Presidenti i Kosovës, Hashim Thaçi dhe kryeministri Albin Kurti zhvilluan këtë pasdite një takim kokë më kokë, i cili filloi pa shtrëngimin ceremonial të duarve, si një masë paraprake e vendosur ditë më parë nga Kurti për parandalimin e infektimit nga koronavirusi.
Pas takimit, presidenti Thaçi deklaroi për mediet se “zhvilluam një takim të përbashkët, mendoj i nevojshëm dhe i domosdoshëm për të mirën e vendit dhe të qytetarëve për të sotmen, por edhe për të ardhmen e qytetarëve të Kosovës”.
Presidenti Thaçi tha se “pas takimeve me liderët e partive politike, takimi me kryeministrin Kurti ka qenë në vazhdën e hapave të mëtejshme që duhet të ndodhin e të ndërmerren nga institucionet e Kosovës. Takimi ka qenë i gjatë, përmbajtësor, mendoj shumë i hapur, ku janë diskutuar gjërat që kemi pasur këndvështrime konstruktive. Janë diskutuar për çështje të politikës së brendshme, por edhe të jashtme, për interesa të nacionale, prioritetet e vendit, për reformat që duhet të lëzivzin më shpejt, drejt perspektivës europiane, për zhvillimet dhe mundësitë e reja integruese kombëtare, për rolin dhe fuqizimin e Kosovës në arenën ndërkombëtare”.
Lidhur me dialogun Kosovë-Serbi presidenti Thaçi u shpreh se “ishte konstatim i përbashkët, se një punë e përbashkët e bartësve të institucioneve dhe liderëve politikë të pozitës e opozitës, mund ta çojnë vendin më shpejt dhe më mirë përpara. Mendoj se ka hapësirë dhe ka substancë të mjaftueshme që më tepër gjëra janë ato që na përafrojnë sesa na ndajnë, për ta çuar vendin sa më shpejt në NATO e Bashkimin Europian dhe për të ruajtur e përjetësuar miqësinë me SHBA”.
Pyetjes së gazetarëve që a e diskutuan sot në takim akuzën që ka pasur nga kryeministri Kurti për një marrëveshje të fshehtë midis tij dhe presidentit serb Aleksandër Vuçiç, Thaçi iu përgjigj se pret që ditët e ardhsme të bëjë kërkesën që zyrtarisht t’i drejtohet Kuvendit të Republikës së Kosovës ku do të prezantojë opinionet, qëndrimet dhe angazhimin e tij, të theksojë se takimi në Uashington në Shtëpinë e Bardhë ka qenë një takim i një rëndësie të veçantë dhe historik që mund t’i hapë perspektivë arritjes së një marrëveshjeje përfundimtare me njohje reciproke mes Kosovës dhe Serbisë dhe “shpresoj që qeveria do të marrë vendimë të shpejta dhe të qarta e në kohë të duhur që hap rrugë drejt një angazhimi të përbashkët të të gjithë spektrit politik, por theksoj se në tavolinën e bisedimeve do të jemi të bashkuar, si Kosovë, me një qëndrim: qëndrimin e ruajtjes, e kultivimit dhe forcimit të interesit shtetëror due perspektivës euroatlantike. Prandaj duhet të fokusohemi te gjërat që janë përafruese mes nesh. Jemi në demokraci dhe njerëzit kanë opinione të ndryshme, që duhen respektuar nga të gjithë, por interesi kombëtar është mbi të gjitha”, tha Thaçi.
Pyetjes se a e diskutuan çështjen e taksës me Serbinë, Thaçi tha se është tagër i qeverisë dhe shprehu besimin se ajo do të marrë vendimin e duhur, përfundoi intervistën presidenti i Republikës së Kosovës, Hashim Thaçi.
Në një deklaratë pas takimit, Thaçi tha se së bashku me kryeministrin Kurti kanë konstatuar se puna e përbashkët e liderëve mund ta çojë vendin përpara sa më shpejtë, duke theksuar se me Kurtin kishin më shumë gjëra që i përafrojnë sesa që i ndajnë.
“Konstatoj se takimi ka qenë i gjatë, përmbajtësor, shumë i hapur, ku janë diskutuar gjërat që kemi pasur këndvështrime konstruktive, për interesat nacionale për qytetarët e Kosovës dhe qytetarët e vendit për reformat që duhet të ndodhin drejt perspektivës evropiane. Diskutuam për rolin dhe pozitën e Kosovës në arenën ndërkombëtare, gjithashtu edhe për dialogun Kosovë-Serbi. Ka hapësirë dhe substancë të mjaftueshme që më shumë gjëra na përafrojnë sesa na ndajnë dhe të ruajmë miqësisht marrëdhëniet me SHBA-në. Besoj që Qeveria do të marrë vendime të shpejta e të qarta. Në tavolinë do të jemi të bashkuar me një zë”, u shpreh Thaçi.
