Besimtarët myslimanë në të gjithë botën kremtojnë sot festën e Fitër Bajramit në një situatë aspak të zakontë për shkak të frikës nga COVID-19.
Kryetari i Komunitetit Mysliman të Shqipërisë, Bujar Spahiu, uroi besimtarët për këtë festë, e cila vjen pas një muaji sakrifice siç është muaji i Shenjtë i Ramazanit.
Duke vlerësuar situatën mbi përhapjen e COVID-19 në Shqipëri, KMSH-ja njoftoi se namazi i Fitër Bajramit këtë vit do të falej nëpër xhami sipas masave dhe protokollit të publikuar më parë.
Përmes një video-mesazhi të shpërndarë në faqen zyrtare, kreu i Komunitetit Mysliman bën thirrje për dashuri, mirëkuptim, respekt, përkujdesje dhe paqe mes qytetarëve. Ai shton se festa e Fitër Bajramit duhet të shërbejë si reflektim në mbrojtje të vlerave të vërteta të familjes.
Kryeministri Edi Rama bëri me dije një ditë më parë se nga java e ardhshme do hapet aktiviteti i tempujve fetarë. Ai i uroi besimtarët myslimanë për Fitër Bajramin, ndërsa shtoi se beson fort që hapja e xhamive do të shërbejë si ogur paqeje e mirësish për komunitete fetare dhe për të gjithë Shqipërinë.
“Pasi kemi bashkëpunuar këto javë me komunitetet fetare dhe kemi përgatitur protokollet e sigurisë shëndetësore, duke marrë, vlerësuar e miratuar propozimet e tyre, jemi gati të vendosim çeljen e aktivitetit të tempujve nga java e ardhshme, me të gjitha kufizimet përkatëse, duke e nisur nesër me këmbë të mbarë e me bekimin e dritës së ditës së bukur të kalendarit të besimit”, u shpreh kryeministri.
Në Kosovë është pezulluar falja e Fitër Bajramit në xhamitë e vendit për shkak të pandemisë. Kreu i Bashkësisë Islame të Kosovës e quan situatën një realitet të pakëndshëm. Ndërsa në Maqedoninë e Veriut, mijëra besimtarë myslimanë falën namazin e festës së shënuar.
Myslimanët e Kosovës po kremtojnë Fitër Bajramin, festë kjo që vjen pas agjërimit njëmujor të muajit të shenjtë të Ramazanit.
Për shkak të masave kundër pandemisë, falja e Fitër-Bajramit u festua pa ceremoni publike dhe pa faljen e namazit në xhamitë e vendit.
Pas paraqitjes së rasteve të para me koronavirus, Bashkësia Islame e Kosovës më 14 mars pezulloi faljen e organizuara.
Myftiu i Kosovës, Naim Tërnava, i tha qytetarëve se vendimi për heqjen dorë nga organizimet fetare ka qenë jo i lehtë, por u mor në interes të komunitetit.
“Ky realitet paraqet një ndjesi jo të këndshme, megjithatë domosdoshmëri për të mirën tonë dhe për të mirën e shëndetit publik. Edhe pse kemi arsye për festë kur është në pyetje shëndetit publik dhe kur përballemi me rreziqet e përgjithshme, duhet vepruar e punuar përgjegjshëm e ndërgjegjshëm… në këtë ditë feste kërkohet që të kemi kujdesin e duhur për fqinjin tonë në nevojë, për vëllezërit tanë në vështirësi dhe nuk mund të quhet festa e plotë kur fqinji apo vëllau jonë është në vështirësi…“
Në Kosovë aktualisht janë regjistruar mbi 1,030 raste me koronavirus, nga të cilët 785 janë shëruar dhe 29 pacientë kanë humbur jetën.
Duke folur Xhamia e Madhe e “Sulltan Mehmet Fatihut” në Prishtinë, Myftiu Tërnava kërkoi që deri në kthimin e normalitetit, të tregohet kujdes sa të kalojë pandemia vdekjeprurëse.
“Në këtë ditë Bajrami ju ftojë që të keni durim edhe për pak kohë derisa ta kalojmë rrezikun nga virusi Covid-19, ju ftoj që të shmangeni vizitat familjare, miqtë dhe farefisit, vetëm e vetëm me qëllim të ruajtjes së shëndetit tonë.”
Ndërkohë, edhe në xhamitë e Maqedonisë së Veriut mijëra besimtarë myslimanë falën namazin e Fitër Bajramit.
Ceremonia qendrore u mbajt në xhaminë e “Mustafa Pashës” në Shkup në kuadër të masave kundër përhapjes së koronavirusit të ri.
Festa e Fitër Bajramit pason Muajin e Ramazanit, gjatë të cilit, sipas besimit Islam, besimtarët agjërojnë për 30 ditë, në shenjë sakrifice dhe përkushtimi ndaj Zotit.
