Nën moton “Drejtësi, jo politikë”, mijëra qytetarë nga të gjitha trevat shqiptare u mblodhën në Sheshin Skënderbeu në Prishtinë për të shprehur solidaritetin me ish-drejtuesit e Ushtria Çlirimtare e Kosovës, të cilët po përballen me proces gjyqësor në Hagë. Tubimi, i organizuar nga nisma “Liria ka Emër”, u shndërrua në një thirrje të fuqishme për drejtësi të paanshme dhe kundër çdo forme të politizimit të procesit ndaj ish-krerëve të UÇK-së. Të bashkuar pa dallime partiake e politike, qytetarët theksuan se Kosova është mbi gjithçka dhe se lufta e UÇK-së ishte një luftë e lavdishme për liri, e cila nuk mund të njolloset nga asnjë lloj lobimi apo përpjekjeje për ta shtrembëruar atë, qoftë edhe në emër të drejtësisë ndërkombëtare.
Mijëra qytetarë nga të gjitha trojet shqiptare janë mbledhur sot në sheshin “Skënderbeu” në Prishtinës në mbështetje të ish-krerëve të Ushtrisë Çlirimtare të Kosovës të cilët po mbahen të paraburgosur në Hagë nga nëntori i 2020, Hashim Thaçi, Kadri Veseli, Jakup Krasniqi e Rexhep Selimi.
Në protestën “Drejtësi, jo politik” e organizuar nga “Liria ka Emër” ku janë bërë bashkë të gjithë shqiptarët, të cilët kërkojnë “drejtësi” jo proces politik ndaj ish-krerëve të UÇK në Hagë, kanë marrë pjesë edhe krerët e shtetit. E pranishme ishte presidentja e Kosovës, Vjosa Osmani, kreu i BDI-së, Ali Ahmeti dhe kreut të Grupit të PS, Taulant Balla.
Balla vazhdimisht ka bërë thirrje për mbështetje dhe ka ngritur zërin kundër padrejtësisë historike që po bëhet në Dhomat e Specializuara për Kosovën në Hagë.
Pak ditë më parë, Balla ishte edhe nismëtari i kërkesës që Kuvendi i Shqipërisë të hartonte dhe votonte një rezolutë zyrtare në mbrojtje të ish-komandantëve të UÇK-së, e cila u miratua të enjten e kaluar nga e majta dhe e djathta së bashku me 92 vota pro.
Ndërsa familjarët e ish-krerëve të Ushtrisë Çlirimtare të Kosovës po ndjekin nga Haga marshin “Drejtësi, Jo Politikë”. Vëllezërit dhe nipat e Thaçit, djali i Jakup Krasniqit dhe familjarë të tjerë po e ndjekin drejtpërdrejt nga televizioni bashkë në Hagë këtë protestë në Prishtinë.
Përfaqësuesi i nismës “Liria ka Emër”, Ismail Tasholli tha gjatë fjalës së tij në këtë tubim se “qytetarët duan drejtësi dhe jo politikë dhe sot në këtë ditë ne dërgojmë një mesazh të veçantë për ata që gjenden në Hagë, Hashim Thaçi, Kadri Veseli, Jakup Krasniqi, Rexhep Selimi dhe të tjerë… Ju nuk jeni vetëm, pas jush qëndron një komb i tërë. Pas jush qëndron sakrifica, liria jonë”.
Tasholli nënvizoi se nëse drejtësia devijon nga parimet e barazisë, atëherë nuk mund të quhet më e tillë. “Drejtësia nuk mund të jetë selektive apo e dirigjuar, por transparante dhe e drejtë për të gjithë”, u shpreh ai duke shtuar se “ky është fillimi, nuk do të ndalemi kurrë”.
Në protestë e ka marrë fjalën edhe e mbijetuara e dhunës seksuale gjatë luftës, Vasfije Krasniqi-Goodman.
Ajo tha se “Hashim Thaçi, Kadri Veseli, Jakup Krasniqi dhe Rexhep Selimi duhet të lirohen. Ata e mbrojtën popullin e vet si gjithë Ushtria Çlirimtare e Kosovës”.
“Nëse doni me ditë se çfarë i bashkon shqiptarët, është cenimi i lirisë dhe padrejtësia. Faleminderit të gjithë juve që i shërbyet atdheut kur më së shumti kishte nevojë”, u shpreh ajo.
Muhamer Ibrahimi, ish-luftëtari i UÇK-së tha se “kur unë dizajnova flamurin dhe u ngrit më 17 shkurt 2008, nuk pash vetëm një simbol të shtetit, pash fytyrat e atyre që nuk jetuan dhe nuk u kthyen ta shohin atë ditë”.
Ai tha se në atë flamur pa sakrificën, dhimbjen dhe krenarinë kombëtare.
Ibrahimi tha para pjesëmarrësve në këtë tubim se “po kërkojmë që historia jonë që të mos rishkruhet dhe të mos shtrembërohet”.
“UÇK ishte mburojë për fëmijë, gra e pleq. Ishte mburojë për pragun e shtëpisë, ishte përgjigja e fundit e një populli që kanosej me zhdukje. E sot kur e shoh këtë det njerëzish, e di që ata në Hagë nuk janë vetëm. Pas tyre qëndron populli”, u shpreh ish-luftëtari i UÇK-së.
Çlirim Haziri, djali i njërit prej mbi 1 mijë e 600 shqiptarëve të zhdukur gjatë luftës tha se “ne jemi një zë që nuk blihet, një zë që nuk frikësohet, një zë që nuk do të ndalet”.
“Ata që luftuan për këtë tokë, nuk kërkuan pushtet, por kërkuan liri dhe liria nuk vjen në bankën e turpit. Lufta e UÇK-së, ishte luftë për mbijetesë dinjitet të kombit”, deklaroi Haziri.
/Argumentum.al
