Kuvendi i Kosovës ka miratuar qeverinë e re, duke i hapur rrugë mandatit të katërt të Albin Kurtit si kryeministër. Formimi i ekzekutivit të ri vjen pas një periudhe të gjatë përplasjesh politike dhe negociatash për krijimin e shumicës parlamentare.
Pas konstituimit të Kuvendit të Kosovës, të dielën pasdite (13.09.2026), deputetët zgjodhën edhe qeverinë e re të Kosovës. Albin Kurti, nga Lëvizja Vetëvendosje, mori 62 vota për, tetë kundër dhe asnjë abstenim, dhe në këtë mënyrë, ai siguroi mandatin e katërt si kryeministër i Kosovës. Seanca për zgjedhjen e qeverisë u bojkotua nga tri partitë opozitare shqiptare, Partia Demokratike e Kosovës (PDK), Lidhja Demokratike e Kosovës (LDK) dhe Aleanca. Kurti, nga 53 deputetë sa i ka partia e tij, mori edhe nëntë votat e pakicave joserbe, një pjesë e të cilëve i ka edhe në qeveri, ndërsa, nëntë deputetë të listës Srpska votuan kundër. Kryeministri Albin Kurti, në fjalën e tij, tha se përbërja e qeverisë Kurti 4 mbetet e njëjtë, nuk ka ndryshim në kabinetin qeveritar, sikundër nuk prezantoi ndonjë program të ri, për faktin, sikurse u shpreh ai, se për shkak të zgjedhjeve të përsëritura, ai vetëm do ta vazhdojë qeverisjen e njëjtë edhe në mandatin e ri.
“Vizioni i Lëvizjes Vetëvendosje do të jetë i përqendruar te mirëqenia e qytetarëve dhe mbrojtja e familjeve. Sot ky mandat është për ta kthyer fuqishëm sigurinë dhe mirëqenien në përditshmërinë e qytetarit”, tha kryeministri i sapozgjedhur Albin Kurti.
PDK kundra dhe do t’i drejtohet Gjykatës Kustetuese
Vetëm pak orë para se të zgjidhej qeveria e re, kryetarja e Kuvendit të Kosovës, Albulena Haxhiu, në një seancë të paradites dhe pas zgjedhjes së tre nënkryetarëve të tjerë të Kuvendit, një nga LDK, një nga lista Srpska dhe një nga komunitetet joserbe, e shpalli të konstituuar parlamentin, megjithë mungesën e një nënkryetari tjetër nga PDK. Kjo parti kishte tërhequr kandidaturën e Vlora Çitakut për nënkryetare të Kuvendit, ndërsa tha se do t’i drejtohet Gjykatës Kushtetuese edhe për konstituimin e Kuvendit dhe zgjedhjen e qeverisë së re, duke i cilësuar të dyja proceset jashtë procedurave kushtetuese.
“Procedimet e sotme dhe konstatimet e tyre se Kuvendi është konstituuar janë përtej afateve kushtetuese dhe gjithçka që del nga ky Kuvend, ne do ta dërgojmë për shqyrtim të ligjshmërisë në Gjykatën Kushtetuese. Kosova duhet të funksionojë sipas rendit kushtetues dhe jo sipas një rendi që tenton ta krijojë Kurti për interesat e tij politike. Ekspertët e PDK-së tashmë janë duke punuar në përgatitjen e rastit, i cili do t’i drejtohet Gjykatës Kushtetuese, për procesin në tërësi”, thanë nga PDK.
Pa zgjedhjen e presidentit zgjedhjet e reja të pashmangshme
Sidoqoftë, me konstituimin e parlamentit dhe zgjedhjen e qeverisë së re, tani për tani, është hapur rruga dhe ka nisur konsumimi i afatit 60-ditor për zgjedhjen e Presidentit të Kosovës. Kryeministri i Kosovës, Albin Kurti, më herët ka thënë se konstituimi i Kuvendit, por edhe zgjedhja e qeverisë së re, nuk i shmang zgjedhjet e reja në Kosovë. “Konstituimi i Kuvendit dhe formimi i Qeverisë nuk i eviton zgjedhjet e reja, nëse nuk e zgjedhim edhe Presidentin. Për zgjedhjen e presidentit, ose presidentes, neve na duhet që të kemi dy të tretat, që kuorumi të jetë i pranishëm në Kuvend”, deklaroi Kurti.
Më herët, kreu i Vetëvendosjes, Albin Kurti, kishte arritur një marrëveshje me kreun e LDK-së, Lumir Abdixhiku, për një emër konsensual për President. Por, gjashtë deputetë të LDK-së vazhdojnë të jenë kundër kandidaturës së ish-gjyqtarit të Gjykatës Kushtetuese, Bekim Sejdiu, për President, dhe kjo e bën tani të pamundur arritjen e 80 votave për zgjedhjen e presidentit.Dy partitë opozitare PDK dhe Aleanca, kanë thënë se ato nuk e mbështesin kandidaturën e Sejdiut për president dhe janë përcaktuar që këtë mandat të qëndrojnë në opozitë.
Që nga përfundimi i mandatit të Presidentes Vjosa Osmani, Kosova është me ushtruese të detyrës së Presidentit. Albulena Haxhiu, tanikryetare e re e Kuvendit, vazhdon në këtë post dhe nuk ka një interpretim kushtetues se çfarë bëhet pas datës katër tetor, kur kalon afati gjashtëmujor me ushtrues detyre të presidentit, nëse deri në këtë datë nuk ka president të ri. Deri tani, nga 120 vendet sa ka Parlamenti i Kosovës, sipas kryeministrit, Albin Kurti, janë të siguruara vetëm 74 vota në favor të zgjedhjes së emrit konsensual, Bekim Sejdiu, për President të Kosovës. Por ky numër nuk i eviton zgjedhjet e reja të jashtëzakonshme.
/Argumentum.al
