Fjala kyçe: 错误—[cuò wù]—gabim
Më 18 nëntor, zyrtarët e Ministrisë së Jashtme të Kinës zhvilluan në Pekin një takim me zyrtarët e Ministrisë së Jashtme të Japonisë. Kina paraqiti një protestë të fortë ndaj Japonisë, në lidhje me komentet e gabuara të kryeministres japoneze Sanae Takaichi, duke nxitur Japoninë të tërheqë deklaratat e gabuara, të ndalojë së krijuari probleme në çështjet që lidhen me Kinën dhe të korrigjojë gabimet e saj me veprime konkrete, për të mbrojtur bazën politike të marrëdhënieve Kinë-Japoni.
Që prej 7 nëntorit, kur Takaichi aludoi për një ndërhyrje të mundshme ushtarake në Tajvan, qeveria kineze i është kundërpërgjigjur me forcë vërejtjeve provokuese mbi këtë çështje. Zv/Ministri i Jashtëm i Kinës, me udhëzime nga lart, thirri në një takim Ambasadorin e Japonisë në Kinë, duke paraqitur nota solemne dhe protesta të ashpra. Krahas kësaj, shumë ministri kanë dhënë paralajmërime si “goditje të forta”, paralajmërime për shmangie udhëtimesh në Japoni, kërkesa për hetim të përbashkët të opinionit publik Kinë-Japoni dhe shtyrjen e forumit Pekin-Tokio. Qëndrimi i Kinës është i qartë dhe i vendosur!
Për Kinën, çështja e Tajvanit është “vija e kuqe e linjës së kuqe”. Takaichi bëri provokime ndaj palës kineze dhe kjo sigurisht do të shkaktojë kosto të madhe. Aktualisht, Kina është partneri më i madh tregtar i Japonisë, vendi i dytë më i madh për eksportet dhe burimi më i madh i importeve.
Kohët e fundit, një studiues nga Instituti i Kërkimeve të Përgjithshme Nomura në Japoni deklaroi se, nëse numri i turistëve kinezë që vizitojnë Japoninë shënon një rënie të madhe, humbja fillestare ekonomike e Japonisë do të ishte 2.2 trilionë jenë (rreth 101.16 miliardë juanë). Në fakt, ndikimi po duket që tani: dy treguesit kryesorë të bursës së Tokios ranë për ditën e tretë radhazi më 18; agjencia japoneze Kyodo raportoi të njëjtën ditë, se shumë aktivitete biznesi midis Kinës dhe Japonisë janë shtyrë ose anuluar. Për javë me radhë, brenda Japonisë janë dënuar vazhdimisht deklaratat e gabuara e Takaichit, duke bërë thirrje që “qartazi duhet të tërhiqen”.
Si një fuqi e madhe me një ndjenjë të fortë përgjegjësie historike, kundërsulmi i Kinës nuk ka të bëjë vetëm me ruajtjen e sovranitetit kombëtar dhe integritetit territorial, por edhe me ruajtjen e rendit të pasluftës dhe paqes rajonale, si dhe me një shtypje të fuqishme të ringjalljes së militarizmit japonez. Sidomos ky vit shënon 80-vjetorin e fitores së Luftës së Rezistencës së Popullit Kinez Kundër Agresionit Japonez dhe Luftës Botërore Antifashiste. Veprimet e Takashit i mohojnë drejtpërdrejt arritjet e fitores, sfidojnë rendin ndërkombëtar dhe sulmojnë ndërgjegjen morale, duke e bërë kundërsulmin e Kinës edhe më të rëndësishëm dhe të domosdoshëm.
Nga një këndvështrim më i thellë, “katastrofa Takaichi” nuk ishte e rastësishme, por një rezultat i pashmangshëm i forcave japoneze të krahut të djathtë që vazhdimisht sfidojnë kufizimet e kushtetutës pacifiste dhe kërkojnë statusin e një fuqie të madhe ushtarake.
Për një kohë të gjatë, nga avokimi për heqjen e Nenit 9 të kushtetutës pacifiste të Japonisë dhe nxitja për transformimin e Forcave të Vetëmbrojtjes në një “ushtri mbrojtëse kombëtare”, deri te vizitat e shpeshta në Tempullin Yasukuni dhe mohimi i fakteve historike të kohës së luftës, siç është çështja e “grave të ngushëllimit”, fjalët dhe veprimet e Takaichi-t kanë treguar një tendencë të qartë drejt revizionizmit historik. Për shkak të faktorëve të tillë si llogaritja jo e plotë e pasluftës, ndryshimet në peizazhin ndërkombëtar dhe luhatjet në ekonominë e brendshme të Japonisë, revizionizmi historik japonez ka vazhduar të rritet dhe të përhapet, duke u përpjekur të pastrojë përgjegjësitë e Japonisë dhe të tërheqë Japoninë nga etiketa e një “kombi të mundur”. Aktualisht, kjo tendencë është e përhapur në shoqërinë japoneze, duke kontribuar në ringjalljen e militarizmit.
Një sërë lëvizjesh të rrezikshme kanë tërhequr kritika të gjera nga vendet fqinje. Sergei Shoigu, Sekretari i Këshillit të Sigurisë Ruse, deklaroi së fundmi se Sanae Takaichi ndjek një politikë revizionizmi historik dhe se deklaratat e shumta anti-ruse të Japonisë, bien ndesh me qëllimin e saj të deklaruar për të normalizuar marrëdhëniet me Rusinë. Qeveria e Koresë së Jugut paraqiti një protestë të fortë kundër pretendimit të fundit të Takaichi se Ishulli Dokdo është “territor i vendosur” japonez dhe pezulloi stërvitjet e përbashkëta ushtarake Kore-Japoni të planifikuara për në nëntor. Lidhur me deklaratat e Takaichit për ngritjen e shpenzimeve ushtarake të Japonisë, rishkrimin e strategjisë mbi sigurinë kombëtare, mediat koreanoveriore kritikojnë që Japonia ka treguar “fytyrën e shëmtuar të një vendi luftëdashës”…
Duke parë botën përreth, shumë vende janë të zhytura në luftë dhe trazira, duke e bërë paqen afatgjatë në Azinë Lindore edhe më të çmuar. Pavarësisht se kush është në pushtet, Japonia duhet të respektojë angazhimet e saj dhe të ndjekë një rrugë zhvillimi paqësor. Kina do të vazhdojë të mësojë nga historia, të kundërshtojë me vendosmëri çdo përpjekje për të ringjallur militarizmin dhe të mbrojë me vendosmëri arritjet e fitores në Luftën e Dytë Botërore dhe rendin ndërkombëtar të pasluftës. Komuniteti ndërkombëtar duhet gjithashtu të bashkojë forcat për të siguruar që militarizmi japonez të mos ringjallet kurrë dhe që paqja dhe stabiliteti botëror të mos dëmtohen më kurrë./CGTN
