Kina kundërshton me vendosmëri çdo formë shkëmbimi zyrtar midis Shteteve të Bashkuara dhe rajonit të Tajvanit të Kinës. Vendi i kërkon palës amerikane të ndalojë kontakte të tilla dhe të përmbahet nga dërgimi i sinjaleve të gabuara ndaj forcave separatiste pro “pavarësisë së Tajvanit”, tha të mërkurën një zëdhënës i Ministrisë së Jashtme të Kinës.
Presidenti amerikan Donald Trump, nënshkroi një akt që i kërkoi Departamentit të Shtetit të rishikonte rregullisht ndërveprimet midis Shteteve të Bashkuara dhe Tajvanit, si dhe të kërkonte mënyra për të thelluar shkëmbimet përkatëse.
Në përgjigjen e pyetjes lidhur me këtë, zëdhënësi i diplomacisë kineze Lin Jian tha në një konferencë shtypi në Pekin se Kina kundërshton me vendosmëri çdo formë shkëmbimi zyrtar midis Shteteve të Bashkuara dhe rajonit të Tajvanit të Kinës. Ky qëndrim është konsistent dhe i qartë. Çështja e Tajvanit është në qendër të interesave thelbësore të Kinës dhe është vija e parë e kuqe që nuk mund të kalohet në marrëdhëniet Kinë-ShBA.
Ai tha se parimi i “një Kine” është themeli politik i marrëdhënieve Kinë-ShBA. Qeveria amerikane bëri një angazhim të qartë në komunikatën e përbashkët mbi vendosjen e marrëdhënieve diplomatike se “Shtetet e Bashkuara të Amerikës njohin qeverinë e Republikës Popullore të Kinës si qeverinë e vetme të ligjshme të Kinës. Populli i Shteteve të Bashkuara do të mbajë marrëdhënie kulturore, tregtare dhe të tjera jozyrtare me popullin e Tajvanit brenda këtij konteksti”.
Kina i kërkoi palës amerikane që t’i përmbahet siç duhet parimit të “një Kine” dhe tre komunikatave të përbashkëta Kinë-ShBA, ta trajtojë çështjen e Tajvanit me kujdes të madh, të ndalojë shkëmbimet zyrtare me Tajvanin dhe dërgimin e çdo sinjali të gabuar për forcat separatiste pro “pavarësisë së Tajvanit”, tha zëdhënësi./CGTN
