Kryeministrit Edi Rama, vizitoi këtë të shtunë Komandën e Forcës Tokësore, në Zall-Herr, së bashku me Ministrin e Mbrojtjes Pirro Vengu dhe Shefin e Shtabit të Përgjithshëm të FA-ve Gjenerallejtënant Arben Kingji në prezantimin e arritjeve dhe sfidave të së ardhmes në fushën e mbrojtjes në 16-vjetorin e hyrjes në NATO.
Në fjalën e tij në këtë aktivitet, Rama vuri në dukje se aktualisht Shqipëria ka ushtrinë më të mirëpaguar të rajonit të Ballkanit Perëndimor, ndërkohë që siç vuri në dukje ai, “kur morëm detyrën kishim ushtrinë më të keqpaguar dhe më të keqtrajtuar në të gjithë rajonin tonë, se pastaj po të vazhdojmë më tutje me Evropën as nuk kemi ҫfarë krahasimi të bëjmë”.
“Sot kemi një Forca të Armatosur të Republikës së Shqipërisë ndaj të cilës të rinjtë dhe të rejat nuk janë më të mbyllur, por përkundrazi drejt të cilës kanë filluar dhe po i hedhin gjithnjë e më shumë sytë dhe këtë e tregon edhe 5-fishimi i rekrutimeve dhe arritja e përmbushjes së objektivit për numër rekrutësh të vendosur nga Shtabi i Përgjithshëm, gjë që më parë ishte e pamundur”, u shpreh Rama
Nga ana tjetër, shtoi Rama, “është fakt edhe i konfirmuar në vazhdimësi nga aleatët tanë që cilësia e mësimdhënies ushtarake është rritur në mënyrë të ndjeshme”.
“Praktikisht jemi sot në një pagë mesatare 1550 euro që më lejoni t’ju garantoj nuk është stacioni ynë i fundit, por është vetëm një nga stacionet për të shkuar drejt objektivit që e kemi ndarë me ju në krye të herës edhe kemi mirëkuptuar mosbesimin tuaj total kur ju kam thënë që ne do të arrijmë të kemi një ushtri shqiptare të paguar në mesataren e FA të NATO-s. Jemi duke iu afruar ndjeshëm asaj mesatareje, por kemi ende hapa për të bërë”, tha Rama.
Gjatë fjalës së tij, kryeministri theksoi se janë bërë investime të rëndësishme, megjithatë nënvizoi se ka ende shumë punë për të bërë.
“Më vjen mirë që investimi madhor që po bëhet për transformimin e të gjithë kampusit, në një kampus ultramord ka nisur të duket dhe do të vazhdojë. Do të jetë një qendër krenarie për Forcat e Armatosura, dhe ambicia jonë është që të tejkalojë ambiciet tona”, tha Rama duke iu referuar kampusit në Zall Herr.
Ndërsa gjatë fjalës së tij ministri i mbrojtjes theksoi se këtë vit 500 ushtarakë shqiptarë do të gjenden në misione jashtë vendit.
“Ky përvjetor i 16-të i anëtarësimit tonë në aleancën më të fuqishme dhe më jetëgjatë të historisë moderne na gjen në një situatë krejt tjetër dhe nuk ka simbol më të mirë të ringritjes, sesa regjimenti i forcave speciale ku ne jemi sot. Një ringritje e trefishtë fillimisht në rrafshin e bashkëpunimit politik për sigurinë dhe mbrojtjen. Në rajon kemi treguar se mund të udhëheqim një seri iniciativash në dobi të stabilitetit dhe integrimit euroatlantik. Linjëzimi ynë me BE-në që nuk vjen vetëm më fjalë por edhe vepra në rrafshin e angazhimit ushtarak, këtë vit 500 ushtarakë shqiptarë do të gjenden në misione jashtë vendit. Dhe pika e tretë një transformim në rrafshin operacional në gjithë aspektin e forcave të dyluftimit siç patëm mundësinë ta dëshmonim sot”, u shpreh Vengu.
“Në cilësinë e udhëheqësit të kësaj skuadre të mbrojtjes dua të nderoj punën, përpjekjen dhe sakrificën e çdo efektivi, familjeve tuaja dhe padyshim punën dhe ndjenjën e lartë të përgjegjësisë që tregoni çdo ditë në gjithë zinxhirin e komandimit të Forcave të Armatosura dhe Emergjencave Civile. Është fakt se në këto dy vitet e fundit mbrojtja dhe siguria nuk kanë më probleme burimesh financiare apo investimesh. Sfida jonë është që këto resurse to shpenzojmë në mënyrë eficiente”, nënvizoi Vengu
Argumentum.al
