Kryeministri Edi Rama deklaroi sot në një konferencë të përbashkët për shtyp në Bruksel me Sekretarin e Përgjithshëm të NATO-s, Jens Stoltenberg, se “do të vazhdojmë të luajmë rolin tonë tradicional në mbështetje të paqes rajonale, pajtimit dhe stabilitetit”.
Rama informoi se në takimin dypalësh u ndanë opinione pas Samitit të Madridit, i cili ishte vërtetë moment historik për NATO-n, si dhe ku u miratuan vendime të rëndësishme për të transformuar e forcuar NATO-n, që ajo të mbrojë paqen dhe të parandalojë konfliktin.
Kryeministri Rama u shpreh krenar që parlamenti shqiptar ishte ndër të parët që ratifikoi protokollet e anëtarësimit në NATO të Finlandës dhe Suedisë.
“Ne qëndrojmë me forcë në solidaritet të plotë me Ukrainën dhe sigurisht që është e padiskutueshme mbështetja jonë për sovranitetin e integritetin territorial të Ukrainës brenda kufijve të njohur ndërkombëtarisht”, tha Rama.
Kryeministri theksoi rëndësinë e vazhdimit të bashkëbisedimit përkundrejt situatës dhe detyrimeve që Shqipëria ka në Ballkanin Perëndimor për të parandaluar çdo përshkallëzim, dhe të parandalohet çdo ndikim i keq që të kthehet në problem për rajonin tonë.
“Në kapacitetin tonë si vend aleat dhe kandidat për në BE, ne do të vazhdojmë të luajmë rolin tonë tradicional në mbështetje të paqes rajonale, pajtimit dhe stabilitetit. Koncepti i ri strategjik, që ne sapo kemi miratuar thekson rolin strategjik të Ballkanit Perëndimor për NATO-n. Ne besojmë shumë se është tejet e rëndësishme që të vijojmë një dialog të përhershëm me të gjitha vendet e Ballkanit Perëndimor, përfshi Serbinë, e cila nuk është pjesë e NATO-s, por e rajonit tonë”, tha Rama.
Kryeministri i prezantoi Stoltenberg edhe ambicien e Shqipërisë për të shtuar një vlerë tjetër të rëndësishme në infrastrukturën dhe logjistikën e Aleancës, duke vënë në dispozicion të NATO-s një bazë të flotës detare të fjalës së fundit, që do të jetë një vend që mund ta ndërtojmë, por ta ndërtojmë duke pasur parasysh sfidat e kohës nga ndryshimi i klimës, mbrojtja e mjedisit etj.
“Përherë kënaqësi të kthehesh këtu dhe gjithnjë e më e dobishme të kthehesh me energji të plota e të vazhdosh t’i shërbesh kësaj Aleance të shenjtë”, tha Rama.
Sekretari i Përgjithshëm i NATO-s, Jens Stoltenberg vlerësoi sot kontributin e Shqipërisë në parandalimin e çdo agresioni kundër vendeve aleate të NATO-s.
Nga ana e tij Stoltenberg tha se “Shqipëria është një aleat mjaft e vlerësuar dhe e vlerësoj shumë që takohem sërish me ju. Shqipëria kontribuon në forcat shumëkombëshe të NATO-s në Letoni dhe Bullgari dhe ju ndihmoni në parandalimin e çdo agresioni kundër vendeve aleate të NATO-s”.
“Po kështu ju kontribuoni në misionin paqeruajtës të KFOR-it në Kosovë dhe Ballkani Perëndimor ka rëndësi strategjike për NATO. Ne e vlerësojmë angazhimin e Shqipërisë për të nxitur stabilitet e bashkëpunim në rajon. Në samitin e NATO-s në Madrid ne morëm vendime me efekte mjaft thelbësore për të transformuar e forcuar aleancën dhe këtu përfshihet një ndryshim thelbësor në qëndrimin tonë të parandalimit dhe të mbrojtjes, një mbështetje më të madhe për Ukrainën, si dhe një koncept të ri strategjik”, nënvizoi Stoltenberg.
Sekretari i Përgjithshëm i NATO-s, Stoltenberg u shpreh se “po kështu ramë dakord që të ftojmë Finlandën dhe Suedinë që të anëtarësohen në NATO dhe e përgëzoj Shqipërinë për ratifikimin e protokolleve të anëtarësimit për të dyja vendet kaq shpejt. Kjo dëshmon se dera e NATO-s mbetet e hapur dhe vazhdojmë të përkrahim të drejtën e çdo vendi që të zgjedhë rrugëtimin e vet”.
Sipas tij, mirëpritja e Finlandës dhe Suedisë në aleancë do t’i bëjë ato më të sigurta, NATO-në më të fortë dhe botën më të sigurt.
“Kjo është jetike, ndërkohë që përballemi me krizën më të madhe të sigurisë në dekada. NATO qëndron me Ukrainën ndërkohë që mbron veten e saj nga lufta mizore e Rusisë, ne po ofrojmë nivele të pashembullta mbështetjeje dhe kjo do të vazhdojë në afat të gjatë”, tha Stoltenberg.
Stoltenberg theksoi se “mirëpres mbështetjen e Shqipërisë për Ukrainën dhe angazhimin tuaj të fundit për ndihmë humanitare. Edhe vizita juaj e fundit në Ukrainë ishte një dëshmi e rëndësishme solidariteti. Faleminderit për kontributin e Shqipërisë për sigurinë tonë të përbashkët dhe pres me padurim të vazhdoj të punoj më ju”.
/Argumentum.al
