Kryetari i Partisë së Lirisë, Ilir Meta në mbledhjen e Kryesisë së kësaj force politike u ndal tek buxheti i vitit 2023, ku thekeson se është në dëm të qytetarëve.
Në mbledhjen e Kryesisë së PL-së, Meta tha se “do të kërkojmë mbështetje financiare për studentët, 100 euro në muaj për të përballuar krizën e çmimeve dhe kostove studentore, për t’i barazuar me bashkëmoshatarët e tyre në Kosovë, pasi për studentët nuk është parashikuar asnjë mbështetje financiare në projektbuxhetin e 2023”.
“Do të kërkojmë mbështetje për kërkimin shkencor, që të shkojë të paktën në 0,3% e PPB siç kanë kërkuar edhe pedagogët, pasi në projektbuxhet 2023 është parashikuar vetëm 0.05% PPB. Do të kërkojmë rritjen e pagave të pedagogëve 50% brenda dy viteve, ndaj në projekt buxhetin e 2023 do kërkojmë që rritja të jetë 20% nga buxheti shtetit sipas kërkesave të Sindikatës Kombëtare të Pedagogëve”, nënvizoi Meta.
Meta tha gjithashtu se “do të kërkojmë rritjen e pagave 12% të mësuesve duke filluar nga 1 janari për të përballuar rritjen e çmimeve dhe koston e jetesës, pasi në projektbuxhet është parashikuar rritje page për mësuesit 6% i cili fillon në korrik 2023. Do të kërkojmë pajisjen me tekste të reja shkollore falas, çdo vit, për nxënësit nga klasa I deri në klasën e IX”.
Në fjalën e tij Meta u shpreh se “do të kërkohet rritja e pagës së mjekëve në masën 12% duke filluar nga 1 janari”.
Sa i përket bujqësisë, Meta tha se “do të kërkojmë të hiqet TVSH për inputet bujqësore, lënien e tavanit prej 50 milionë lekë investim, për përfitimin e uljes së TVSH të makinerive bujqësore si dhe një shtesë prej 5 miliardë lekë, për mbështetjen e prodhimit bujqësor-blegtoral, agroindustrial dhe marketingut”.
Meta tha se do kërkojnë anulimin e rritjes së akcizës për prodhuesit e birrës dhe të verës vendas të vegjël, për arsye se rritja e saj dëmton prodhimin vendor, rrit papunësinë dhe favorizon importin e këtyre produkteve.
“Ky unifikim i akcizës vjen në kundërshtim me direktivën 92/84/KEE te BE dhe i vendos këta prodhues në dizavantazh të thellë me prodhuesit e mëdhenj”, tha Meta.
Ai theksoi se do kërkojnë edhe shtyrjen e taksimit për profesionet e lira deri në kalimin e krizës për të mos rënduar në mënyrë të menjëhershme rritjen e barrës fiskale në këtë periudhë dhe për të mos i dekurajuar ata për të mos u larguar nga vendi, si dhe anulimin e vendosjes së gjobave në 10-fish për shkelje administrative, e cila është si një ndryshim ligjor antikushtetuese dhe nuk merr në konsideratë parimin e proporcionalitetit.
Duke folur për PPP, Meta tha se “qeveria do të paguajë 30 milionë euro me shume sesa viti aktual për këto kontrata. Totali i kostos së shërbimit të borxhit në vitin 2023 do të arrijë një shumë rekord në vitin 2023 në 136.4 miliardë lekë, ose në rreth 1.15 miliardë euro me një rritje në 69% krahasuar me vitin 2022. Totali i kostos së shërbimit të borxhit do të jetë pothuajse i barabartë me buxhetin e Ministrisë së Bujqësisë, të Ministrisë së Arsimit dhe Ministrisë së Shëndetësisë të marra së bashku për vitin 2023”.
“Do të jepen 1 miliard euro për 7 koncesione dhe do të vazhdojnë rrugët e florinjta qindra milionë euro. Niveli i mbledhjes së të ardhurave vazhdon edhe në 2023 vetëm 27%, pra miliarda euro që zhduken në gropën e errët të korrupsionit”, shtoi Meta.
Kryetari i Partisë së Lirisë, Ilir Meta ka paralajmëruar sërish protesta, duke kërkuar që të organizohen dhe të intesifikojnë edhe më shumë aksionin opozitar.
“Skandalet nuk kanë të sosur, ndaj edhe rruga jo vetëm e denoncimeve dhe propozimeve, por edhe e protestave dhe e organizimit mbarë qytetar dhe mbarë opozitar kundër kësaj qeverie e cila, i ka shpallur luftë qytetarëve, financave publike, interesit publik dhe kombëtar, i ka shpallur luftë detyrimeve që vijnë nga Marrëveshja e Stabilizimi Asocimit dhe kërkesave për ecurinë e negociatave me BE duhet të intensifikojmë aksionin tonë si Parti e Lirisë, në bashkëpunim me forcat e tjera opozitare. Unë jam i sigurt se në këtë rrugë kjo qeveri që sot është pakicë e pakicës, edhe brenda PS rilindja është një pakice, pasi barra e kësaj krize nuk bie vetëm në shpatullat e qytetarëve që janë në opozitë me këtë qeveri por bien mbi gjithë shqiptarët”, u shpreh ndër të tjera Meta.
/Argumentum.al