“Vlerësimi për ShBA-në ka rënë ndjeshëm në opinionin botëror, ndërsa ai për Kinën është rritur”, tregon një sondazh i publikuar të fundmi nga “Morning Consult”. Në fund të majit, pëlqyeshmëria globale për ShBA-në ra në -1.5, ndërkohë që ajo për Kinën është rritur në 8.8. Edhe pse është vetëm një sondazh i vetëm një institucioni, ai mbulon mbi 40 vende e rajone, duke përfshirë partnerët kryesorë ekonomikë dhe aleatët ushtarakë të ShBA-së, gjë që e bën rezultatin jashtëzakonisht domethënës, komenton Grupi Mediatik i Kinës (CMG).
Ky ndryshim i “ngritjes së Lindjes dhe rënies së Perëndimit” nuk është i rastësishëm, vijon komenti. Prej fillimit të këtij viti, abuzimi me tarifat doganore nga ShBA-ja ka shkaktuar pasoja të mëdha negative për ekonominë globale dhe tani vetë ShBA-ja po i paguan këto pasoja. Më 4 qershor, qeveria amerikane njoftoi rritjen e tarifave për çelikun dhe aluminin, nga 25 % në 50 %, duke shkaktuar kritika globale. “Përdorimi i sigurisë kombëtare si justifikim për të mbuluar dështimet e veta të brendshme”; “Një veprim tipik i ‘vetëdëmtimit ekonomik'”, “Shprehje e arrogancës së një fuqie të madhe” … kështu komentoi gazeta britanike “Financial Times”, duke e cilësuar këtë si “një raund të ri të përshkallëzimit të luftës globale tregtare nga ShBA-ja”.
Profesori Wang Xiaosong nga Fakulteti i Ekonomisë i Universitetit “Renmin” të Kinës i tha CMG-së se vendimi i ShBA-së për të rritur tarifat ka tre qëllime kryesore. Së pari, ai ka për qëllim të ndihmojë zhvillimin e industrive vendase amerikane; së dyti, t’i përdorë tarifat si mjet shantazhi ndaj partnerëve tregtarë, duke i detyruar ata të pranojnë kushtet e veta në negociata; së treti, për shkak se po afrohen zgjedhjet afatmesme në ShBA, ky vendim synon gjithashtu fitimin e votave të sektorëve industrialë, si ata të çelikut dhe aluminit.
Porti në Kaliforni, ShBA, më 4 qershor/VCG
Por tarifat nuk sjellin fitues, thekson CMG-ja. Raundi i fundit i rritjes së tarifave nga ShBA-ja po godet më shumë aleatët e saj kryesorë. Aktualisht, rreth një e katërta e çelikut dhe gjysma e aluminit që përdor ShBA-ja, vijnë nga importi. Rreth 25 % e çelikut të eksportuar prej Evropës shkon në tregun amerikan, dhe analistët besojnë se kjo rritje do të shtojë sërish tensionet tregtare mes ShBA-së dhe BE-së. Një zëdhënës i BE-së vuri në dukje se këto masa të palës amerikane po dëmtojnë përpjekjet që po bëhen për të gjetur një zgjidhje përmes negociatave, duke shtuar që “nëse nuk arrihet një marrëveshje, masat aktuale të BE-së, si edhe masat e reja, do të hyjnë automatikisht në fuqi më 14 korrik, ose edhe më herët nëse është e nevojshme.”
Në fakt, konsumatorët amerikanë janë ata që po paguajnë çmimin. Agjencia e lajmeve AP paralajmëron se, pasi të rriten tarifat për çelikun dhe aluminin, çmimet e automjeteve, pajisjeve shtëpiake dhe shtëpive mund të rriten ndjeshëm, duke prekur miliona familje. Një institut kërkimor amerikan vuri në dukje që ndryshimet e shpeshta të tarifave doganore i kanë vënë shumë kompani amerikane përballë pasigurive të mëdha, duke shkaktuar rritjen e çmimeve të lëndëve të para e duke goditur më tej sektorë të ndryshëm në ShBA.
Foto nga VCG
Më 3 qershor, Organizata për Bashkëpunim dhe Zhvillim Ekonomik (OECD) e uli parashikimin për rritjen ekonomike të ShBA-së për vitin 2025 në vetëm 1.6 %, nga 2.2 % që parashikohej në mars, dhe e uli rritjen për vitin 2026 në 1.5 %. “The Economist” mendon që “ShBA-ja e ka konsumuar besueshmërinë strategjike të akumuluar që nga Lufta e Dytë Botërore”.
Rezultatet e sondazhit të bërë nga “Morning Consult” dëshmojnë qartë perceptimin e publikut global. Në fillim të këtij viti, 29 ndër 41 vendet e përfshira në sondazh kishin vlerësim më të lartë për ShBA-në sesa për Kinën; pas vendosjes së “tarifave reciproke” në prill, vetëm 13 vende mbetën në këtë qëndrim. Ndërkohë, perceptimi pozitiv për Kinën u rrit ndjeshëm, veçanërisht pas prillit. Kush e dëmton tregtinë ndërkombëtare? Kush e mbron tregtinë e lirë? Opinioni ndërkombëtar tashmë e ka dhënë përgjigjen, e mbyll komentin e vet CMG-ja./cgtn
