Kryeministri i Kinës Li Qiang tha të hënën se vendi është i gatshëm të punojë me Malajzinë për të thelluar shkëmbimet dhe bashkëpunimin në fusha të ndryshme, si edhe për të shënuar së bashku një tjetër “50 Vjetor të Artë” për lidhjet dypalëshe, të udhëhequra nga parimet e respektit dhe besimit të ndërsjellë, barazisë dhe përfitimit reciprok për rezultate të favorshme për të dyja palët.
Li i bëri deklaratat gjatë takimit me Kryeministrin e Malajzisë Anwar Ibrahim në Kuala Lumpur.
Kina dhe Malajzia duhet të vazhdojnë të zgjerojnë investimet dhe bashkëpunimin tregtar, duke u fokusuar në fushat më të përparuara si ekonomia dixhitale, ekonomia e gjelbër dhe inteligjenca artificiale, tha Li. Ai shtoi se të dy vendet duhet të promovojnë zhvillimin e integruar të zinxhirëve të prodhimit dhe furnizimit apo zinxhirëve të vlerës si edhe të përparojnë vazhdimisht ndërtimin e projekteve kyçe si “Dy Vende, Dy Parqe” dhe Lidhja Hekurudhore e Bregut Lindor, për të forcuar motorin e rritjes ekonomike të komunitetit Kinë-Malajzi me një të ardhme të përbashkët.
Kryeministri tha gjithashtu se Kina është e gatshme të punojë me Malajzinë për të zbatuar marrëveshjen e përjashtimit të ndërsjellë të vizave, për të thelluar shkëmbimet dhe bashkëpunimin kulturor, arsimor, shëndetësor, sportiv, njerëzor, dhe për të forcuar lidhjet emocionale midis dy popujve në ndërtimin e një komuniteti Kinë-Malajzi me një të ardhme të përbashkët.
Duke theksuar se unilateralizmi dhe proteksionizmi janë në rritje, Li tha se si pjesëmarrës dhe përfitues të globalizimit ekonomik, Kina, Shoqata e Kombeve të Azisë Juglindore (ASEAN) dhe vendet e Këshillit të Bashkëpunimit të Gjirit (GCC) duhet të rrisin koordinimin dhe të mbështesin së bashku rajonalizmin e hapur dhe multilateralizmin e vërtetë. Li shtoi se thirrja e Samitit të ardhshëm ASEAN-Kinë-GCC është me rëndësi të veçantë.
Duke vënë në dukje se Malajzia është Kryetare e ASEAN-it dhe vendi mikpritës i këtij samiti trepalësh, Li tha se Kina është e gatshme të punojë ngushtë me Malajzinë për ta shfrytëzuar këtë samit, si një mundësi për të çuar përpara bashkëpunimin ekonomik trepalësh, për të krijuar një model për partneritetin global të zhvillimit, për të mbrojtur së bashku tregtinë e lirë dhe sistemin tregtar shumëpalësh, për t’iu përgjigjur sfidave globale në bashkëpunim dhe për të injektuar më shumë stabilitet, siguri dhe energji pozitive në këtë botë të trazuar.
Foto nga VCG
Nga ana e tij, Anwar tha se Kina është një vend fqinj i mirë dhe një partner i besueshëm i Malajzisë.
Malajzia është e gatshme të punojë krah për krah me Kinën për të zgjeruar vazhdimisht investimet dhe bashkëpunimin tregtar, për të shkallëzuar projektet kryesore përfshirë “Dy Vende, Dy Parqe” dhe Lidhjen Hekurudhore të Bregut Lindor, si edhe për të zgjeruar bashkëpunimin në fusha si energjia e re, financat, burimet natyrore dhe inteligjenca artificiale, tha Anwar.
Ai shtoi se Malajzia mbështet fuqimisht multilateralizmin dhe anëtarësimin e Kinës në Marrëveshjen Gjithëpërfshirëse dhe Progresive për Partneritetin Trans-Paqësor./cgtn
