Kryeministri polak Donald Tusk tha se presidenti ukrainas Volodymyr Zelensky i tha atij se Kievi është i përgatitur të vazhdojë të luftojë Rusinë për të paktën “dy deri në tre vjet të tjerë”.
Në një intervistë me gazetën britanike The Sunday Times, Tusk tha se diskutimi u zhvillua të enjten dhe u përqendrua në luftën e vazhdueshme në Ukrainë dhe kërcënimin në rritje rus ndaj Evropës Perëndimore.
“Nuk kam dyshim se Ukraina do të mbijetojë si shtet i pavarur”, tha ai. “Pyetja më e rëndësishme tani është se sa viktima të tjera do të vuajmë.
“Presidenti Zelenskyy më tha të enjten se shpreson që lufta të mos zgjasë dhjetë vjet, por Ukraina është gati të luftojë për dy ose tre vjet të tjerë”, shtoi Tusk.
Udhëheqësi polak paralajmëroi se Rusia përballet me probleme “dramatike” afatgjata, të përkeqësuara nga sanksionet e reja të SHBA-së që synojnë sektorin e saj të naftës, por theksoi se Moska ende ka një avantazh në një fushë kritike.
“Rusët janë në vështirësi vërtet serioze ekonomike”, tha Tusk. “A do të thotë kjo që mund të themi se po fitojmë? Absolutisht jo. [Rusët] kanë një avantazh të madh ndaj Perëndimit, dhe veçanërisht ndaj Evropës: ata janë gati të luftojnë.”
Duke reflektuar mbi reagimin e Evropës ndaj konfliktit, Tusk tha se ndien “kënaqësi të hidhur” pas viteve të tëra paralajmërimesh për armiqësinë e Moskës.
“Po flasim për fundin e një epoke iluzionesh në Evropë. Kam frikë se është tepër vonë. Tepër vonë për t’u përgatitur siç duhet për të gjitha kërcënimet, por jo tepër vonë për të mbijetuar”, tha ai.
/Argumentum.al
