca e Ambasadorëve në Paris mori vendimin final për Shqipërinë, statusin dhe kufijtë e shtetit shqiptar. U vendos që ky vendim të bëhej publik më 9 nëntor 1921. Një ditë para, pra më 8 nëntor 1921, me udhëzimin e Foreign Office, diplomati me shumë eksperiencë Harry Eyres i paraqiti qeverisë shqiptare notën zyrtare përmes së cilës konfirmohej njohja e Shqipërisë shtet i pavarur dhe sovran nga ana e Britanisë së Madhe. Në janar 1922 diplomati Harry Eyres u emërua si Ministër Fuqiplotë dhe i Jashtëzakonshëm i Mbretërisë së Bashkuar në Shqipëri”, shkruan Balla në rrjetet sociale.
Balla vlerëson se në këto 100 vite miqësia mes dy vendeve tona ka pasur momentet e veta të mira, por edhe të vështira. Megjithatë, sipas tij, “miqësia mes dy popujve mbart gjithmonë vlera të jashtëzakonshme”.
“Shqipëria ka vlerësuar dhe vlerëson gjithmonë rolin e oficerëve britanikë në mbështetjen që i dhanë forcave partizane në kuadër të Ushtrisë Nacional Çlirimtare gjatë Luftës së Dytë Botërore. ‘Partizanët shqiptarë po luftojnë në malet e tyre për pavarësinë e vendit të vet. Oficerët britanikë të ndërlidhjes janë pranë këtyre partizanëve dhe i kanë çmuar lart cilësitë e tyre luftarake në zhvillimin e ardhshëm në teatrin e luftës për Mesdheun”, do të shprehej Kryeministri britanik Winston Churchill në vitin 1943″, vijon Balla.
Ai theksoi se marrëdhëniet u ngrinë plotësisht gjatë periudhës së diktaturës komuniste, kur shqiptarët u privuan nga e drejta e mendimit, fjalës dhe pronës.
“E megjithatë gjuha angleze ishte gjuha e huaj e preferuar. Me zhvillimet demokratike që ndodhën në Shqipëri u çel një epokë e re raportesh dhe marrëdhëniesh me Mbretërinë e Bashkuar. Ne jemi gjithmonë mirënjohës për mbështetjen e pakufizuar britanike në anëtarësimin e Shqipërisë në NATO, ndërsa nuk mund të harrojmë kurrë rolin e kryeministrit Blair dhe të qeverisë së tij në çlirimin e Kosovës dhe më pas mbështetja për një shtet të pavarur, i angazhuar në axhendën e integrimeve euroatlantike”, tha ai./ATA